Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Sonon do hata ni Jahowa, “Laho ma ho, boli ma sada botol tanoh humbani sitopa hudon, arahkon ma deba pangintuai ni bangsa in ampa malim situanan.
2 Anjaha luar ma ho hu habungan Ben-Hinnom, na i lambung ni horbangan parsanga-sangaan, anjaha tingtingkon ma ijai hata na sihol patugahon-Ku bam.
3 Hatahon ma, ʻTangihon ma hata ni Jahowa ale raja-raja ni Juda ampa pangisi ni Jerusalem! Sonon do hata ni Jahowa Zebaot, Naibata ni Israel, tonggor ma, parohon-Ku ma hamagouan bani ianan on, gabe mardengeng ma pinggol ni sagala na manangar ai.
4 Halani na tinadingkon ni sidea ai Ahu anjaha ibutaki ianan on, marhitei na manutung dahupa ijon bani naibata na legan, ai ma, na so tinanda ni sidea atap ompung ni sidea atap raja-raja ni Juda pe; anjaha halani igoki sidea ianan on marhitei daroh ni halak na so marpipot,
5 anjaha ipauli ianan panumbahan bani Baal, laho manutung anak ni sidea bahen galangan situtungon bani Baal, ai ma, na so ongga Hutonahkon atap Husahapkon, atap ongga taringat ibagas uhur-Hu;
6 halani ai, tonggor ma, na roh ma ari,ʼ” nini Jahowa, “Lang be goranon ianan on Topet atap habungan Ben-Hinnom, tapi habungan pamunuhon do.
7 Ai gabe na lang do bahenon-Ku hauhuron ni Juda pakon Jerusalem bani ianan on, anjaha marrageian do sidea bahenon-Ku marhitei podang i lobei ni munsuh ni sidea, ampa marhitei tangan ni halak siuhurhon hosah ni sidea; berehonon-Ku do bangkei ni sidea gabe panganon ni manuk-manuk na i awang-awang ampa binatang na i talun.
8 Anjaha bahenon-Ku do huta on gabe hasonggotan ampa siapason; ai ganup na montas hujai tarsonggot do, anjaha manrisai halani haganup hasedaon na mangonai hujai.
9 Papangankonon-Ku do bani sidea daging ni anak ampa boru ni sidea, anjaha ganup sidea marsipangan daging ni hasomanni, sanggah na tarsosak sidea anjaha marhabiaran binahen ni munsuh ni sidea ampa na manguhurhon hosah ni sidea.
10 Jadi bolahkon ma botol tanoh ai i lobei ni halak na rapkon ho ai,
11 anjaha hatahon ma bani sidea, sonon do hata ni Jahowa Zebaot, ʻSonai ma rosakkonon-Ku bangsa on ampa huta on, songon halak na marosakkon hudon ni sitopa hudon, gabe seng tarpauli be.ʼ I Topet ma halak mananom na matei, halani seng dong be panimbunan na legan.
12 Sonai ma bahenon-Ku bani ianan on,” nini Jahowa, “Ampa bani pangisini; songon Topet do bahenon-Ku ianan on.
13 Rumah-rumah na i Jerusalem ampa rumah-rumah ni raja-raja ni Juda maningon pabutakon do songon ianan ni Topet, ai ma haganup rumah, na ongga tayubni ipakei panutungan ni dahupa bani ganup bala ni langit, anjaha iuseihon ijai galangan siinumon bani naibata na legan.”
14 Dob ai mulak ma si Jeremia hun Topet, na pinarayakni ai laho manjahai ijai isuruh Jahowa; jadi jongjong ma ia i alaman ni rumah ni Jahowa, anjaha ihatahon ma bani ganup bangsa ai:
15 Sonon do hata ni Jahowa Zebaot, Naibata ni Israel, “Tonggor ma, parohon-Ku do hu huta on ampa hubani huta na legan haganup hamagouan, na dob Hulumbahon ai, halani ipajogal sidea tangkuhukni, anjaha manjua sidea manangihon hatang-Ku.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA