Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Araq sopoq dengan aranne Lazarus ndot lẽq Betania bareng-bareng kance semetonne Mariam dait Marta.

² Mariam nike dengan nine saq nolẽngang minyak sengẽh lẽq cokor Junjungan Saq Mulie, dait osokne siq bulune. Lẽq sopoq waktu Lazarus sakit.

³ Deduaq semetonne suruq dengan nyampẽang kabar niki tipaq Deside Isa, "Junjungan Saq Mulie, dengan saq Pelungguh kasihin nike kenyeke sakit."

⁴ Sewaktu Deside Isa pireng kabar nike, Ie bemanik, "Penyakit niki ndẽq gen miaq ie ninggal. Niki telaksane adẽq Allah temulieang dait siq care nike Bije saq asalne lẽman Allah ẽndah temulieang."

⁵ Deside Isa ngasihin Marta, Mariam dait Lazarus.

⁶ Laguq waktu Deside Isa mauq berite bahwe Lazarus sakit, Ie sediah mererepan lẽq taoqne due jelo malik.

⁷ Sesampun nike baruq Deside Isa bemanik lẽq pengiring-pengiring-Ne, "Silaq ite tulak ojok Yudea."

⁸ Jawab ie pade, "Bapaq Guru, baruq gati dengan-dengan Yahudi mẽlẽ melẽwas Pelungguh kadu batu dait mangkin Pelungguh kayun tulak ojok derike?"

⁹ Manik Deside Isa, "Tekan kenjelo ngonẽqne due olas jam? Dengan saq lampaq lẽq waktu kenjelo, ndẽq gen kedantuk sẽngaq ie serioq cahaye dunie niki.

¹⁰ Laguq dengan saq lampaq lẽq kekelem kedantuk, sẽngaq ndẽq araq cahaye lẽq ie."

¹¹ Maraq nike manik Deside Isa. Beterus Ie bemanik malik, "Sahabatte Lazarus tindoq, laguq Tiang gen lalo nguresang ie."

¹² Pengiring-pengiring Deside Isa matur, "Junjungan Saq Mulie, lamun Lazarus tindoq, laun ie gen selah."

¹³ Maksut Deside Isa nike bahwe Lazarus sampun ninggal. Laguq ie pade paran Deside Isa bemanik bahwe Lazarus tindoq biase.

¹⁴ Keranaq nike Deside Isa bemanik secare terus-terang tipaq ie pade, "Lazarus sampun ninggal.

¹⁵ Laguq Tiang seneng ẽndah sẽngaq Tiang ndẽq araq lẽq derike, sẽngaq solahan umaq side pade adẽq side pade iniq percaye. Mangkin silaq ite lumbar ojok Lazarus."

¹⁶ Tomas saq tesebut, "Didimus" bebase lẽq batur-baturne saq pade-pade pengiring Deside Isa, "Silaq ite milu, alur ite ninggal bareng Ie."

¹⁷ Sewaktu Deside Isa rauh lẽq taoq nike, Lazarus sampun empat jelo ngonẽqne tekubur.

¹⁸ Betania nike rapet lẽman Yerusalem, kire-kire telu kilomẽter jaoqne.

¹⁹ Luwẽq dengan Yahudi dateng ojok Marta dait Mariam jari hibur angen ie pade sẽngaq semetonne ninggal.

²⁰ Sewaktu Marta dengah bahwe Deside Isa rauh, ie sugul jari nyambut Deside Isa, laguq Mariam ndot lẽq balẽ.

²¹ Marta matur lẽq Deside Isa, "Junjungan Saq Mulie, lamun waktu nike Pelungguh araq lẽq deriki, pasti semeton tiang ndẽq milinang.

²² Timaq maraq nike tiang nenaoq bahwe mangkin niki ẽndah Allah gen ngicanin napi juaq saq Pelungguh tunas lẽq Ie."

²³ Manik Deside Isa tipaq Marta, "Semetonde gen idup malik."

²⁴ Jawab Marta, "Tiang nenaoq Lazarus gen idup malik lamun dengan ninggal teidupang lẽq ahir jaman."

²⁵ "Tiang saq ngebẽng idup dait ngidupang dengan ninggal." Manik Deside Isa tipaq Marta, "Dengan saq percaye lẽq Tiang gen idup, timaq ie sampun ninggal.

²⁶ Dait dengan idup saq percaye lẽq Tiang, ndẽq gen binase selaẽq-laẽqne. Napi side percaye lẽq hal nike?"

²⁷ Jawab Marta, "Junjungan Saq Mulie, tiang percaye Pelungguh niki Almasih, Bije saq asalne lẽman Allah, saq gen rauh ojok dalem dunie niki."

²⁸ Sesampun Marta bebase maraq nike, ie lumbar ngempoh Mariam, semetonne dait bepẽsẽq lẽq ie, "Bapaq Guru araq lẽq deriki; Ie ketuanang side."

²⁹ Dengah hal nike, Mariam becat-becat ures, terus lumbar ojok Deside Isa.

³⁰ Waktu nike, Deside Isa ndẽqman tame ojok dẽse. Ie masih lẽq taoq Marta bedait kance Ie.

³¹ Dengan-dengan Yahudi saq kenyeke hibur angen Mariam lẽq balẽ, serioq Mariam becat-becat ures dait sugul; terus ie pade lumbar turut ie, sẽngaq ie pade paran Mariam lumbar nangis ojok kubur.

³² Sewaktu Mariam dateng lẽq taoq Deside Isa dait serioq Ie, Mariam sujut lẽq arepan-Ne dait matur, "Junjungan Saq Mulie, lamun Pelungguh araq lẽq deriki waktu nike, pasti semeton tiang ndẽq milinang."

³³ Sewaktu Deside Isa cingakin Mariam nangis, dait dengan-dengan Yahudi saq dateng bareng Mariam nike ẽndah nangis, Deside Isa sedih gati.

³⁴ Make Deside Isa beketuan tipaq ie pade, "Lẽq mbẽ side pade nguburang ie?" "Silaq Junjungan Saq Mulie cingakin," jawab ie pade.

³⁵ Beterus Deside Isa besermin.

³⁶ Make dengan-dengan Yahudi nike bebase, "Serioq, belẽq gati kasih-Ne lẽq Lazarus!"

³⁷ Laguq araq lẽq antare ie pade saq bebase, "Ie piaq dengan bute tao nyerioq, kembẽq Ie ndẽq bau segah adẽq Lazarus ndẽq milinang?"

³⁸ Deside Isa asẽq malik, beterus lumbar ojok kubur. Kubur nike sopoq goe saq teimpet kadu batu belẽq.

³⁹ "Alih batu nike," manik Deside Isa. Jawab Marta semeton dengan saq ninggal nike, "Junjungan Saq Mulie, ie sampun empat jelo tekubur. Pasti sampun bais!"

⁴⁰ Deside Isa bemanik lẽq Marta, "Tekan sampun Tiang badaq side: Lamun side percaye, side gen serioq kemuliean Allah!"

⁴¹ Make ie pade alih batu nike. Beterus Deside Isa nengadah andang langit dait bemanik, "Ya Bapa, Tiang ngucapang syukur tipaq Deside, sẽngaq Deside sampun mirengang Tiang.

⁴² Tiang nenaoq bahwe Deside tetep mirengang Tiang, laguq Tiang matur maraq niki, lantaran dengan-dengan saq araq lẽq deriki; adẽq ie pade percaye bahwe Deside saq ngutus Tiang."

⁴³ Sesampun bemanik maraq nike, Deside Isa bemanik siq suare saq belẽq, "Lazarus, sugul!"

⁴⁴ Make dengan saq sampun ninggal nike sugul. Ime dait naẽne masih tebungkus siq kain putẽq, dait muene masih tetutup siq kain penutup mue. Terus manik Deside Isa tipaq dengan-dengan lẽq derike, "Lekaq kain-kain nike adẽq ie ndẽq kelalah lampaq."

⁴⁵ Luwẽq dengan-dengan Yahudi saq dateng jangoq Mariam, percaye lẽq Deside Isa sesampun serioq peristiwe nike.

⁴⁶ Laguq pire dengan lẽq antare ie pade lumbar ojok dengan Parisi dait ngelaporang napi saq sampun telaksaneang siq Deside Isa.

⁴⁷ Keranaq nike dengan-dengan Parisi dait imam-imam kepale ngaraqang sangkep bareng Mahkamah Agame. Ie pade bebase, "Napi saq harus ite piaq? Dengan niki luwẽq piaq keajaipan!

⁴⁸ Lamun ite tetep ngalurang Ie maraq niki selapuq dengan gen percaye lẽq Ie! Dait ahirne dengan-dengan Roma gen dateng dait ngancurang Gedẽng Allah lantong selapuq bangsente!"

⁴⁹ Salaq sopoq lẽman ie pade saq aranne Kayapas, Imam Agung lẽq taun nike, bebase, "Side pade ndẽq nenaoq napi-napi.

⁵⁰ Napi side pade ndẽq sadar bahwe demi rakyat, solahan sopoq dengan ninggal ketimbang selapuq bangse ancur?"

⁵¹ Setetune Kayapas bebase maraq nike, ndẽq lẽman pikiranne mẽsaq. Laguq sebagẽ Imam Agung lẽq taun nike ie benubuat bahwe Deside Isa gen ninggal umaq bangse Yahudi.

⁵² Dait ndẽq umaq bangse Yahudi doang, laguq ẽndah jari ngumpulang dait pesopoq bije-bije dowẽn Allah saq sampun bepencar-pencar.

⁵³ Mulai jelo nike pare penguase Yahudi besekongkol jari nyematẽq Deside Isa.

⁵⁴ Keranaq nike Deside Isa nẽnten nyatayang diriq-Ne lẽq julun dengan luwẽq lẽq kalangan dengan Yahudi. Deside Isa bilin Yudea, beterus lumbar ojok kote saq aranne Epraim dẽkẽt padang gurun. Lẽq taoq nike Ie meneng bareng pengiring-pengiring-Ne.

⁵⁵ Waktu nike sampun rapet Hari Raye Paskah Yahudi. Luwẽq dengan lẽman dẽse-dẽse sampun lumbar ojok Yerusalem jari ngelaksaneang upacare mersiq diriq sendẽqman perayaan nike.

⁵⁶ Ie pade boyaq Deside Isa, dait sewaktu bekumpul lẽq Gedẽng Allah, ie pade bebase sopoq kance saq lainne, "Berembẽ pendapet side? Sang Ie ndẽq dateng lẽq perayaan niki."

⁵⁷ Ie pade bebase maraq nike sẽngaq imam-imam kepale dait dengan-dengan Parisi sampun nyugulang prẽntah bahwe dengan saq nenaoq lẽq mbẽ Deside Isa araq, harus ngelaporang adẽq Ie tebau.

Yohanes

Video Yohanes 11

Ikuti Kami:

KONTAK | PARTISIPASI | DONASI