Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Yuswana Zedekiya salekor taon e bakto jumenneng rato Yehuda. Salerana marenta e Yerusalim sabellas taon abidda. Asmana ebuna Hamutal, pottrana Yeremiya dhari kottha Libna.
2 Rato Zedekiya padha ban Rato Yoyakim dusa keya ka PANGERAN.
3 PANGERAN ce’ dukana ka pandhudhu’ Yerusalim ban ka oreng Yehuda sampe’ reng-oreng jareya eojuk ban ta’ eparenge pangaoban pole. Zedekiya aberonta’ ka Nebukadnezar rato Babil,
4 daddi Nebukadnezar ban sakabbinna angkadan perrangnga entar ka Yerusalim, nyerrang kottha jareya e tanggal sapolo bulan sapolo taon se kapeng sanga’ pamarenta’anna Zedekiya. Oreng Babil jareya maddek markas e lowarra kottha, sarta maddek geddhung pangeppongan
5 sarta terros ngeppong kottha jareya sampe’ taon se kapeng sabellas pamarenta’anna Zedekiya.
6 E tanggal sanga’ bulan empa’ taon jareya keya, e bakto babaja kalaparan la ce’ sarana sampe’ ra’yat ta’ andhi’ pa-apa sakale se ekakana,
7 geddhungnga kottha jareya epagujur bi’ moso. E malem jareya, maske kottha ekeppong bi’ oreng Babil, tantara Yehuda buru kabbi ka Cora Yordan. Se buru lebat bun-kebbunanna karaton, pas kalowar lebat labang saketheng se daddi panyambungnga geddhung se dhadhuwa’ e kennengngan jareya.
8 Tape Rato Zedekiya jareya eserser bi’ tantara Babil, ban ekenneng pega’ e Tana Lapang Yerikho. Sakabbinna oreng se noro’ Rato Zedekiya jareya buru kabbi, ratona edina’agi.
9 Saellana jareya Rato Zedekiya egiba ka Rato Nebukadnezar e kottha Ribla e dhaera Hamat, laju eokom mate.
10 E kottha jareya keya tra-pottrana epate’e e ajunanna, bariya keya para pangrajana pamarenta Yehuda.
11 Samarena jareya Zedekiya econgke’ socana, ekalenthong, pas egiba ka Babil. E jadhiya epamaso’ ka penjara, ban ta’ epakalowar pole dhari jadhiya sampe’ sedana.
12 E tanggal sapolo bulan lema’ taon se kapeng sanga’ bellas pamarenta’anna Nebukadnezar rato Babil, badha oreng se anyama Nebuzaradan rabu ka Yerusalim. Nebuzaradan jareya panasehadda ban pangawal pribadhina Nebukadnezar.
13 Nebuzaradan ngobbar Padalemman Socce, karatonna rato, ban bengkona reng-oreng raja e Yerusalim.
14 Saellana jareya reng-orengnga Nebuzaradan jareya magujur dhung-geddhungnga kottha jareya.
15 Samarena jareya ra’yat se gi’ badha e kottha, iya reya karena kang-tokang se ahli, reng-oreng mesken ban reng-oreng se buru ka oreng Babil, laju eangko’ ka Babil kabbi bi’ Nebuzaradan.
16 Tape sabagiyan dhari ra’yat se talebat mesken ban ta’ andhi’ pa-apa, edina e Yehuda, esoro agarap kebbun anggur ban gal-teggal.
17 Ga-cangga paronggu ban ta-kareta e Padalemman Socce sarta mong-cemmong parongguna epabella bi’ oreng Babil, parongguna pas eangko’ ka nagarana dibi’ kabbi.
18 Reng-oreng Babil ngeba rang-barang laenna keya, iya areya; kop-sekkop baddhana abuna mezba, pakakassa damar, bung-jembung panadha’anna dharana keban se esambelli kaangguy kurban, bung-tobung pangobbaranna dupa ban rang-barang paronggu laenna se eangguy e dhalem opacara kabakteyan.
19 Rang-barang dhari emmas ban salaka, tamaso’ bung-tobung kene’ baddhana mardha, bung-jembung baddhana dharana keban se esambelli kaangguy kurban, baddhana abu, ko’-tongko’na damar, bung-tobung kaangguy dupa, bung-jembung panyelenanna aeng anggur, kabbi ekala’ Nebuzaradan dibi’.
20 Rang-barang paronggu se ebadhi Rato Sulaiman kaangguy Padalemman Socce, iya reya cangga se dhadhuwa’, ta-kareta, cemmong ban sape se dhubellas meggi’ se egabay panongko’anna cemmong jareya, kabbi ce’ berra’na, sampe’ ta’ ekenneng tembang.
21 Cangga paronggu se dhadhuwa’ jareya padha: tenggina padha ballu meter, bunterranna padha lema’ koma tello’ meter, e dhalemma padha gurpong. Kandella parongguna padha pettong polo lema milimeter. E attassa padha badha thol-pentholla se tenggina padha dhuwa’ koma dhuwa’ meter. E sakalenglengnga thol-pentholla cangga jareya badha anggi’anna se erengga bi’ buwana dalima, padha dhari paronggu keya.
22 (52:21)
23 Buwana dalima e dhalem anggi’an jareya bannya’na padha saratos meggi’ ebang, tape se etangale dhari baba pera’ sangang polo ennem meggi’.
24 Laen dhari jareya Nebuzaradan nangkep Imam Agung Seraya, Zefanya bakkella, panjagana Padalemman Socce katello,
25 panasehat pribadhina rato se kapetto se gi’ badha e kottha, panglima, bakkella panglima se ngoros administrasina tantara, ban pangraja laenna sabidak oreng.
26 Reng-oreng jareya kabbi egiba ka Rato Nebukadnezar se badha e kottha Ribla,
27 e dhaera Hamat. E jadhiya reng-oreng jareya eseksa, pas epate’e. Daddi reng-oreng Yehuda eangko’ dhari nagarana egiba ka pambuwangan;
28 kabbi badha pa’ ebu nem atos oreng. Bi’ Nebukadnezar reng-oreng jareya eangko’ epadaddi pan-barampan kale, iya reya: tello ebu tello lekor oreng e taon se kapeng petto’ pamarenta’anna, ballung ratos tello polo dhuwa’ oreng dhari Yerusalim e taon se kapeng ballu bellas pamarenta’anna, ban pettong ratos pa’ polo lema’ oreng eangko’ bi’ Nebuzaradan e taon se kapeng tello lekor pamarenta’anna Nebukadnezar.
29 (52:28)
30 (52:28)
31 E tanggal sagame’ bulan dhubellas e taon se kapeng tello polo petto’ saellana Yoyakhin egiba ka pambuwangan, Ewil-Merodak jumenneng rato Babil. E taon jareya keya rato buru noduwagi kabellasanna ka Yoyakhin; Yoyakhin epakalowar dhari penjara,
32 sarta’anna Ewil-Merodak noduwagi kabecce’anna ka Yoyakhin. Yoyakhin eparenge pangkat se atenggiyan dhari to-rato laenna se padha ebuwang ka Babil,
33 pas eedine asalen rasogan, ta’ epangagem kalambi penjara, ban molae dhari bakto jareya saterrossa eedine adha’ar e karaton, ban sabban are eparenge pesse kaangguy kaparlowan ren-arenna.
34 (52:33)
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA