Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Lit me empat kalak raja, eme Amrapel raja Babilon, Ariuk raja Elasar, Kedorlaomer raja Elam, Tidal raja Goyim.
2 Empatna raja enda erperang ngelawan lima raja si deban eme: Bera raja Sodom, Birsa raja Gomora, Sinah raja Adma, Semeber raja Seboim ras raja Bela (tah Soar).
3 Limana raja-raja enda ipersadana arihna ras gegehna i baluren Sidim, eme Lawit Mate si genduari.
4 Nggo sepulu dua tahun raja-raja enda ndai limana lit i teruh kuasa Kedorlaomer, tapi i bas tahun si pesepulu teluken mberontak ia.
5 I bas tahun si pesepulu empatken, Raja Kedorlaomer ras teman-temanna reh ras tenterana janah italukenna kalak Repaim i Asterot Karnaim, kalak Susim i Ham, kalak Emim i kendit Kiryataim,
6 ras kalak Hori i deleng Edom, janah iayakna kalak enda ndai seh ku Elparan, i tepi gurun pasir.
7 Kenca mulihken ia, seh ia i Kades (sanga si e igelari Enmispat). Ikuasaina kerina taneh kalak Amalek ras italukenna kalak Amori si ringan i Hasason Tamar.
8 Kenca bage raja Sodom, Gomora, Adma, Seboim, ras Bela ipepulungna tenterana guna erperang i baluren Sidim, jenari erperang ia
9 ngelawan raja Elam, Goyim, Babilon ras Elasar, empat raja ngelawan lima raja.
10 I bas baluren Sidim, melala kal lubang-lubang si isin ter. Emaka sanga raja Sodom ras Gomora kiam atena i bas pertempuren e nari ndabuh ia ku bas lubang-lubang ndai. Tapi telu raja si deban sempat selamat kiam ku deleng-deleng.
11 Emaka empat raja si menang ndai muat kai si banci ibuatna i Sodom ras Gomora, termasuk pe barang si banci ipan, jenari lawes ia.
12 Lut, anak senina Abram ringan i Sodom, emaka ia pe ras barangna ikut ibaba kalak enda.
13 Tapi lit sekalak si la ikut tertangkap. Emaka ilaporkenna kejadin e man Abram, kalak Heber e. I bas paksa e Abram sangana ringan deher sada batang kayu sikerajangen Mamre, kalak Amori. Mamre ras senina-seninana, eme Eskol ras Aner, eme teman-teman Abram.
14 Kenca nggo ieteh Abram maka anak seninana tertangkap, iaturkenna anak buahna si beluh erperang, 318 kalak teremna. Iayakina raja-raja si empat ndai terus ku Dan.
15 I je ibagi Abram kalak enda jadi piga-piga terpuk, emaka sanga berngi, iserangna musuh e. Italukenna kerina. Iayak-ayakna seh ku Hobah arah Utara Damaskus.
16 Kerina barang rampasen e idatsa mulihken. Lut, anak seninana bage pe erta-ertana ras kerina diberu-diberu ras tabanen si deban ibaba Abram mulihken.
17 Sanga Abram mulih i bas naluken Raja Kedorlaomer ras raja-raja si deban, ndarat raja Sodom ngalo-ngalo ia ku berneh Sawe (si igelari baluren Raja).
18 Bage pe, Malkisedek raja Salem, imam Dibata si Meganjangna, mbaba roti ras anggur man Abram.
19 Ipasu-pasuna Abram janah nina, "Dibata si Meganjangna, si nggo njadiken langit ras doni masu-masu Abram!
20 Pujin man Dibata si Meganjangna si nggo mereken kemenangen man bandu naluken musuh-musuhndu!" Emaka ibereken Abram sepersepuluh i bas kerina barang-barang rampasen si idatsa ndai man Malkisedek.
21 Nina raja Sodom kempak Abram, "Man bandulah kerina barang-barang rampasen e, tapi iulihken min bangku rayatku."
22 Nina Abram ngaloi, "Ersumpah aku i lebe-lebe TUHAN Dibata si Meganjangna, si njadiken langit ras doni,
23 maka la kai pe ateku bangku i bas sikerajangenndu e, selambar benang ntah sada nali sepatu pe lang, gelah ula pagi ikatakenndu maka perbanndu maka aku bayak.
24 Sada pe la ateku kubuat jadi sikerajangku, seakatan si nggo ipake anak buahku. Tapi berekenlah temanku Aner, Eskol, Mamre, muat baginna."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA