Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Saellana jareya PANGERAN ngaton ka Ibrahim e seddi’anna ka’-bungka’an se karamat andhi’na Mamre. E bakto jareya are ce’ panassa, Ibrahim teppa’na agi-lenggi e adha’na labangnga kemahna.
2 E bakto adhanga, Ibrahim ngoladi badha oreng katello ngadek e jadhiya. Ibrahim laju ngadek pas ngendhing nyander ka reng-oreng jareya. Sambi asojud
3 Ibrahim mator, "Guste, ngereng padha eatorana lenggi ka kemah abdidalem; junandalem padha eladinana sareng abdidalem.
4 Ngereng sareng abdidalem engala’agiya aeng sopaja junandalem padha kengenga abacco. Ngereng bu-ambu lesso e babana kajuwan ka’dhinto.
5 Sareng abdidalem junandalem eatorana dha’ar sakadarra, sopaja junandalem padha’a cengngar pole, kaangguy nerrossagi parjalanan. Manabi junandalem alenggi ka kemah abdidalem, ka’dhinto padha sareng manabi junandalem apareng kahormadan ka abdidalem. Daddi ngereng ja’ nolak, eatorana lenggi." Dhabuna se katello jareya, "Iya, mara, sengko’ nyepperra. Apa se ekakarep ba’na, la mara, lakone."
6 Ibrahim dhing-ngendhing maso’ ka dhalem kemahna, pas adhabu ka Sara, "Mara duliyan ngala’ teppong se paleng bagus tello taker, kagabay roti."
7 Saellana jareya Ibrahim berka’ ka kennengnganna ebinna, pas mondhut budhu’na sape se lempo ban alpo’ dagingnga. Budhu’na sape jareya eparengngagi ka kabulana, epakon sambelli terros eola.
8 Ibrahim laju mondhut susu, ceng-keccengnga susu ban daging gella’, laju eatorragi ka tamoyya. Tamoy se katello jareya adha’ar, eladine Ibrahim dibi’ e baba’anna kajuwan gella’.
9 Saellana jareya tamoy se katello gella’ adhabu, "Badha e dhimma Sara, binena ba’na?" "Badha e dhalem kemah," atorra Ibrahim.
10 Sala settonga tamoy se katello jareya adhabu, "Sangang bulan aggi’ Sengko’ dha’ enna’a pole. E bakto jareya Sara bakal andhi’a ana’ lalake’." E bakto jareya Sara meyarsa’agi dhari budhina labangnga kemah se badha e budhiyanna tamoy jareya.
11 Ibrahim ban Sara jareya la ce’ seppona, ban Sara la ambu se dhateng kotorra.
12 Daddi Sara agella’ e dhalem atena, sambi apekker, "Sengko’ la towa ban kero’, dhu dhimma se gi’ bisa’a terro apolonga tedhung ban tang lake? Apa pole tang lake la seppo keya."
13 PANGERAN adhabu ka Ibrahim, "Arapa Sara me’ agella’ ban ta’ parcaja ja’ aba’na gi’ bisa andhi’ ana’ maske omorra la towa?
14 Apa badha barang se mohal monggu ka PANGERAN? Sengko’ la ngoca’, sangang bulan aggi’ Sengko’ dha’ enna’a pole, e bakto jareya Sara bakal andhi’a ana’ lalake’."
15 Sara tako’, daddi ta’ ngako, atorra, "Abdidalem ta’ agella’." Tape PANGERAN adhabu, "Enja’, ba’na gella’ pajat agella’."
16 Saellana jareya tamoy se katello gella’ gubar. Bi’ Ibrahim eaterragi sampe’ gan settong kennengngan. Dhari kennengngan jareya tamoy se katello buru ngoladi ka Sodom.
17 Ca’na dhabuna PANGERAN e dhalem panggaliyanna, "Apa se ejalannagiya Sengko’ reya ta’ eroseya’agiya ka Ibrahim!
18 Na’ potona gu ta’ bakal daddiya bangsa raja tor kobasa? Lantaran Ibrahim sakabbinna bangsa e bume reya bi’ Sengko’ eberkadana.
19 Sengko’ la mele Ibrahim epanyorowa na’-ana’na ban na’ potona sopaja ta’ada ka Sengko’ ban ngalakone sabarang se bendher ban adil, sopaja Sengko’ neptebbana sakabbinna Tang janji ka Ibrahim rowa."
20 PANGERAN laju adhabu ka Ibrahim, "Ce’ bannya’na serrona oreng parkara Sodom ban Gomora, ban dusana talebat berra’na.
21 Daddi Sengko’ torona dha’ essa’, mareksa’a, apa se ekaedhing Sengko’ jareya bendher apa enja’."
22 Tamoyya se kadhuwa terros meyos ka Sodom, tape PANGERAN paggun badha e seddi’na Ibrahim.
23 Ibrahim nyemma’e PANGERAN, laju mator, "Ponapa sareng Junandalem reng-oreng se ta’ sala badhi epateyana epasarengnga reng-oreng se sala?
24 Manabi e kottha ka’dhissa’ badha oreng se sae saeket oreng, ponapa kottha ka’dhissa’ sareng Junandalem paggun epaancora? Ponapa sareng Junandalem ta’ eparengngana sapora sopaja se saeket oreng salamedda?
25 Ampon ja’ sapaneka, Guste. Sabab manabi sapaneka reng-oreng se ta’ sala tanoro’ eokom epasareng reng-oreng se sala. Ka’dhinto barang se mohal. Kadi ponapa hakimma dunnya me’ aparenga potosan se ta’ adil?"
26 Dhabuna PANGERAN, "Mon e Sodom badha oreng saeket se ta’ sala, kottha jareya bi’ Sengko’ esapora’a kabbi lantaran oreng se saeket jareya."
27 Ibrahim mator pole, "Nyo’ona sapora abdidalem lancang mabangal nyambung pamator ka Junandalem, Guste. Abdidalem ka’dhinto namong manossa se tadha’ argana.
28 Manabi oreng se sae namong badha pa’ polo lema’, banne saeket, ponapa kottha ka’dhissa’ sareng Junandalem epaancora namong amarga bannya’na oreng se sae korang kalema?" Dhabuna PANGERAN, "Mon badha pa’ polo lema’ oreng se teppa’ e dhissa’, kottha jareya bi’ Sengko’ ta’ epamosna’a."
29 Ibrahim mator pole, "Kadi ponapa manabi namong badha pa’ polo oreng?" Dhabuna PANGERAN, "Sengko’ maburunga Tang neyat jareya lantaran oreng se pa’ polo jareya."
30 Ibrahim terros mator pole, "Junandalem ja’ duka, Guste, manabi abdidalem mator pole. Kadi ponapa manabi oreng se sae namong badha tello polo?" Dhabuna PANGERAN, "Mon Sengko’ nemmo tello polo oreng, Tang neyat jareya epaburunga."
31 Ibrahim gi’ mator pole, "Nyo’ona sapora abdidalem, lancang mabangal materros pamator ka Junandalem, Guste. Kadi ponapa manabi se sae namong badha dhu polo oreng?" Dhabuna PANGERAN, "Sengko’ burung ta’ mamosna’a kottha jareya lantaran se dhu polo oreng jareya."
32 Dhi-budhina Ibrahim mator, "Junandalem ja’ duka, Guste. Abdidalem matora sakaleyan aggi’ saos. Kadi ponapa manabi se sae namong badha sapolo oreng?" Dhabuna PANGERAN, "Mon badha sapolo oreng, kottha jareya bi’ Sengko’ burung ta’ epaancora."
33 Saellana mare se abu-dhabu ban Ibrahim, PANGERAN laju adinggallagi Ibrahim, ban Ibrahim laju gubar.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA