Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Iaminne sossoranna sikamma ana’na Nuh, iamintu Sem, Yafet siagang Ham. Ri le’ba’na kajariang a’ba lompoa massing anggappai sipattallu ana’-ana’ bura’ne.
2 Sikamma ana’na Yafet iamintu: Gomer, Magog, Madai, Yawan, Tubal, Mesekh, siagang Tiras.
3 Sossoranna Gomer iami a’jari pandudu’ ri Askenas, Rifat, siagang Togarma.
4 Sossoranna Yawan iami a’jari pandudu’ ri Elisa, Spanyol, Siprus, siagang Rodes.
5 Iami ke’nanga a’jari boe-boena sikamma bansa ammantanga ri sikamma biring tamparanga siagang ri pulo-puloa. Ia ngasemmi anjo sossoranna Yafet. Massing-massing bansa siagang suku ammantammi ri massing pa’rasanganna, siagang massing nia’ tommo bahasa kalenna.
6 Sikamma ana’na Ham iamintu: Kus, Mesir, Libia, siagang Kanaan.
7 Sossoranna Kus iami a’jari pandudu’ ri Seba, Hawila, Sabta, Raema, siagang Sabtekha. Sossoranna Raema iami a’jari pandudu’ ri Syeba siagang Dedan.
8 Kus nia’ ana’na bura’ne niarenga Nimrod, ia uru a’jaria tu pore siagang barani ri lino.
9 Lanri pannulunNa Batara nanipa’jarimo tau pore ammurang. Lanri kammana minjo nabiasa taua angkana, "Poro Napa’jariko Batara tupore ammurang sangkamma Nimrod."
10 Uru-uruna antamaya kakaraenganna iamintu Babel, Erekh, siagang Akad, tallu-talluna nia’ ngasengi ri Babilonia.
11 Battu anjoremmi na’lampa mange ri Asyur, nampa nabangung kota Niniwe, Rehobot-Ir, Kalah,
12 siagang Resen ia niparitangngaya ri kota Niniwe siagang Kalah. Yangasenna anjo sangnging kota lompo ngaseng.
13 Sossoranna Mesir iamintu a’jaria pandudu’ ri Lidia, Anamim, Lehabim, Naftuhim,
14 Patrusim, Kasluhim, siagang Kaftorim. Bansa Kasluhim, iaminjo a’jari boe-boena bansa Filistin.
15 Sikamma ana’na Kanaan, iamintu Sidon ana’ toana siagang Het.
16 Iatommi anne Kanaan a’jari boe-boena bansa Yebusi, Amori, Girgasi,
17 tu Hewi, Arki, Sini,
18 Arwadi, Semari, siagang Hamati. Anjo suku-suku bansa Kanaan tassiaraki sa’genna pa’rasangang bella;
19 sa’genna luara’na pa’rasanganna ke’nanga iamintu appakkaramula pa’bambaeng-baenna battu ri Sidon a’lampa timboro’ sa’genna Gerar, sa’genna ri ampi’na Gaza, siagang a’lampa anrai’ mange ri Sodom, Gomora, Adma, siagang Zeboim, sa’genna ri ampi’na Lasa.
20 Ia ngasemmi anjo sossoranna Ham. Massing-massing bansa siagang suku ammantammi ri massing pa’rasanganna, siagang massing nia’ tommo bahasa kalenna.
21 Sem, daennaya Yafet, iami a’jari boe-boena sikamma bansa Ibrani.
22 Sikamma ana’na Sem iamintu: Elam, Asyur, Arpakhsad, Lud, siagang Aram.
23 Sossoranna Aram iami a’jari pandudu’ ri Us, Hul, Geter, siagang Mas.
24 Arpakhsad iami manggena Selah. Nampa Selah iami manggena Eber.
25 Eber nia’ rua ana’na bura’ne; toaya niarengi Peleg lanri ri wattu jammannami na’jari ta’bage-bage bansa-bansaya ri lino; makaruaya niarengi Yoktan.
26 Sossoranna Yoktan iami a’jari pandudu’ ri Almodad, Selef, Hazar-Mawet, siagang Yerah,
27 Hadoram, Uzal, Dikla,
28 Obal, Abimael, Syeba,
29 Ofir, Hawila, siagang Yobab. Ia ngasemmi anjo sossoranna Yoktam.
30 Daera pammantangnganna ke’nanga luara’na battu ri Mesa mange ri Sefar, iamintu daera moncong bageang iraya.
31 Ia ngasemmi anjo sossoranna Sem. Massing-massing bansa siagang suku ammantammi ri massing pa’rasanganna, siagang massing nia’ tommo bahasa kalenna.
32 Ia ngasemmi anjo sossoranna Nuh, massing-massing bansa, situru’ massing garisi’ sossoranna ke’nanga. Iaminne ke’nanga nakabattui sikontu bansa-bansaya ri anne linoa, baku’ le’ba’na kajariang a’ba lompoa.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA