Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai martumpu ma ganup kuria ni halak Israel hu Silo, anjaha ipajongjong sidea ma ijai lampolampo partumpuan ai, dob tunduk tanoh ai i lobei ni sidea.
2 Tapi adong ope pitu marga nari na tading i Israel na so ibagihon ope parbagianan ni sidea.
3 Jadi nini si Josua ma dompak halak Israel, “Sadia dokah on marlansei nasiam laho manoluk tanoh in, na binere ni Jahowa, Naibata ni ompung nasiam, bani nasiam?
4 Buat nasiam ma humbani ganup marga tolu halak, ase husuruh sidea manlioti tanoh on, anjaha manurati mangihutkon parbagianan ni sidea bei, dob ai pe ase mulak sidea hu bangku.
5 Maningon bagion ni sidea in gabe pitu bagian. Totap do si Juda bani tanohni hampit dangsina, anjaha ginompar ni si Josep totap bani tanohni hampit utara.
6 Tapi surati nasiam ma tanoh in gabe pitu bagian, dob ai boan nasiam ma hu bangku, ase hutibalhon ruji-ruji bani nasiam ijon i lobei ni Jahowa Naibatanta.
7 Tapi lang marparbagianan halak Levi i tongah-tongah nasiam, ai hamalimon ni Jahowa do parbagianan ni sidea. Ia Gad, Ruben pakon satongah marga Manase domma dapotan parbagianan i dipar ni Jordan hampit hapoltakan, na binere ni si Musa, juakjuak ni Jahowa bani sidea.”
8 Jadi bingkat ma dalahi ai, anjaha ihatahon si Josua ma hubani na laho manurati tanoh ai, nini ma, “Laho ma nasiam manlioti tanoh in, surati nasiam ma; dob ai mulak ma nasiam hu bangku, ase hudabuh ruji-ruji bani nasiam ijon, i lobei ni Jahowa i Silo.”
9 Dob ai laho ma dalahi ai, ilioti sidea ma tanoh ai, anjaha isurati mangihutkon huta-huta, gabe pitu bagian hubagas buku; dob ai mulak ma sidea hubani si Josua, hu parsaranan i Silo.
10 Ase idabuh si Josua ma bani sidea ruji-ruji i Silo i lobei ni Jahowa; ase ijai do ibagi si Josua tanoh ai bani halak Israel mangihutkon parbagianan ni sidea bei.
11 Jadi luar ma ruji-ruji ni marga Benjamin mar sasapangku anjaha tanoh mangihutkon ruji-ruji bani sidea, ai ma i holangkolang ni anak ni si Juda pakon si Josep.
12 Parbalogan ni sidea hampit utara mulai hun Jordan; dob ai tangkog ma parbalogan ai hu urung-urung na i utara ni Jeriko, anjaha tangkog hu dolog dompak hasundutan, anjaha marujung i halimisan Bet-Awen.
13 Hunjai mandipar ma parbalogan ai hu Lus, dompak dangsina hu urung-urung ni Lus, ai ma Bet-El; tuad use ma parbalogan ai hu Aterot-Adar, na i dolog, na i dangsina ni Bet-Horon parkehen.
14 Dob ai marlegot ma parbalogan ai, anjaha marhusor i hasundutan dompak dangsina ni dolog ai, na i dangsina ni Bet-Horon, anjaha marujung i Kiriat-Baal, ai ma Kiriat-Jearim, sada huta ni anak ni si Juda; ai ma pispisni hampit hasundutan.
15 Anjaha pispisni hampit dangsina mulai hun ujung ni Kiriat-Jearim, hunjai laho ma parbalogan ai hu Epron, hu sumbul ni Bah Nepton;
16 dob ai tuad ma parbalogan ai hu ujung ni dolog, na i lobei ni habungan Ben-Hinnom, na i habungan ni halak Refaim, hampit utara, tuad use hu habungan Hinnom, i dangsina ni urung-urung Jebusi, dob ai tuad use hu En-Rogel,
17 dob ai marlegot dompak utara laho hu En-Semes, hunjai laho hu Geliot, ai ma tontang ni tangkogan Adumim; dob ai tuad hu batu ni si Bohan, anak ni si Ruben;
18 anjaha mandipar hu utara ni urung-urung ni Bet-Araba, dob ai tuad hu Araba.
19 Dob ai mandipar ma parbalogan ai hu utara ni urung-urung Bet-Hogla, marujung ma parbalogan ai i uruk parutara ni laut Garam, ai ma i ujung pardangsina ni Jordan, ai ma parbalogan pardangsina.
20 Tapi anggo hampit hapoltakan Jordan ai do balogni. Ai ma parbagianan ni halak Benjamin, mangihutkon pangku ni sidea, mangihutkon parbalogan ni sidea inggot.
21 Ia huta ni marga Benjamin mar sasapangku ai ma: Jeriko, Bet-Hogla, Emek-Kesis,
22 Bet-Araba, Semaraim, Bet-El,
23 Awim, Para, Opra,
24 Kapar-Amonai, Ofni pakon Geba. Sapuluh dua huta ma ai pakon dusunni.
25 Gibeon, Rama, Beerot,
26 Mizpa, Kefira, Mosa,
27 Rekem, Jirpeel, Tarala,
28 Sela, Elep pakon Jebus -- ai ma Jerusalem --, Gibeat pakon Kiriat. Sapuluh ompat huta ma ai pakon dusunni. Ai ma parbagianan ni halak Benjamin mar sasapangku.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA