Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Lẽq jelo Ahad kelẽmaq, waktu masih peteng, Mariam Magdalena lumbar ojok makam. Ie serioq batu pengimpetne nike sampun tealih lẽman loang makam nike.

² Ie pelai boyaq Simon Petrus dait pengiring saq tekasihin siq Deside Isa, terus bebase lẽq ie pade, "Junjungan Saq Mulie sampun tebait lẽman makam, dait tiang ndẽq nenaoq lẽq mbẽ Ie tetoloq."

³ Beterus Petrus dait pengiring saq lain nike lumbar ojok makam.

⁴ Deduaqne pelai, laguq pengiring saq lain nike becatan lẽman Petrus, dait ie juluan dateng lẽq makam.

⁵ Ie nidok ojok dalem makam dait serioqne kain putẽq nike araq lẽq derike, laguq ie ndẽq tame.

⁶ Simon Petrus ẽndah dateng terutuk ie, dait tame ojok dalem makam nike. Ie serioq kain putẽq araq lẽq derike,

⁷ laguq kain saq tetaliq lẽq sirah Deside Isa ndẽq araq lẽq dẽkẽtne laguq sampun belekut lẽq taoq saq lain.

⁸ Beterus pengiring saq juluan dateng lẽq makam, tame ẽndah. Ie serioq dait percaye.

⁹ (Jangke lẽq waktu nike ie pade ndẽqman ngerti napi saq tetulis lẽq dalem Kitab Suci bahwe Ie harus idup malik lẽman ninggal.)

¹⁰ Sesampun nike kedue pengiring Deside Isa nike ulẽq ojok balẽne.

¹¹ Mariam Magdalena nganjeng lẽq julu makam sambil nangis. Sewaktu ie kenyeke nangis, ie nidok ojok dalem makam,

¹² terus serioq due malaẽkat bekelambi putẽq. Ie pade melinggih lẽq onos taoq Deside Isa tesarẽang, saq sopoq lẽq bagian sirah, dait saq sopoqne malik lẽq bagian cokor.

¹³ Malaẽkat-malaẽkat nike beketuan, "Kembẽq side nangis, inaq?" Jawab Mariam, "Junjungan tiang Saq Mulie sampun tebait, dait tiang ndẽq nenaoq lẽq mbẽ Ie tetoloq."

¹⁴ Sesampun bebase maraq nike, ie ngẽngat andang mudi, dait serioq Deside Isa ngadeg lẽq derike. Laguq ie ndẽq tandaq bahwe nike Deside Isa.

¹⁵ Deside Isa bemanik lẽq ie, "Inaq, kembẽq side nangis? Sai saq side boyaq?" Mariam paran nike tukang kebon, jari ie bebase, "Paq, lamun Side saq jauq Ie lẽman deriki, tulung badaq tiang lẽq mbẽ Side toloq Ie, adẽq tiang bau bait Ie."

¹⁶ Deside Isa bemanik lẽq ie, "Mariam!" Mariam ngẽngat andang Deside Isa, beterus matur kadu base Ibrani, "Rabuni!" (Saq artine, "Guru".)

¹⁷ "Ndaq demak Tiang," manik Deside Isa lẽq ie, "sẽngaq Tiang ndẽqman lalo ojok Bapa. Laguq silaq lumbar tipaq sanak-sanak Tiang, dait sampẽang tipaq ie pade bahwe mangkin Tiang lalo ojok Bapa Tiang dait Bapa side ẽndah, Allah Tiang dait Allah side."

¹⁸ Terus Mariam lumbar nyampẽang tipaq pengiring-pengiring Deside Isa bahwe ie sampun serioq Junjungan Saq Mulie, dait Junjungan Saq Mulie sampun manikang selapuqne nike lẽq ie.

¹⁹ Lẽq jelo Ahad nike ẽndah, sesampun kekelem, pengiring-pengiring Deside Isa bekumpul lẽq sopoq balẽ saq lawang-lawangne telenting, sẽngaq ie pade takut lẽq dengan-dengan Yahudi. Selung-selung Deside Isa rauh dait ngadeg lẽq tengaq-tengaq ie pade, dait bemanik, "Damẽ sejahtere umaq side pade."

²⁰ Sesampun bemanik maraq nike, Ie metitoqang gading dait woteng-Ne lẽq ie pade. Sewaktu ie pade serioq Junjungan Saq Mulie, ie pade cemoh gati.

²¹ Beterus karing sekali Deside Isa bemanik lẽq ie pade, "Damẽ sejahtere umaq side pade! Maraq Bapa ngutus Tiang, maraq nike ẽndah Tiang ngutus side pade."

²² Beterus Ie niupang embok-Ne lẽq ie pade dait bemanik, "Terimaq niki Roh Suci.

²³ Lamun side pade ngampunin dose dengan, Allah ẽndah ngampunin dengan nike. Lamun side pade ndẽq ngampunin dose dengan, Allah ẽndah ndẽq ngampunin dengan nike."

²⁴ Tomas (saq tesebut Didimus), salaq sopoq lẽman due olas pengiring Deside Isa, ndẽq araq lẽq taoq nike waktu Deside Isa rauh.

²⁵ Make pengiring-pengiring Deside Isa saq lain bebase lẽq Tomas, "Tiang pade sampun serioq Junjungan Saq Mulie!" Laguq jawab Tomas, "Lamun tiang ndẽqman serioq onos paku lẽq gading-Ne, dait ndẽqman jujuq siq ranggot tiang ojok onos paku nike dait ndẽqman noloq ime tiang lẽq woteng-Ne, make tiang ndẽqman mẽlẽ percaye."

²⁶ Baluq jelo sesampun nike pengiring-pengiring Deside Isa araq malik lẽq dalem balẽ nike dait Tomas bareng-bareng kance ie pade. Selapuq lawang telenting. Laguq Deside Isa rauh dait ngadeg lẽq tengaq-tengaq ie pade, terus bemanik, "Damẽ sejahtere umaq side pade."

²⁷ Beterus Ie bemanik lẽq Tomas, "Toloq ranggotde lẽq deriki dait serioq imen Tiang, ulurang imende dait toloq lẽq woteng Tiang. Ndaq ragu-ragu malik, laguq percaye!"

²⁸ Tomas matur lẽq Deside Isa, "Ya, Tuhan tiang dait Allah tiang!"

²⁹ Beterus Deside Isa bemanik lẽq ie, "Lantaran side sampun serioq Tiang, make side percaye. Bahagie ie pade saq ndẽq serioq, laguq percaye."

³⁰ Masih luwẽq malik keajaipan-keajaipan lain saq tepiaq siq Deside Isa lẽq julu pengiring-pengiring-Ne, laguq ndẽq tetulis lẽq dalem kitab niki.

³¹ Laguq selapuqne niki tetulis, adẽq side pade percaye bahwe Deside Isa nike Mesias, Bije saq asalne lẽman Allah, dait adẽq siq percaye, side pade nerimaq idup dalem pesẽngan-Ne.

Yohanes

Video Yohanes 20

Ikuti Kami:

KONTAK | PARTISIPASI | DONASI