Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Iterusken Jop ngerana nina,

² "Bicara bagi si mbarenda ka min mulihi geluhku; tupung si e Dibata tetap ngkawali aku.

³ La erngadi-ngadi IsampatiNa aku; adi aku erdalan arah gelap, IberekenNa terang bangku.

⁴ Bage me nai asum aku senang denga, i ja erkiteken Dibata temanku, jabungku IkawaliNa.

⁵ Sanga si e si Mada Kuasa nemani aku, anak-anakku pulung i sekelewetku.

⁶ Lembu ras kambingku, la teralang bue susuna; janah aminna gia i bas taneh si erbatu-batu, batang saitunku melala minakna.

⁷ Adi pulung tua-tua i bas kuta, janah reh aku kundul ku tengah-tengahna,

⁸ minter nisi kalak si nguda ngidah kerehenku, tedis kalak si metua enghamati aku.

⁹ Peminpin-peminpin bangsa e minter ngadi ngerana,

¹⁰ kalak si mehagana pe, sip kerina.

¹¹ Kalak si ngidah tah megi kerna aku, kerina mujiken perbahanenku.

¹² Sabap adi nderkuh kalak musil si tertindas minter kupulahi, janah anak melumang si la ersima-sima, kusampati.

¹³ Kalak si narus bene i bas kesusahen, ipujikenna aku, janah erkiteken penampatku ersurak meriah diberu balu-balu.

¹⁴ Nandangi kerina manusia, bujur dingen adil perbahanenku.

¹⁵ Aku me gelgel mata man kalak si pentang, dingen nahe man si cempang-cempang.

¹⁶ Nandangi kalak musil, aku desken bapana, janah kalak pertandang si kesusahen, tetap kukapiti.

¹⁷ Kuasa kalak jahat kupenggelken, janah kupulahi kalak si nggo ibenekenna.

¹⁸ Erkiteken si e ngarap aku umurku nggedang, janah mate i bas rumahku alu ukur senang.

¹⁹ Aku desken batang kayu si mbur, uratna erlau, dahanna bernak ibahan namur.

²⁰ Aku tetap ipujiken kalak, janah gegehku pe lalap la urak.

²¹ Kerina kalak sinik di aku ngerana mereken nasehat, janah kai si kubelasken itinggalkenna alu megermet.

²² Kenca aku dung ngerana, lanai lit perlu si man tambahen, kata-katangku ngersap desken lau udan.

²³ Kerina kalak ermeriah ukur ngaloken kai si kukataken, bali ras perjuma tuhur ngalo-ngalo udan dung erdangen.

²⁴ Adi ndele ate kalak, kuciremi ia, janah ngidah ayongku siang, ergiah-giah minter ukurna.

²⁵ Aku me jadi penguluna; kutuduhken dalan si man dalanenna. Kupinpin ia bagi sekalak raja minpin tenterana. Kuapuli ia adi ceda atena.