Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Napannarrusu’mi kana-kananna Ayub, nakana,
2 "Dasi-dasi nakkulle kamma ammotere’ riolo tallasakku, ri wattungku Najagai Allata’ala.
3 Tuli Nasarea’ pannulung, Nasingaria’ ri wattungku a’jappa lalang ri sassang.
4 Iaminjo allo-allo kasalewangangku, ri wattunna a’reppese’ Allata’ala anjagai ballakku.
5 Anjo wattua, Narurungang ija’ Kaminang Koasaya, na nia’ ngaseng ana’-anakku ri tammuliliku.
6 Jai sikali dadi’ wassele’ olo’-olo’ piaraku. Jai minynya’ wassele’na poko’-poko’ zaitunku, manna nanjoreng ri butta jaia batunna nilamung.
7 Punna sipammempoang sikamma tutoa-toana kotaya, niaka’ ammempo ri tangnga-tangngana ke’nanga,
8 a’biring ngasengi ana’-ana’ rungkaya, akkaro-karo punna nacinikka’ ke’nanga. Kammayatompa sikamma tau toa-toaya ammenteng mangngada’; untu’ ambari sallanga’.
9 Ba’lalo sikamma tumalompoa ammari a’bicara.
10 siagang tunikangalikanga pole ta’bicarayai.
11 Manna inai angngaliki mae ri nakke; inai ancinika’, napuji jasaku.
12 Saba’ kutulungi tu kasi-asi appalaka bantuang; kubantui ana’ kukang tenaya antallassi.
13 Nipujia’ ri tau sannaka lompona kasusaanna, kutulungi sikamma jandaya sa’genna amang nasa’ring ke’nanga.
14 Lambusuki gaukku, tena callangku; kupaentengi kaadelanga situlina.
15 Mae ri tau butaya, inakke a’jari rapang matanna; mae ri tau pesoka, inakke a’jari rapang bangkenna.
16 Mae ri tu kasi-asia inakke a’jari rapang mangge; mae ri tubattu-battua, inakke angngalleangangi.
17 Mingka kutepoki koasana tau pallaka, na kupasalama’ tau eroka napa’jari koro’banna.
18 Minasangku erokka’ angkasiaki la’bu umurukku, na kumate siagang sannang ri balla’ kalengku.
19 Sanrapanga’ poko’ kayu copponga timbona, gannaki ri je’ne’ aka’na, nibasai ri saliu’ tangke ca’dina.
20 Kutuli nipuji ri sikontu taua, tena le’baka kurang kagassingangku.
21 A’mereki taua punna kupakainga’; napilangngeri baji’ sikamma kana-kanangku.
22 Pungku le’ba’ a’bicara, tenamo parallu antambai; ammallasaki kana-kanangku rapang atti’na je’ne’ bosia.
23 Sikontu taua rannu ngaseng antarimai kana-kanangku, rapang pamarri antarimai bosia ri wattu bara’.
24 Ta’muria’ ri ke’nanga ri wattunna tappu’ minasa ke’nanga; rupa mate’neku antambai sumanga’na ke’nanga.
25 Inakke anna’gala’ pimpinang, siagang angngalle kaputusang. Kupimping ke’nanga rapang karaeng ri tangngana pasukanna, na kusaleori ke’nanga lalang si’nana."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA