Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ri anjo wattua sikamma buku-bukunna karaeng-karaenga kammayatompa pamarenta-pamarentaya ri Yehuda, kammayatompa buku-bukunna sikamma imanga, na’bi-na’bia, siagang pandudu’na Yerusalem maraenga, lanipasuluki battu ri jera’na ke’nanga,
2 teai untu’ nipasse’re nampa nitarawang ammotere’, passangalinna untu’ nibalang parekang ri buttaya sangkamma loro. Sikamma buku-bukunna anjo taua latassiaraki ri dallekanna mataalloa, bulanga siagang sikamma bintoeng napareka rewata ke’nanga, nangaia, nalayania, nasombaya, siagang napappalakkia pitunju’.
3 Na sikamma tau attallasaka ija battu ri anne bansa ja’dalaka, le’baka Kupasiara’ mange-mange, lala’bi erokangngangi matea kala attallasaka. INakke, Batara Kaminang Koasaya, anne akkana."
4 Nasuroa’ Batara ampaui anne kammaya mae ri umma’Na, "Punna tu’guru’ taua, tantu lambangungi nai’ ammotere’, siagang punna sala oloangi taua, tantu lammotereki mae ri oloang annabaya.
5 Mingka angngapa naikau, ummakKu, tulusu’ ammengkanu siagang tulusu’ a’bokonu ri Nakke? Anna’gala’ jarrekko mae ri barhalanu, siagang taerokako ammotere’ mae ri Nakke!
6 Kupilangngerimi baji’-baji’, mingka tena nu’bicara ri siratannaya. Tena manna sitau battu ri kau assesse’ lalang lanri panggaukang ja’dala’na. Tena nia’ angkana, ‘Apa kasalangku?’ Yangasengko poro amminawangko ri oloang pangngainnu rapang jarang a’bakkaya antama’ ri pa’bundukanga.
7 Manna kondoa naassenji nikanaya ammotere’; bukkuruka siagang jangang-jangang pinisika, kammayatompa pune-punea naassengi wattu pa’lettekanga battu ri tampa’na. Mingka ikau, ummakKu, tanuassengai hukkung-hukkung Kupassareanga mae ri kau.
8 Barani tojengko nukana kalennu cara’de’, siagang nuassengi hukkung-hukkungKu! Cinissai antekamma batena anjo hukkung-hukkungKu nipinra ri panrita-panrita agamaya, a’jekkoa pa’mai’na.
9 Sikamma tau cara’de’ niaka ri tangnga-tangnganu lanipakasiriki. Lamatei akkala’na ke’nanga siagang lanaallei sikko’. Taerokai ke’nanga ampilangngeri pappakaingakKu; kamma-kamma anne, kacara’dekang apa mami nia’ ri ke’nanga?
10 Lanri kammana anjo, laKupassareangi kokonna ke’nanga mae ri tau maraenga, kammayatompa bainenna ke’nanga lanipassareang tongi mae ri tau maraenga. Yangasenna ke’nanga, ca’di lompo, massing kaparalluang kalenna naboya, iamintu cara-cara tenaya nalambusu’ napake. Ba’lalo manna na’bia siagang imanga annipu tongi tau.
11 Bokka’-bokka’na ummakKu nakanai bokka’ ca’di bawang. Nakana ke’nanga, ‘Ah, tenangngapa-apa. Baji’ ngasenji siagang amanji.’ Nampa sikontutojenna tena nakamma.
12 He ummakKu, mustina siri’-sirikko lanri le’ba’na ngaseng nugaukang anjo apa tuna kammaya! Mingka kapala’ rupako siagang tena siri’-siri’nu. Lanri kammana anjo latu’gurukko sangkamma tau maraeng le’baka tu’guru’; cappu’mi riwaya’nu punna Kuhukkungko.
13 Ero’ duduA’ ampasse’rei ummakKu rapang tau ampasse’reai wassele’ buttana. Mingka, ummakKu rapangi poko’ anggoro’ siagang poko’ ara tenaya rapponna, ba’lalo manna leko’na kalumeng ngasemmi. Iaminjo saba’na naKukellaimo bansa maraenga battu siagang nakoasai pa’rasanganna ke’nanga. INakke, Batara, anne akkana."
14 Nakana umma’Na Allata’ala, "Angngapa natena apa-apa nigaukang? Umba nakissama-sama a’lili mange ri kota-kota niaka pattahanganna, lappassang maki’ anjoreng mate. Le’ba’mi Natappuki Karaeng Allata’ala, angkanaya musti panrakki’. Le’ba’ maki’ Nasare racung untu’ niinung lanri dorakaki’ mae ri Ia.
15 Tena matu-matunta ma’minasa ri kaamangngang siagang ri pammolleang, nasaba’ ia niaka sangnging katerassang.
16 Nia’mi musua ri kota Dan; kalangngerammi sa’ra jaranna ke’nanga, na sikontu bonena pa’rasanganga a’jari malla’ ngasemmi. Battumi musua untu’ angngancuruki sikontu pa’rasanganta, kammayatompa sikontu kota-kotata siagang sikontu pandudu’na."
17 Nakana Batara, "Parhatikangi! Kamma-kamma anne appabattuA’ ulara’-ulara’ antama’ ri tangnga-tangnganu untu’ ampittokko, iamintu ulara’ a’racunga tenaya nakkulle nipitabai baca-baca."
18 Rapangi nie’ba’ atingku na pacce, susa tena balleanna.
19 Pilangngeri! Rassi sikontu pa’rasanganga piraunna bansaku akkuta’nang angkana, "Tenakami Batara ri Sion? Kemae karaenna kamma-kamma anne?" Appiali Batara, Karaenna ke’nanga, angkana, "Angngapa nusu’ju’ ri rewata-rewataya ia tena sikalia matu-matunna? Angngapa nupa’risi nyawaKu lanri anynyombanu ri barhala-barhalaya?"
20 Akkioki umma’ Israel angkana, "Wattu pakkattoang siagang wattu timoroka allalomi kamma-kamma anne, mingka tena tongngijapa nisalama’."
21 Ancuruki pa’maikku lanri garring lompoi bansaku; susama’ nakulussa’.
22 Apa kutadeng lanrinna nasa’genna kamma-kamma anne tena memampa nammolle bansaku? Maka tenamo dottoro’ yareka pa’balle ri sikontu Gilead?
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA