Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 E bakto Nebukadnezar rato Babil maambu Yoyakhin pottrana Yoyakim se jumenneng rato, Zedekiya pottrana Yosiya laju eangkat epadaddi rato Yehuda.
2 Tape Zedekiya ban ja-pangrajana sarta ra’yadda ta’ atoro’ ka dhabuna PANGERAN se eparengngagi kalaban parantara’anna sengko’.
3 Rato Zedekiya makon Yukhal ana’na Selemiya, ban Imam Zefanya ana’na Ma’aseya, entar menta ka sengko’ sopaja sengko’ nyo’onnagi ka GUSTE Allah kaangguy kaparlowanna bangsa.
4 E bakto jareya sengko’ gi’ ta’ epamaso’ ka penjara ban gi’ ngenneng bebas arapa’a bai e antarana ra’yat.
5 Tantara Babil teppa’na ngeppong Yerusalim, tape e bakto ngedhing ja’ tantara Messer la mangkat dhari Messer aperranga, reng-oreng jareya laju nyorot.
6 PANGERAN, Allahna Isra’il, makon sengko’
7 ngoca’ kantha reya ka otosanna Rato Zedekiya, "Atorragi ka Zedekiya kantha reya, ‘Tantara Messer teppa’na mangkat dha’ enna’ se nolongana ba’na, bakal abaliya ka Messer.
8 Oreng Babil pas bakal dhatengnga dha’ enna’ pole, nyerranga kottha reya, kottha reya bakal epakala’a ban eobbara.
9 Sengko’, PANGERAN, maenga’a ka ba’na sopaja ba’na ja’ nepo aba’na dibi’ kalaban apekker ja’ oreng Babil la ondur ban ta’ kera abali pole. Sabab oreng Babil masthe abali.
10 Saompamana ba’na bisa makala sakabbinna tantara Babil sampe’ se odhi’ pera’ kare reng-oreng se loka sara e dhalem mah-kemahna, re-karena oreng Babil jareya bakal jaga’a pole, ngobbara kottha reya sampe’ tadha’ karena.’"
11 Tantara Babil nyorot dhari Yerusalim polana tantara Messer dhateng nojju ka kottha jareya.
12 Daddi sengko’ mangkat dhari Yerusalim entara ka dhaerana Benyamin polana narema’a bagiyan sangkolan dhari tana andhi’na kalowarga.
13 Tape e bakto sengko’ napa’ ka Labang Sakethengnga Benyamin, komandanna tantara se ajaga e jadhiya nahan sengko’, pas ngoca’ kantha reya, "Sampeyan buruwa ka oreng Babil!" (Parwira jareya nyamana Yeriya, ana’na Selemiya, kompoyya Hananya.)
14 Sengko’ nyaot, "Bunten, sampeyan kalero! Kaula ta’ buruwa ka moso." Tape Yeriya ta’ endha’ ngedhingngagi. Sengko’ etangkep pas egiba ngadhep ka ja-pangrajana pamarenta.
15 Ja-pangraja jareya ce’ peggella ka sengko’, ban marenta’agi sopaja sengko’ epokole sarta ekorong e bengkona Yonatan, sekettarissa nagara. Bengko jareya la ekagabay penjara.
16 Sengko’ emaso’agi ka dhalem taman e babana tana, sarta etahan e jadhiya sampe’ abit.
17 Saellana jareya Rato Zedekiya makon oreng ngeba sengko’ ngadhep ka salerana e karaton. E jadhiya rato tek-ngetek ban ta’ asa’-kasa’ mareksane ka sengko’ apa badha sen-pessen dhari PANGERAN. "Badha," ca’na sengko’. Saellana jareya sengko’ pas mator pole, "Junandalem badhi epassra’agiya ka rato Babil."
18 Samarena ngoca’ kantha jareya sengko’ atanya, "Ponapa kajahadan abdidalem ka junandalem otabana ka ja-pangrajaepon junandalem otabana ka ra’yat, me’ daddi abdidalem sareng junandalem epamaso’ ka penjara?
19 Ka’imma bi-nabbiepon junandalem se ngoca’ ja’ rato Babil ta’ kera nyerrang junandalem sareng nagara ka’dhinto?
20 Samangken, Guste se molja, kasokana junandalem meyarsa’agi parnyo’onan abdidalem ka’dhinto. Junandalem ja’ makon oreng mamaso’ abdidalem ka penjara e compo’epon Yonatan ka’dhissa’ pole, dhaggi’ abdidalem mate e ka’issa’."
21 Daddi Rato Zedekiya marenta’agi sopaja sengko’ epenjara e palataranna karaton. Daddi sengko’ pas enneng e jadhiya, ban sabban are eberri’i roti dhari kennengnganna panggabayanna roti, sampe’ parsadhiya’anna roti saantero kottha jareya obus kabbi tadha’ karena.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA