Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kenca ben seh me malekat si dua ndai i Sodom. Paksa e si Lut sangana kundul i pintu gerbang kota. Kenca idahna ia duana minter keke Lut ngalo-ngalosa. Nembah ia i lebe-lebe kalak ndai janah nina,
2 "O Tuan, mari ku rumahku kita lebe. Bere maka banci kam kulayani. Banci iburihindu nahendu janah i jenda kita erberngi. Pagi lampas erpagi-pagi banci kam medak jenari nerusken perdalanenndu." Tapi nina kalak ndai njabapsa, "Bujur, i kesain enda me kami erberngi."
3 Erkiteken lalap meseksek pemindon Lut man bana, dungna ras ia ku rumah. Isuruh Lut suruh-suruhenna nasakken roti janah isikapkenna pangan si ntabeh man temuena e. Kenca nggo sikap kerina, man me kalak enda.
4 Ope denga temue ndai lawes medem, dilaki anak kota Sodom reh ngkeleweti rumah e. Kerina dilaki si lit i bas kota e subuk nguda tah metua reh ku je.
5 Ilebuhken jelma si nterem ndai Lut nina, "I ja kalak si reh erberngi ku rumahndu enda ndai? Baba ndarat man kami!" Ilakoken dilaki anak kota Sodom atena man kalak ndai bali ras man diberu.
6 Ndarat Lut, tapi minter i pintukenna pintun arah pudina.
7 Nina, "O teman, mindo kal aku man bandu, ula ibahanndu perbahanen si jahat e.
8 Bagenda sajalah, ma idahndu lit dua kalak anakku si nguda-nguda denga. Banci kubaba ia duana ndarat man bandu, uga atendu ia ibahanndu bage. Tapi kalak enda ula ugapa pe ban; temuengku ia, emaka arus kujaga maka la kena kai pe ia."
9 Tapi nina jelma si nterem, "Ula ko je! Engko pe kalak tandang-tandang nge, ngajari ka ko je! Ula ko je! Ntah jahaten ka atem ban kami man bam asang man kalak si dua e?" Ionjumkenna Lut ku pudi, ideherina pintun, ipecahkenna atena.
10 Tapi idudurken si dua kalak ndai minter tanna irintakna Lut mulihken ku rumah, jenari itutupna pintun.
11 Kenca bage ipepentangna kerina mata dilaki si i darat ndai, emaka lanai idahna i ja pintun.
12 Nina temue si dua kalak ndai man Lut, "Adi lit denga i jenda anakndu dilaki ntah anakndu diberu, kelandu, ntah sima-simandu si deban, babalah ia ndarat i jenda nari,
13 sabap ikernepken kami ate kami kota enda. Pengadun si mesangat kerna kalak kota enda nggo seh man TUHAN, janah kami me UtusenNa ngkernepken Sodom."
14 Emaka lawes Lut njumpai dua kalak calon kelana nina, "Pedas-pedas kam ndarat i bas ingan enda nari, sabap ikernepken TUHAN atena." Tapi iakap kalak ndai Lut erguro-guro saja.
15 Nandangi siang erpagi-pagi duana malekat ndai ngiahken Lut gelah pedas-pedas berkat nina, "Pedasken laweslah ras ndeharandu ras duana anakndu si diberu e, gelah ula kam mate tupung kota enda ikernepken."
16 Langa tetap ukur Lut. Tapi mekuah ate TUHAN man Lut. Erkiteken si e temuena si dua ndai negu ia ras ndeharana, bage pe duana anakna ndai ndarat i bas kota e nari.
17 Kenca bage nina sekalak malekat e, "Kiamken kelini kesahndu! Ula nulih ku pudi dingen ula ngadi i berneh. Kiamken ku das uruk-uruk gelah ula kam mate!"
18 Erjabap Lut nina, "O Tuan ula min kami suruhndu kiam ku das uruk-uruk.
19 Tuhu nggo isampatindu kal aku janah nggo ikelinindu kesahku. Tapi uruk-uruk ah ndauh kal, itunduk cilaka eme aku jenari mate aku ope seh i jah.
20 Ma idahndu kin kota si kitik ah? La ndauhsa. Pelepas min aku kiam ku jah gelah terkelin aku."
21 Erjabap malekat e nina, "Labo dalih. Kota si kitik ah la kukernepken.
22 Pedas dage kiamken! Sabap langa banci kubahan kai pe adi langa kam seh i jah." Erkiteken ikataken Lut kota e kitik, emaka ibahan gelarna Soar.
23 Matawari nggo pultak sanga Lut seh i Soar.
24 Rempet idabuhken TUHAN udan kertah ras api ku kota Sodom ras Gomora.
25 Radas kernep IbahanNa kota e, berneh-bernehna kerina, penduduk ras kasakai si turah i bas taneh e.
26 Tapi ndehara Lut nulih ku pudi, emaka salih ia jadi binangun sira.
27 Lampas pepagina lawes Abraham pedas-pedas ku inganna tedis i lebe-lebe TUHAN nderbih.
28 Itatapna kempak kota Sodom ras Gomora bage pe kempak berneh-berneh e kerina, janah idahna cimber i bas taneh e nari bali ras cimber api i bas ginuhur si galang nari.
29 Tapi sanga Dibata ngkernepken kota-kota si lit i bas baluren e, eme ingan Lut, iinget Dibata si Abraham, emaka ipulahina Lut ije nari gelah selamat.
30 Erkiteken mbiar Lut tading i Soar, emaka miser ia ras anakna si dua e ku das uruk-uruk, janah ringan ia i bas sada gua.
31 Nina anakna sintua man agina, "Bapanta nggo metua. I bas ingan enda la lit sekalak pe dilaki si banci ngempoi kita gelah banci lit anakta.
32 Ota sibahan gelah mabuk bapanta, gelah banci kita medem ras, jenari lit anakta i bas ia nari."
33 I bas berngi e, ibere kalak enda bapana minem anggur, emaka anak Lut sintua ersada kula ras ia. Tapi la ieteh Lut e, erkiteken ia mabuk.
34 Pepagina nina ka anakna sintua man Agina "Nderbinai aku nggo medem ras bapa; emaka si ban ka mabuk ia berngi enda, janah kenca bage medem kam ras ia gelah duana kita dat anak ibas bapanta nari."
35 Emaka iberena minem bapana seh mabuk, jenari ersada kula me anak Lut si nguda ras ia. Tapi perbahan ia mabuk la ka bo ietehna kejadin e.
36 Alu bage duana anak Lut ndai mehuli kulana iban bapana jine.
37 Sintua mupus anak dilaki, janah ibahanna gelarna Moap. Ia me nini kalak Moap si genduari e.
38 Singuda pe mupus sada anak dilaki ka, Benammi gelarna. Ia me nini kalak Amon si genduari e.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA