Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Dob ai nini si Bildad na hun Sua ma mambalosi,

² “Antigan pe ase marsaran ho na marsahapi in? Pardiateihon, anjaha lopas ma hanami sonari marsahap.

³ Mase ma songon pinahan hanami hiraon? Mase ma songon halak na oto hanami iahap ho?

⁴ Ho sandiri do na marsirak dirimu ibagas ringismu; tumaram ma tarulang tanoh on halani ho, barang mosor dolog batu humbani iananni?

⁵ Tongon tene, maningon mintop do parsuluhan ni halak parjahat, anjaha seng marsinalsal dilah ni apuyni.

⁶ Haliharon ai golap do ibagas lampolamponi, anjaha suluhni i babouni mintop.

⁷ Hona sosak do langkah-langkahni na gogoh ai, anjaha tahi-tahini mangonai hubani sandiri.

⁸ Naheini sandiri patongon-tongonkonsi hubagas tirangkap, anjaha mardalan ia i babou ni siding ni godung.

⁹ Hona gansip do tambihulni ibahen ragom, anjaha siding manjorotisi.

¹⁰ Hona taon do siding bani ibagas tanoh, anjaha hona baen godung i abalanni.

¹¹ Hamagouan do manonggotisi inggot, anjaha ipardakdak ia bani langkah-langkahni.

¹² Sihol-siholan do hasedaon mambondutsi, anjaha hamagouan ai tagang mandabuhkonsi.

¹³ Domma bois ibahen naborit hulingkulingni, anjaha bunga tubuh ni hamatean mamangani pagorini.

¹⁴ Hona sarad do ia humbani lampolamponi, hatengeran ni uhurni hinan, anjaha tarboban hu lobei ni raja sipanonggoti.

¹⁵ Halak na legan mando marianan ibagas lampolamponi, anjaha hirtah itirtirhon bani iananni.

¹⁶ Horah do uratni hun toruh, anjaha melus dangkahni hun datas.

¹⁷ Masab do pardingatan bani hun tanoh on, anjaha seng hona singatan be goranni i alaman.

¹⁸ Hona onjar do ia hun haliharon hu hagolapan, anjaha ipabali do ia hun tanoh on.

¹⁹ Seng tubuhan anak barang pahompu ia i tongah-tongah ni bangsani, sabonar seng dong simasimani tading bani iananni.

²⁰ Songgotan tumang ma halak na maposo mangidah ari hamagouanni ai, anjaha gobir halak na matua.

²¹ Tongon, sonai ma masa bani rumah ni halak pargeduk, anjaha sonai do ianan ni halak na so mananda Naibata.”