Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Mula tubuhku nari pe, manusia la ergegeh dingen kote. Gendek-gendek ngenca umurna, tapi dem kesusahen dingen si mesera.

² Desken rudang-rudang kap manusia, pedas terlak, pedas ka permelusna. Desken awih-awih permasapna, asa lalap bene ia.

³ O Dibata, nggit kin Kam natap aku? Ntah pe maba aku ku PengadilenNdu?

⁴ Banci kin turah si mehuli i bas kalak si meluat nari?

⁵ Umur manusia nggo leben ItetapkenNdu, beligan bulanna pe nggo tertentu. Nggo IgariskenNdu batas geluhna, janah lanai banci ikeparina.

⁶ Ulanai pernehen ia, pelepas ia ersenang-senang; gelah banci meriah akapna seh dahinna si mberat nggo dung.

⁷ Man kayu si itabah, pengarapen lit denga; sabap kedungenna reh dinga tunasna.

⁸ Reh tuana gia uratna, dingen i teruh taneh macik tongkehna,

⁹ tapi kenca kena lau, mulihi ia ertunas bagi sinuan-sinuan mbaru.

¹⁰ Tapi adi mate manusia, nggo dung kerajangna. Mutus kesahna, ku ja dage ia?

¹¹ Bagi lau i bas telagah reh urakna, bagi lau anak ngersap dingen kerah dungna,

¹² bage me manusia si nggo mate, asa ndigan pe lanai ia keke. Lanai ia keke kidekah langit lit denga, kenca nggo medem, lanai ndigan pe ia medak.

¹³ I bas doni kalak matelah buniken aku, bunikenlah, seh nggo lepas RawaNdu. Jenari tetapkenlah sada paksa si tertentu, i ja IingetNdu ka mulihi aku.

¹⁴ Kenca mate manusia, banci kin ia nggeluh ka? Wari ku wari aku tertima-tima, seh lepas paksa kesusahenku enda.

¹⁵ I je kualoi me Kam, sanga aku IlebuhNdu. Tedeh AteNdu aku, bekas TinepaNdu.

¹⁶ Emaka IperdiatekenNdu perjingkangku, tapi lanai IbeligaiNdu dosa-dosangku.

¹⁷ IalemiNdu salahku janah IpedauhNdu. Kerina kelepaken si nggo kubahan IsasapkenNdu.

¹⁸ Lit pagi paksana deleng-deleng meruntuh, janah lingling batu pe pindah;

¹⁹ batu-batu reh nipesna ikiskis lau, janah udan meder ngombakken taneh. Bage me pengarapen manusia IbenaiNdu.

²⁰ Kedungenna, ItalukenNdu ia, emaka asa lalap masap me ia. Sambar ayona, tupung ipelawesndu ia.

²¹ Anak-anakna jadi kalak si ermulia, tapi si e la itehna; janah adi anak-anakna jadi meluat, la lit kalak si meritakenca man bana.

²² Si mesui dagingna saja ngenca igejapna, atena ceda saja ngenca inanamina."