Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Tapi dob ibogei si Jabin, raja hun Hazor, pasal ai, martonah ma ia hubani si Jobab, raja hun Madon, pakon hubani raja hun Simron pakon hubani raja hun Aksap,
2 sonai homa hubani raja-raja na i tanoh dolog parutara, pakon na i Arabah i dangsina ni Kinnerot, i tanoh hondot ampa tanoh Dolog Dor martopihon laut;
3 hubani halak Kanaan na hun hapoltakan pakon hasundutan, hubani halak Amori, Het, Peresi, Jebusi na i dolog pakon halak Hewi na i bornoh ni Hermon i tanoh Mispa.
4 Jadi luar ma sidea rap pakon ganup balani, sada bangsa na bolon, songon horsik na i topi ni laut bueini, sonai homa huda pakon gareta buei tumang.
5 Martumpu ma ganup raja ondi, bingkat ma sidea anjaha marsaran dohorhon bah Merom, laho marmunsuh dompak Israel.
6 Jadi nini Jahowa ma dompak si Josua, “Ulang ma ho mabiar mangidah sidea, ai patar sonon ondoskononmu ma sidea ganup rasei i lobei ni Israel; tagili ma nahei ni hudani anjaha tutung gareta ni sidea bani apuy.”
7 Jadi sompong ma roh si Josua rap pakon balani ganup dompak sidea hu bah Merom, anjaha idorab ma sidea.
8 Iberehon Jahowa ma sidea hubagas tangan ni Israel, italuhon anjaha iayak ma sidea das hu Sidon na bolon, das hu Misrepot-Maim, anjaha das hu habungan Mispa hampit hapoltakan; ibunuhi ma sidea, ronsi sahalak pe lang dong na tading humbani sidea.
9 Jadi ihatahon si Josua ma hubani sidea songon na hinatahon ni Jahowa hu bani, itagili ma nahei ni huda ni sidea anjaha itutung gareta ni sidea bani apuy.
10 Dob ai mulak ma si Josua ijia, italuhon ma huta Hazor, anjaha ibunuhi rajani bani podang; ai Hazor do na saindokah huta pamatang ni ganup harajaon ai.
11 Anjaha ibunuh ma ganup na manggoluh ibagas huta ai bani podang, siap tumang ibahen sidea, seng dong na tading age sada na marhosah, anjaha isurbuy ma huta Hazor bani apuy.
12 Itaban si Josua ma ganup huta ni raja-raja ondi pakon ganup raja ni sidea, ibunuhi ma sidea bani podang, siap tumang ibahen sidea, songon na dob tinonahkon ni si Musa, juakjuak ni Jahowa.
13 Pitah sagala huta na i atas buntu-buntu do na so sinurbuy ni halak Israel, sobali Hazor; pitah ai do na sinurbuy ni si Josua.
14 Sagala taban-taban ni huta ai pakon pinahan-pinahan, ibuat halak Israel ma bani sidea; pitah jolma ai do haganup ibunuhi sidea bani podang, paima siap tumang sidea, seng dong na tading na marhosah age sahalak.
15 Songon na hinatahon ni Jahowa hubani si Musa, juakjuakni ai, sonai do ihatahon si Musa hubani si Josua, anjaha sonai do ibahen si Josua; sada pe lang dong na tading ibahen humbani na hinatahon ni Jahowa hubani si Musa.
16 Jadi isoluk si Josua ma ganup tanoh ai, tanoh dolog ai pakon ganup tanoh dangsina, ganup tanoh Gosen pakon tanoh na i suahni, tanoh Arabah pakon tanoh dolog ni Israel ampa tanoh na i suahni,
17 hun dolog na sae-sae ai nari, na dompak Seir, das hu Baal-Gad, i habungan ni Libanon i bona ni Dolog Hermon. Ganup do rajani itangkap anjaha ibunuh.
18 Dokah do si Josua marmunsuh pakon raja-raja ai.
19 Seng dong age sada huta na ra mardamei pakon halak Israel, sobali halak Hewi na marianan i Gibeon; haganup huta ai italuhon sidea marhitei podang.
20 Ai Jahowa do na pahengkeng uhur ni sidea laho marmunsuh dompak halak Israel, ase siap sidea, ase ulang jumpahan idop ni uhur sidea, ase bois tumang sidea, songon na tinonahkon ni Jahowa hubani si Musa.
21 Ijia ma homa roh si Josua maniapkon halak Enak hun tanoh parbalogan, hun Hebron, hun Debir, hun Anab, humbani ganup dolog Juda pakon ganup dolog Israel; siap tumang do sidea ibahen si Josua; rap pakon huta ni sidea.
22 Seng dong tading halak Enak i tanoh ni halak Israel, pitah i Gaza, i Gad pakon i Asdod adong ope na tading.
23 Ase italuhon si Josua ma ganup tanoh ai, songon na hinatahon ni Jahowa hubani si Musa; ibere si Josua ma tanoh ai hubani halak Israel bahen rupei ni sidea, mangihutkon parbagianan ni sidea mar sasamarga. Dob ai maronti ma hamunsuhon hun tanoh ai.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA