Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ta’ abit saellana Zedekiya pottrana Yosiya jumenneng rato Yehuda, bi’ PANGERAN sengko’ epakon

² agabay le-tale dhari kole’ ban kol-pekol dhari kaju se pas epakon pasang ka tang le’er.

³ Sengko’ eotos keya manapa’ dhabuna ka to-rato Edom, Mo’ab, Amon, Tirus ban Sidon, kalaban parantara’anna otosanna to-rato jareya se padha dhateng ka Yerusalim nyabisa ka Rato Zedekiya.

⁴ Sengko’ kodu abala ka reng-oreng jareya ja’ PANGERAN Se Mahakobasa, Allahna Isra’il, adhabu kantha reya,

⁵ "Kalaban Tang kakobasa’an se raja ban Tang kakowadan Sengko’ nyepta’agi langnge’ ban bume ban manossa sarta samacemma keban se bi’ Sengko’ ebagi ke sapa’a bai se ekasoka’e Sengko’.

⁶ Sengko’ se massra’agi sakabbinna bangsa reya ka dhalem kakobasa’anna Tang abdi, Nebukadnezar, rato Babil. La’-mala’ maske keban bi’ Sengko’ ebagi ka rato jareya esoro kobasane.

⁷ Sakabbinna bangsa bakal ngabdiya ka rato jareya, ka ana’na ban ka kompoyya sampe’ napa’ baktona nagarana dibi’ gaggar. E bakto jareya bangsa Babil bakal ngabdiya ka sa-bangsa se kowat ban to-rato se raja.

⁸ Bangsa otabana karaja’an se ta’ endha’ atellok ka Nebukadnezar bi’ Sengko’ eokoma ban paperrangan, kalaparan sarta wabah panyaket, sampe’ dhi-budhina bangsa jareya atellok ka rato jareya.

⁹ Ja’ edhingngagi ca-cana bi-nabbi otabana sapa’a bai se alarang ba’na atellok ka rato Babil, maske reng-oreng jareya ngako la narema petodu dhari mempe, roh-erroh alos otabana kalaban ngangguy kakowadan gaib.

¹⁰ Reng-oreng jareya co-ngoco ba’na sampe’ ba’na egiba ka jauna dhari nagarana. Sengko’ ngojuga ba’na dhari nagarana ban ba’na bakal tompessa.

¹¹ Tape bangsa se endha’ atellok ban endha’ ngabdi ka rato Babil bi’ sengko’ epannengnga enneng e tana asalla dibi’, ban atane e jadhiya. Sengko’, PANGERAN, la ngoca’."

¹² Ka Zedekiya rato Yehuda, sengko’ abala kantha jareya keya. Ca’na sengko’, "Ngereng atellok ka rato Babil. Toro’ parentana rato gapaneka sareng ngabdi ka bangsana, sopaja junandalem salamedda.

¹³ PANGERAN ampon adhabu ja’ bangsa se ka’dhimma’a saos se ta’ poron atellok ka rato Babil badhi epamateya polana paperrangan, kalaparan sareng wabah panyaket. Aponapa junandalem sareng ra’yat me’ meleya pate se sapaneka?

¹⁴ Ja’ peyarsa’agi bi-nabbi se alarang junandalem atellok ka rato Babil, sabab bi-nabbi gapaneka co-ngoco junandalem.

¹⁵ Reng-oreng gapaneka ngoca’ epakon PANGERAN manapa’ caca gapaneka, namong lecek. Pangeran dibi’ se adhabu ja’ ta’ ngotos reng-oreng gapaneka. Daddi PANGERAN badhi mabalessadana sareng mateyana junandalem sareng bi-nabbi se acaca lecek ka junandalem gapaneka."

¹⁶ Saellana jareya sengko’ malae mam-imam ban sakabbinna ra’yat ja’ PANGERAN adhabu kantha reya, "Ja’ edhingngagi bi-nabbi se ngoca’ ja’ ta’ saapa pole abidda rang-barang e Tang Padalemman epabaliya dhari Babil. Bi-nabbi jareya lecek!

¹⁷ Ja’ edhingngagi! Mara atellok ka rato Babil, me’ olle ba’na salamet. Arapa’a kottha reya me’ epaancora?

¹⁸ Mon reng-oreng jareya pajat nabbi, ban narema pessen dhari Sengko’, tanto sateya reng-oreng jareya menta ka Sengko’, PANGERAN Se Mahakobasa, sopaja rang-barang se gi’ badha’ e Tang Padalemman ban e karatonna rato e Yerusalim rowa ta’ sampe’a eangko’ ka Babil.

¹⁹ Sabab Sengko’, PANGERAN Se Mahakobasa, Allahna Isra’il, la motossagi ja’ rang-barang jareya kabbi eangko’a ka Babil, ban bakal pagguna badha e jadhiya sampe’ Sengko’ mekkere rang-barang jareya pole. E bakto jareya buru bi’ Sengko’ egiba’a abali ka kennengngan reya. Sengko’, PANGERAN, la ngoca’." Rang-barang se gi’ badha e Padalemman Socce jareya iya reya, ga-cangga, cemmong paronggu, ta-kareta, ban pan-barampan barang laen andhi’na Padalemman Socce. Rang-barang jareya ta’ noro’ egiba ka Babil e bakto Yoyakhin pottrana Yoyakim rato Yehuda ban pin-pamimpinna masarakat Yehuda ban Yerusalim egiba ka Babil bi’ Rato Nebukadnezar.

²⁰ (27:19)

²¹ (27:19)

²² (27:19)

Yeremia

Video Yeremia 27

Ikuti Kami:

KONTAK | PARTISIPASI | DONASI