Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 O bangsa Israel, dengkehkenlah kata TUHAN man bandu.
2 Nina, "Ula ikut-ikutndu perbahanen bangsa-bangsa si deban. Ula kam mbiar nandangi tanda-tanda i langit, Aminna pe bangsa-bangsa si deban gentar.
3 Agama bangsa-bangsa e, agama si sia-sia. Si isembahna, eme kayu si itabah i bas kerangen nari, si igana alu pahat tukang kayu;
4 si ihiasina alu pirak ras emas, ipeteguhi alu paku maka ula ia guling.
5 Gana-gana e bali kap ras tembut-tembut i bas kebun mandike, la banci ia ngerana; ikanting-kanting nge ia, erkiteken la ia beluh erdalin. Ula kam mbiar man bana: Labo banci kena kai pe kam ibahanna, labo ngasup ia mahan si mehuli pe man bandu."
6 O TUHAN la lit si terpeseri ras Kam. Kam kap si mbisa, GelarNdu mbelin dingen ergegeh.
7 Ise kin la erkemalangen man BaNdu, o Raja nu bangsa-bangsa? Patut Kam ihamati. La lit si terpeseri ras Kam, subuk ras kalak pentar nu bangsa-bangsa, bage pe ras raja-rajana.
8 Kerina ia bodoh dingen lenge. Kai kin banci iajarken gana-gana kayu man bana?
9 Gana-ganana ilapisi alu pirak i Sepanyol nari, dingen alu emas i Upas nari, kerina gana-gana e bekas tan tukang erbahanca. Iuisi alu uis gara entah uis mbiring, bekas itenun kalak si beluh ertenun.
10 Tapi Kam O TUHAN, Kam kap Dibata si tuhu-tuhu, Kam Dibata si enggeluh, Kam raja rasa lalap. Kune merawa Kam, doni enda pe mugur-ugur; la tertahanken bangsa-bangsa RawaNdu.
11 (Arus maka ikatakenndu man bana maka labo gana-gana e si nepa langit ras doni, emaka ikernepken me ia. Masap me ia kerina i babo doni enda nari.)
12 Pertibi enda ijadiken Dibata alu GegehNa, alu KepentarenNa ItepaNa doni enda. Ia kap si engkimbangkenca langit kerina.
13 Alu PerentahNa ergeruhguh lau i datas langit, IbabaNa embun i tampuk doni nari. IbabaNa kilap ernala i bas udan, IsuruhNa angin rembus i bas PenimpanenNa nari.
14 Ngidah si e, motu dingen bodoh kal iakap kalak man bana. Kalak si erbahan gana-gana juru kal iakapna, erkiteken gana-gana si ibahanna e palsu dingen la erkesah.
15 Kerina e sia-sia dingen arus i hina. Kerina ia la banci la ikernepken tupung pengukumen TUHAN.
16 Dibata nu Jakup la bage. Ia kap si njadiken kerina si nasa lit; nggo IpilihNa Israel jadi BangsaNa. TUHAN si Mada Kuasa kap GelarNa.
17 "O kalak Jerusalem! Kam nggo ikepung. Pepulunglah erta-ertandu.
18 Ipelawes TUHAN kam i bas negeri enda nari. IperentahNa kam seh maka sekalak pe lanai lit tading. TUHAN kap si ngerana."
19 Serko kalak Jerusalem nina, "Andiko, kelekna luka kami! Ugah kami lanai banci malem. Iakap kami mbarenda ngasup denga kami nahankenca.
20 Nggo meruntuh kal kemah kami, tinalina nggo peltep. Anak-anak kami nggo keri kal kerina lawes? lanai lit si tading masang tenda, lanai lit si nangkutken kire-kire."
21 Ningku njabapsa, "Peminpin kami motu kap, la ipindona penegu-negu TUHAN. Eme sabapna ia guling, dingen bangsa kami nggo merap.
22 Dengkehkenlah! Nggo seh berita. Sora keguntaren? Guntar si mbelin arah negeri Utara nari, tenterana reh ngeruntuhken Juda gelah jadi gurun pasir jadi ingan tading serigala."
23 Kueteh O TUHAN, maka labo manusia si nentuken nasipna; labo manusia si engkuasai geluhna.
24 O TUHAN pandang BangsaNdu, tapi ula mekeleksa. Tupung Kam merawa ula kami UkumNdu, sabap adi bage dung me kami.
25 Piserkenlah RawaNdu kempak bangsa-bangsa si la nembah man BaNdu kempak kalak si nulak Kam. Nggo ibunuhna BangsaNdu, nggo getem kal kami ibahanna, dingen nggo radas kal negeri kami IbahanNa.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA