Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai inunut si Job ma mangkatahon hatani, nini ma,
2 “Ah, ambit songon bani bulan-bulan sinabaruon ondi ma namin partibalhu, songon bani panorang sanggah Naibata manramotkon ahu,
3 sanggah na gara ope suluh-Ni i babou ni ulungku, anjaha ibagas sinalsal-Ni hudalani na golap,
4 songon panorang haposoonku ondi, sanggah na ihasomani Naibata ope ahu ibagas lampolampongku;
5 sanggah na rapkon ahu ope Pargogoh Na So Tarimbang in, sanggah na marloulou ope dakdanakku bangku;
6 sanggah na marparidian dadih ondi naheihu, anjaha dolog batu na i lambungku marjullak-jullakkon bah minak bangku.
7 sanggah na luar baru on ahu hu horbangan ni huta in, anjaha husuruh na pasirsirhon hundulanku ibagas tiga,
8 marponop parana-parana dob ididah ahu, anjaha halak partua hehe lanjar jongjong;
9 maronti raja-raja marsahap, anjaha marsisongom pamanganni bei,
10 sip sora ni na sangap-sangap, anjaha dilahni longkot bani langit-langitni.
11 Pinggol na mambogei sorangku, mangkatahon sangap ahu, anjaha mata na mangidah ahu, mangakui ahu bujur,
12 halani hupaluah do halak na masombuh, na mangindo pangurupion, pakon na tading maetek, na so adong pangadu-aduanni.
13 Jadi pasu-pasu ni halak na sihol magou sogop hu bangku, anjaha uhur ni naboru na mabalu marolob-olob hubahen.
14 Hapintoron do husorungkon, gabe hiou do ai bangku; habonaron jadi baju ampa gotong-gotong do ai bangku.
15 Gabe mata do ahu bani halak na mapitung, anjaha nahei bani halak na tempang.
16 Bapa do ahu bani halak na musil, anjaha parkara ni halak na so hutandai pe hupajorei do.
17 Huropangi do ipon ni halak parjahat, anjaha rampasanni husontapkon hun pamanganni.
18 Halani ai nini uhurhu do, ʻBani asarhu do ahu matei, anjaha pabueionku ari-aringku songon horsik.
19 Mangumparpar do uratku bani bah, anjaha namuron do rantingku borngin.
20 Tongtong do ratah hasangaponku i lambungku, anjaha ganda gogoh ni siorhu ibagas tanganku.ʼ
21 Tangi do halak bangku, anjaha tarpaima-ima, anjaha sip mambogei hatoranganku.
22 Dob marsahap ahu seng dong be na mansual, manjalir do hatangkai bani sidea.
23 Tarpaima-ima do sidea bangku songon bani udan, anjaha ipangangang sidea do pamanganni songon sabah langit na mangkasiholhon udan.
24 Basar do ahu bani sidea sanggah mandolei sidea, anjaha minar ni bohingku seng ihirjati sidea.
25 Anggo martandang ahu bani sidea, hampit luluan do ahu hundul, songon raja hundul i tongah-tongah ni balani, songon halak siapohi na marhoru ni uhur.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA