Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ PANGERAN adhabu ka sengko’,

² "Tetene rat-saradda Tang parjanjiyan bi’ Tang ommat reya. Kabala ka oreng Yehuda ban pandhudhu’ Yerusalim ja’

³ Sengko’, PANGERAN, Allahna Isra’il abasto sapa’a bai se ta’ atoro’ ka rat-saradda Tang parjanjiyan jareya.

⁴ Parjanjiyan jareya bi’ Sengko’ la epabadha ban bangatowana reng-oreng jareya e bakto para bangatowa jareya bi’ Sengko’ egiba kalowar dhari Messer, nagara se padha ban naraka monggu ka reng-oreng jareya. Bangatowana oreng Yehuda ban oreng Yerusalim jareya bi’ Sengko’ esoro ta’at ka Sengko’ ban ajalannagi sabarang se la eparenta’agi bi’ Sengko’. Sengko’ la ngoca’ ka oreng Yehuda ban pandhudhu’ Yerusalim, ja’ mon Tang oca’ etoro’, reng-oreng jareya bakal daddiya Tang ommat ban Sengko’ daddiya Allahna.

⁵ Mon reng-oreng Yehuda ban Yerusalim ajalannagi jareya kabbi, Sengko’ neptebbana Tang janji ka bangatowana reng-oreng jareya, iya reya nagara se landhu ban ma’mor se sateya ekennengnge reng-oreng jareya, bi’ Sengko’ ebagiya ka reng-oreng jareya." Sengko’ nyaot, "Sae, GUSTE."

⁶ PANGERAN laju adhabu ka sengko’, "Kassa’ ba’na entar ka tha-kottha e Yehuda ban ka rong-lorong e Yerusalim. Panapa’ Tang pessen reya ka reng-oreng e jadhiya. Soro reng-oreng jareya ngestowagi ban atoro’ ka rat-saradda Tang parjanjiyan.

⁷ E bakto Sengko’ ngeba bangatowana reng-oreng jareya kalowar dhari Messer, Sengko’ maenga’ epaterrang ka reng-oreng jareya sopaja padha’a ta’at ka Sengko’. Sampe’ sateya Sengko’ gi’ paggun maenga’ Tang ommat ka parkara jareya,

⁸ ban nyoro sopaja reng-oreng jareya ta’at ka Tang parjanjiyan, tape reng-oreng reya ta’ endha’ ngedhingngagi ban ta’ endha’ atoro’. La’-mala’ paggun terros cengkal ban jahat akantha lamba’na. Daddi sakabbinna okoman se kasebbut e dhalem parjanjiyan jareya bi’ Sengko’ eteba’agi ka reng-oreng jareya."

⁹ PANGERAN pas adhabu pole ka sengko’, "Oreng Yehuda ban pandhudhu’ Yerusalim sakongkel alaban ka Sengko’.

¹⁰ Reng-oreng jareya la agabay dusa akantha se elakone bangatowana se ta’ endha’ ta’at ka Sengko’; reng-oreng Isra’il ban Yehuda nyemba lah-illah laen, mongkore parjanjiyan se epabadha Sengko’ bi’ para bangatowana.

¹¹ Daddi Sengko’, PANGERAN, aberri’ parengeddan ja’ Sengko’ madhatengnga balai ka reng-oreng jareya, ban reng-oreng jareya ta’ ngenneng buru dhari balai jareya. Mon reng-oreng jareya aera’ menta tolong ka Sengko’, Sengko’ ta’ ngedhingngagiya.

¹² Reng-oreng Yehuda ban Yerusalim pas menta tolong ka lah-illah laen se esemba aba’na kalaban ngeba tor-ator kurban. Lah-illah jareya ta’ kera bisa masalamet reng-oreng jareya e bakto balai jareya dhateng.

¹³ Lah-illahna oreng Yehuda ce’ bannya’na, padha ban bannya’na tha-kotthana. Oreng Yerusalim maddek mezba se bannya’na padha ban bannya’na lan-jalan e kottha Yerusalim, parlo egabay kennengnganna ngeba kurban ka diba Ba’al.

¹⁴ Daddi, Yeremiya, ba’na ja’ adu’a'agi reng-oreng jareya otabana menta tolong ka Sengko’ sopaja Sengko’ nolonga reng-oreng jareya! Mon reng-oreng jareya nemmo kasossa’an sarta pas menta tolong ka Sengko’, bi’ Sengko’ ta’ eedhingngagiya."

¹⁵ PANGERAN adhabu, "Tang ommat se ekataresnae Sengko’ la ngalakone lalakon se jahat, daddi ta’ andhi’ ha’ pole enneng e Tang Padalemman. Reng-oreng jareya nyangka bisa’a nolak balai mon aji-janji sarta ngatorragi kurban keban. Apa kalaban cara se kantha jareya reng-oreng jareya bisa senneng?

¹⁶ Reng-oreng jareya bi’ Sengko’ tao enyamae bungkana jaitun se rampa’ se buwana lebba’ bagus. Tape sateya kalaban sowara se agarudhu’ akantha galudhuk un-dhaunna bi’ Sengko’ eobbara ban ca’-ranca’na epotella kabbi.

¹⁷ Sengko’ se maddek Isra’il ban Yehuda, Sengko’, PANGERAN Se Mahakobasa. Tape sateya Sengko’ la andhi’ sajja madhatengnga balai ka se dhadhuwa’ jareya. Reng-oreng jareya dibi’ se daddi lantaranna, sabab ngalakone kajahadan, iya reya ngeba kurban ka Ba’al sampe’ Sengko’ peggel."

¹⁸ PANGERAN apareng oneng ka sengko’ parkara sajja jahadda tang so-moso ka sengko’.

¹⁹ Sengko’ akantha dumba se ta’ andhi’ panyangka ja’ egiba’a ka pajagalan. Sengko’ ta’ tao ja’ sengko’ dibi’ se daddi tojjuwanna reng-oreng jareya e dhalem sajjana se jahat. Oca’na reng-oreng jareya, "Mara poger kajuwan reya pongpong gi’ bisa ngasellagi buwa; patadha’, me’ olle ta’ ekaenga’e oreng pole."

²⁰ Sengko’ laju adu’a, "Adhu, GUSTE Se Mahakobasa, Junandalem hakim se adil; Junandalem se ngoji pekkeran sareng atena oreng. Parkara abdidalem ka’dhinto sareng abdidalem epassra’agiya ka Junandalem. Moga abdidalem kengenga nengale Junandalem malessagi lalakonna reng-oreng gapaneka."

²¹ Reng-oreng kottha Anatot ngarep matena sengko’. Ca’na reng-oreng jareya, "Mon sampeyan gi’ terros akotbah parkara sen-pessenna PANGERAN, sampeyan epateyana bi’ kaula."

²² Daddi PANGERAN Se Mahakobasa adhabu, "Reng-oreng jareya bi’ Sengko’ eokoma! Ngangodhadanna bakal mateya e dhalem paperrangan, na’-kana’na bakal mateya kalaparan.

²³ Sengko’ la nantowagi baktona bila se madhatengnga balai ka bangsa Anatot jareya; mon baktona okoman jareya la napa’, ta’ kera badha oreng settonga se lopot."

Yeremia

Video Yeremia 11

Ikuti Kami:

KONTAK | PARTISIPASI | DONASI