Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nakana Batara, "Lanarapi sallang wattunna naKua’jari Allata’ala mae ri sikontu suku Israel, siagang ke’nanga a’jari ummakKu.
2 Ri parang lompoa Kupappicinikang pangngamaseangKu mae ri ke’nanga, ta’lappasaka battu ri kamateanga. Ri wattunna a’boya umma’ Israel kasannangngang,
3 battu bella Kupappicinikangi KalengKu mae ri ke’nanga. He umma’ Israel, battu rioloji naKukamaseangko, siagang situlusu’na tuli laKupicinikiangko angkanaya tuli mangngamaseangA’ mae ri kau.
4 Bansanu laKupa’jari porei sangkamma riolo. Sikalipi pole langngalleko rabana, siagang a’jogekko napakamma rannu.
5 Lapparekko koko anggoro’ ri moncong-monconna Samaria, siagang ia a’lamunga lanagappai rapponna.
6 Tojeng, lanarapiki sallang wattunna nasikamma pangawala’na kotaya lakkioki ri pa’monconganna Efraim, angkana, ‘Umba kinai’ ri Sion, mange ri Karaeng Allata’alata.’"
7 Nakana Batara, "Akkelongko a’rannu-rannu untu’ Israel, ummakKu — bansa makase’rea ri sikontu bansaya Akkelongko kelong-kelong pammuji, siagang kabarrangi, angkana: ‘Le’ba’mi Napasalama’ Batara niaka tassesa battu ri umma’Na.’
8 Battu wara’ Kuerang ke’nanga ammotere’; Kupasse’rei ke’nanga battu ri cappa’-cappa’na buttaya. Tau butaya siagang tau pesoka lamminawangi ri ke’nanga, kammayatompa baine beru ammanaka siagang tianang salloamo. Labattu ngasengi ke’nanga ammotere’ jai sipa’gangngang mae anrinni ri pa’rasanganga.
9 A’jappai ke’nanga nammatti’ je’ne’ matanna, Kusaleori siagang Kururungangi ke’nanga. Kuerangi ke’nanga allalo ri tampa’-tampa’ jaia je’ne’na, allalo ri agang lappara’ tenaya nakkulle tatto’ro ke’nanga. INakke rapang mangge mae ri Israel; Efraim ana’ bura’ne bungasakKu."
10 Nakana Batara, "Pilangngeri he bansa-bansaya! Pabattu pasangKu mae ri ba’leanna tamparanga: UmmakKu le’baka Kupasisa’la’-sa’la’ laKupasse’rei na Kuparakai rapang pakalawaki anjagai gimbala’na.
11 Le’ba’mi Kupasalama’ umma’ Israel, siagang Kulappassang battu ri bansa kassaka.
12 Labattui ke’nanga mange ri Bulu’ Sion accaya nicini’ rupanna, akkelong a’rannu-rannu lanri sikontu passareKu mae ri ke’nanga, iamintu gandung, minynya’, anggoro’, sapi siagang gimbala’. Rapang ke’nanga koko ga’ga gannaka ri je’ne, siagang tena kakurangang apa-apa.
13 Ri anjo wattua la’jogeki tau loloa assannang-sannang pa’mai’. Tau toaya siagang tau rungkaya para lamate’ne ngasengi pa’mai’na, nasaba’ iNakke lassaleori ke’nanga. Susana ke’nanga Kupinrai a’jari karannuang, Kupinrai si’naya a’jari mate’ne.
14 Sikamma imanga Kupassukkuki ganna’na siagang kanre-kanreang; siagang sikontu ummakKu ia parallua laKusarei. INakke, Batara, anne akkana."
15 Nakana Batara, "Ri Rama nia’ kalangngerang sa’ra karru’, siagang kunrareng napakamma pacce. Rahel angkarruki ana’-ana’na, taerokai nisaleori lanri tena ngasemmi ke’nanga.
16 Pammari karru’nu, lu’luki je’ne matannu! Tena nalasia-sia posonu mae ri ana’-ana’nu. Lania’ passawallang mae ri kau, ana’-ana’nu ammotereki battu ri pa’rasanganna musua.
17 Nia’ panrannuang mae ri kau ri allo labattua; ana’-ana’nu lammotereki mange ri pa’rasanganna.
18 Kulangngereki umma’ Israel a’bicara lalang kapacceang, angkana, ‘O Batara, ikambe rapammi olo’-olo’ tenayapa nipa’jari annabai mingka Kilati ummatTa untu’ mannuruki, na kamma-kamma anne sadiami ikambe untu’ ammotere’ mae ri Katte. Jari, erammi ikambe ammotere’, o Batara, Allata’alana ikambe.
19 Le’baki ma’boko ikambe mae ri Katte, mingka assesse’lalammi ikambe ri gau’ kammana anjo. Ri le’ba’namo Kihukkung ikambe, ta’dundumi ulunna ikambe napakamma si’na. Siri’-siriki ikambe siagang a’jari tunai lanri dorakanamo ikambe ri wattu rungkana.’
20 Israel, ikau ana’ nisayangKu, ana’ Kungaia, bua atingKu. Punna Kuancangko tuli nakkuKa’ Kumangngu’rangi ri kau. LaKugaukanga mae ri kau iamintu Kukamaseang sikaliko.
21 Batei agang-aganga, tannangngi tanra-tanraya boyai agang nuoloa riolo. He, Israel, ammotere’ mako! Ammoterekko mange ri kota-kotanu rioloa.
22 Siapapi sallonu tuli ranggasela, he bansa tenaya namajarre’ ri Nakke? Appa’jariMa’ apa beru ri lino, apa appakalannasaka — rapang baine nila’langngi ri bura’ne."
23 Batara Kaminang Koasaya, iamintu Allata’alana Israel, nakana, "Punna le’ba’mi Kupa’jari pore ummakKu sangkamma riolo, ri pa’rasangang Yehuda siagang ri desa-desana nia’ nilangngere’ tau lakkana, ‘Dasi-dasi naNabarakkaki Batara bulu’ matangkasaka ri Yerusalem tampa’ pammantangngang matangkasaka untu’ KalenNa.’
24 Lammantangi taua ri Yehuda siagang ri desa-desana. Anjoreng lania’ pamarri siagang tummarakai olo’-olo’ sapi siagang gimbala’.
25 Ia mangnganga laKupakabajiki pakkasia’na, siagang ia posoa lanri cipuru’ laKupakabassoroki.
26 Anjo wattua lakkanai taua, ‘Le’bakku tinro jannang, baji’mi pakkasiakku.’
27 INakke, Batara, angkana labattui wattunna pa’rasangang Israel siagang Yehuda laKupirassi tau siagang olo’-olo’.
28 Kamma riolo Kujagai ke’nanga sollanna sallang Kubi’buki, Kuruntungi siagang Kuancuruki ke’nanga, kamma tomminjo laKujagai ke’nanga sollanna Kubangung siagang Kupakajarre’ ke’nanga ammotere’.
29 Ri anjo wattua tenamo tau lakkana, ‘Tau toaya angnganre rappo kacci, na giginna ana’na tilu nasa’ring,’
30 Passangalinna inai-nai angnganre rappo kacci, ia todong kalenna latilu nasa’ring giginna. Tunggala’ taua lamatei lanri dosa kalenna."
31 Nakana Batara, "Lanarapiki sallang wattunna naKuppare’ parjanjiang beru siagang umma’ Israel siagang Yehuda.
32 Mingka anjo parjanjianga tena nasangkamma parjanjiang Kupareka siagang boe-boena ke’nanga ri wattunna Kururungang assulu’ ke’nanga battu ri Mesir. Manna pole Kurapang bura’nenna ke’nanga, mingka nadakkai ke’nanga parjanjiangKu siagang ke’nanga.
33 Iaminne parjanjiang beru laKupareka siagang umma’ Israel: Hukkung-hukkungKu laKuboliki ri ati mailalanna ke’nanga, Kutulisiki ri pa’mai’na ke’nanga. INakke la’jari Allata’alana ke’nanga, siagang ke’nanga la’jari ummakKu.
34 Tenamo naparallu se’rea tau ri ke’nanga langngajaraki paranna tau untu’ angngassengi Batara. Nasaba’ yangasenna ke’nanga, lompo ca’di, lanaasseng ngasengA’. LaKukaluppai kasalang-kasalanna ke’nanga, laKupammopporangi dosa-dosana ke’nanga. INakke, Batara, anne akkana."
35 Mataalloa Napasadiai Batara untu’ a’jari singara’ ri wattu allo; bulanga siagang sikamma bintoenga untu’ ansingari bangngia. Nagoccangi tamparanga sa’genna a’rere bombanga, Batara Kaminang Koasaya, iaminjo arenNa.
36 A’janji Batara, angkana, "Lalang tenana natappinra hukkung pakkalinoanga tuli lania’na todong Israel salaku bansa.
37 Ebara’ angkana nia’ se’re wattu nakkulle niukkuru’ langika, siagang akkulle nisalidiki dapara’na rawa buttaya, iaminjo wattua nalaKusorongboko Israel lanri sikontu panggaukang ja’dala’na ke’nanga. INakke, Batara, anne akkana."
38 Nakana Batara, "Lanarapiki sallang wattunna sikontu Yerusalem lanibangungi ammotere’ a’jari kotaKu, battu ri Menara Hananeel sa’genna Pakke’bu’ Lompo Panyingkuluka.
39 Battu anjorengi garisi’ pa’baeng-baenna tattuju mange ri Bulu’ Gareb, nampa a’lekko mange ri Goa.
40 Sikontu anjo ka’bung lapparaka, nipakea a’jari pa’jerakkang siagang tampa’ pammelakkang loro, kammayatompa sikontu kokoa ri birinna Binanga Kidron sa’genna mange ri Pakke’bu’ Lompo Jarang a’lampa anrai’, lanisa’laki untu’ iNakke. Kota Yerusalem tenamo nalaniruntungi yareka tenamo nalaniancuruki."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA