Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 “Ia jolma na dob tubuh humbani naboru, otik do umurni, tapi buei do hasunsahanni.
2 Songon bunga-bunga do ia pondang, dob ai melus, songon halinoh do parmagouni, seng dong hatotaponni.
3 Hape pala ma tatapon-Mu jolma na sonai ai, anjaha iboan Ham ia hu paruhuman, hu lobei-Mu?
4 Ise ma na boi parohkon sada halak na pansing humbani na mabutak? Sahalak pe lang dong.
5 Halani domma binuhul ari-arini, anjaha itotapkon Ham bilangan ni bulanni, ibahen Ham balogni, na so bulih sidiparanni,
6 padaoh Ham ma panonggor-Mu hun bani, ase jumpahan hasonangan ia, ase tarhamalaskonsi ari-arini songon halak gajian.
7 Adong ope siarapkonon bani hayu, age domma iroboh, martumbor do use, anjaha seng maronti martunas.
8 Age pe domma matua uratni ibagas tanoh, anjaha matei pe tutuhoni,
9 mintor martunas do use dobkonsi hona bah, anjaha manranting use songon na baru sinuan.
10 Tapi mateihonsi jolma in, lanjar tibal sonin, anjaha rotapkonsi hosahni, huja be ia?
11 Songon bah na manguap hun tao, songon binanga na marsik anjaha horah dobni.
12 Sonai ma modom manisia, seng be puho, sadokah adong ope langit seng bodak be ia, atap puho humbani na modom.
13 Ambit ra ma namin Ham mamonopkon ahu i nagori toruh, iondingkon Ham ahu paima mombun ringis-Mu, anjaha ibahen Ham namin buhulni bangku, dob ai mardingat Ham use bangku.
14 Anggo matei sada jolma, tumaram ma ia manggoluh? Ambit tongon sonai, marpangarapan do ahu bani ganup ari-ari ni paruntolonku, paima roh ari ni haluahonku.
15 Anggo mardilo Ham mintor balosanku do Ham, tontu siholan Ham bani jadi-jadian ni tangan-Mu.
16 Jadi bilangan-Mu ma langkah-langkahku, tapi seng pardiateihonon-Mu dousangku.
17 Domma tartokan panlanggaronku ibagas ranjut, anjaha irungkub Ham do hajahatonku.
18 Tapi maningon marumbak do age dolog, anjaha dolog batu mosor humbani iananni,
19 mangkaturtur batu ibahen bah, anjaha bah marbanggal mangayubkon tanoh; sonai do iparseda Ham pangarapan ni jolma in.
20 Ipatunduk Ham do ia ronsi sadokah ni dokahni, gabe salpu ia, ipaubah Ham do bohini, dob ai ipalaho Ham ia.
21 Marmulia pe anakni, seng ipabotoh-botoh, gabe madorun pe sidea, seng iahapkon.
22 Pitah borit ni angkulani mando iahapkon, pasal ia tumang mando itangipkon tonduyni.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA