Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 On do parbagianan na jinalo ni halak Israel i tanoh Kanaan, na binagihon ni Malim Eleasar pakon si Josua, anak ni si Nun pakon kopala ni halak Israel mar sasamarga.
2 Marhitei ruji-ruji do ibagihon bani sidea parbagianan ni sidea ai, songon na tinonahkon ni Jahowa marhiteihon ni si Musa, bereon hubani na siah pakon na satongah marga ai.
3 Ai domma ibere si Musa parbagianan ni na dua pakon na satongah marga ai i dipar i Jordan, tapi hubani halak Levi seng dong ibere parbagianan i tongah-tongah ni sidea.
4 Ai gabe dua marga do anak ni si Josep, ai ma si Manase pakon si Efraim; halani ai seng ibere sidea parbagianan bani halak Levi i tanoh ai, pitah huta do bahen ianan pakon sampalan bahen ianan ni pinahan ni sidea ampa ugas-ugas ni sidea.
5 Songon na tinonahkon ni Jahowa hubani si Musa, sonai do ibahen halak Israel, anjaha ibagi sidea ma tanoh ai.
6 Dob ai roh ma halak Juda marayak si Josua i Gilgal, gabe nini si Kaleb, anak ni si Jepunne, halak Kenas ai ma hu bani, “Ibotoh ham do hata, na hinatahon ni Jahowa hubani si Musa, juakjuak ni Jahowa, pasal ahu pakon pasal ham i Kades Barnea.
7 Marumur ompat puluh tahun ma ahu, sanggah na sinuruh ni si Musa, juakjuak ni Jahowa, ahu hun Kades-Barnea, laho mangkahapi tanoh ai; anjaha mulak ma ahu mamboan barita bani songon na domu ibagas uhurhu.
8 Tapi hasomanku, na rap tangkog pakon ahu mangganggui uhur ni bangsa in, tapi anggo ahu totap do marsijoloman hubani Jahowa Naibatangku.
9 Jadi marbulawan ma si Musa bani ari ai, nini ma, “Tanoh, na nidalanan ni naheimu, bam ma ai bahen parbagianan bam pakon bani anakmu sadokah ni dokahni, halani totap ni uhurmu bani Jahowa Naibatangku.
10 On pe, tonggor ma, ipagoluh Jahowa do ahu songon na hinatahon-Ni ai, sonari domma ompat puluh lima tahun, dob ihatahon Jahowa hata ondi bani si Musa, sadokah mardalan halak Israel i halimisan. On pe, tonggor ma, ualuh puluh lima tahun ma ahu sadari on.
11 Tong ope gogohku sadari on, songon sanggah bani parsuruh ni si Musa bangku; songon gogohku ijia, lanjar sonai ope gogohku sonari laho marporang, laho luar pakon masuk.
12 Halani ai, bere ma bangku dolog on, songon pangkatahon ni Jahowa bani ari ai, ai ibogei ham sandiri do bani ari ai, halak Enak do ijai, anjaha huta na banggal anjaha na toguh do ai. Ra ihasomani Jahowa do ahu, ase tarusir ahu sidea, songon na hinatahon ni Jahowa.”
13 Jadi ipasu-pasu si Josua ma ia, anjaha ibere Hebron hubani si Kaleb, anak ni si Jepunne, bahen parbagiananni
14 Sonai ma Hebron gabe parbagianan ni si Kaleb, anak ni si Jepunne, halak Kenas ai, ronsi sadari on, halani totap ni uhurni bani Jahowa Naibata ni Israel.
15 Ia goran ni Hebron sapari Kiriat-Arba do; si Arba, ai do jolma sibolonan i tongah-tongah ni halak Enak. Jadi sonang ma tanoh ai humbani hamunsuhon.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA