Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sahulõ sibai wongi hari Migu, me ogõmi na, numalõ ba lewatõ Maria Magadala. I'ila ba da'õ lagõlagõ lewatõ no tefagaõlõ moroi ba mbawa lewatõ.

² Fagohi ia wangalui Simoni Fetero awõ nifahaõ tanõ bõ'õ ni'omasi'õ Yesu, imane khõra, "No lahalõ niha mboto Yesu; lõ ma'ila heza labe'e iada'e!"

³ I'anema'õ numalõ Wetero awõ nifahaõ bõ'õ andrõ ba lewatõ.

⁴ Lalau fagohi darua ira, ba hiza abõlõ alio nifahaõ bõ'õ andrõ moroi khõ Wetero; ofõna ia irugi lewatõ moroi khõ Wetero.

⁵ Me ifaigi bakha lewatõ, i'ila muko si so ba da'õ, ba hiza lõ mõi sa ia bakha.

⁶ Aefa da'õ tohare Zimoni Fetero moroi furi, idõlõ bakha ba lewatõ andrõ. Ba i'ila nukha muko si so ba da'õ,

⁷ ba muko bõbõ hõgõ Yesu lõ hadõi ba da'õ. No tefazaumba muko andrõ.

⁸ Aefa da'õ mõi gõi bakha ba lewatõ nifahaõ si'ofõna mondrugi no mege. I'ila gõi fefu da'õ ba faduhu dõdõnia.

⁹ (Irugi ginõtõ andrõ lõ nasa saboto ba dõdõra nisura ba Mbuku Ni'amoni'õ wa ifuli auri Ia moroi ba wa'amate.)

¹⁰ Aefa da'õ mangawuli ndra nifahaõ Yesu andrõ.

¹¹ Ilau me'e Maria ba zinga lewatõ andrõ. Ba fatua ilau me'e, ifaõndrõ ia ba ifaigi bakha ba lewatõ,

¹² ba i'ila darua mala'ika sobaru safusi. No dumadao mala'ika andrõ ba nahia mboto Yesu mege. Si samõsa dumadao ba gamaudu hõgõ, ba si samõsa tõ dumadao ba gamaudu gahe.

¹³ Lasofu ira mala'ika andrõ khõ Maria, "He Ina, hana wa me'e ndra'ugõ?" Itema li Maria imane, "No lahalõ niha Zo'aya ya'o, ba lõ u'ila heza labe'e Ia!"

¹⁴ Me no aefa iw̃a'õ da'õ Maria ifaigi furi ba i'ila Yesu no muzizio ba da'õ. Ba hiza lõ aboto ba dõdõnia wa Yesu da'õ.

¹⁵ Isofu khõnia Yesu Imane, "He Ina, hana wa me'e ndra'ugõ? Haniha ni'aluimõ Ina?" Iwalinga tuka kabu niha andrõ Maria. Andrõ imane Maria, "He Ama, na no õfawu'a Ia moroi ba da'e, ombakha'õ khõgu heza õbe'e Ia. Mõi ndra'o dania wanga'i Ya'ia."

¹⁶ Imane Yesu khõ Maria, "He Maria!" Ifaigi Yesu Maria ba imane ba li Heberai'o, "Rabuni!" (Eluahania "Guru".)

¹⁷ Imane Yesu khõ Maria, "Bõi babaya Ndra'o. Bõrõ me lõ si mõi Ndra'o khõ nama. Ae'e khõ ndra talifusõ-Gu ba ombakha'õ khõra, õmane. Mõi Ndra'o khõ Nama-Gu ba amami gõi; khõ Lowalangi-Gu ba Lowalangimi gõi."

¹⁸ Numalõ Maria wangombakha khõ ndra nifahaõ Yesu wa no i'ila Zo'aya awõ wa no Iw̃a'õ fefu da'õ khõnia So'aya.

¹⁹ Me luo Migu andrõ gõi, me bongi, no so ndra nifahaõ Yesu ba zi sambua omo si no mukusi fefu mbawa ndruhõ; bõrõ me ata'u ira ndra salaw̃a niha Yahudi. I'anema'õ tohare Yesu ba muzizio Ia ba gotaluara, ba Imane, "Ya'ohahau dõdõmi!"

²⁰ Me no aefa Iw̃a'õ da'õ, Iforoma'õ khõra danga awõ dõla nosu-Nia. Ba omuso sibai dõdõra me la'ila Zo'aya.

²¹ Ifuli Imane khõra Yesu, "Ya'ohahau dõdõmi! Si mane famatenge Nama Ya'o, si manõ gõi dania wamatenge-Gu ami."

²² Me no aefa Iw̃a'õ da'õ Ihehaini ira hanuhanu-Nia ba Imane khõra, "Mitema Geheha Lowalangi.

²³ Na so ni'efa'õmi horõ, ba I'efa'õ da'õ Lowalangi. Ba na so zi lõ mi'efa'õ horõ, ba lõ gõi I'efa'õ da'õ Lowalangi."

²⁴ Toma (nifotõi si "Faero") samõsa ba gotalua nifahaõ Yesu. Lõ hadõi Toma me mõi Yesu khõ ndra nifahaõ-Nia.

²⁵ La'ombakha'õ khõ Toma ira nifahaõ tanõ bõ'õ lamane, "No ma'ila Zo'aya!" Itema li Toma imane, "Na lõ ni'ilagu lahe gosõ'osõ ba danga-Nia ba na lõ ubabaya ngai-Nia, ba lõ faduhu dõdõgu."

²⁶ Ba fitu bongi aefa da'õ, so ndra nifahaõ Yesu ba nomo andrõ, ba so gõi Doma ba da'õ. No muduhõ fefu mbawa ndruhõ. Ba i'anema'õ tohare Yesu ba muzizio Ia ba gotaluara, Imane, "Ya'ohahau dõdõmi!"

²⁷ Aefa da'õ Imane Yesu khõ Doma, "Be'e dangau ba da'e, ba faigi danga-Gu. Oro'õ dangau ba babaya ngai-Gu. Bõi mangiwa sa'ae dõdõu. Ya faduhu dõdõu sa'ae!"

²⁸ Imane Toma khõ Yesu, "So'aya ya'o! Ba Lowalangigu!"

²⁹ Imane Yesu khõnia, "Hadia faduhu dõdõu bõrõ me no õ'ila Ndra'o? Ya'ahowu niha si faduhu tõdõ khõ-Gu, hew̃a'ae lõ i'ila Ndra'o!"

³⁰ Wa oya nasa zahõlihõli dõdõ nilau Yesu fõna ndra nifahaõ-Nia, ba hiza lõ musura fefu zahõlihõli dõdõ andrõ bakha ba zura andre.

³¹ Musura fefu da'e ena'õ faduhu dõdõmi wa Yesu andrõ no Razo Sangorifi nifabu'u Lowalangi, Ya'ia andrõ Nono Lowalangi. Ba wa'afaduhu dõdõ khõ-Nia misõndra wa'auri ba wa'abõlõ-Nia.

Yohanes

Video Yohanes 20

Ikuti Kami:

KONTAK | PARTISIPASI | DONASI