Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 PANGERAN adhabu, "Sengko’ la asadhiya nyaodana Tang ommat, tape Tang ommat jareya ta’ adu’a ka Sengko’. Sengko’ asadhiya nemmonana reng-oreng jareya, tape reng-oreng jareya ta’ nyare Sengko’. Bangsa jareya ta’ ngolok Sengko’, maske Sengko’ la asadhiya nyaoda: Areya’ Sengko’!
2 Sengko’ terros asadhiya narema’a Tang ommat, tape Tang ommat jareya aberonta’ ka Sengko’. Bangsa jareya ajalannagi barang se jahat ban ngala’ karebba dibi’.
3 Bangsa jareya ros-terrosan mapeggel Sengko’ polana ngeba kurban ka bun-kebbun kaangguy ba-diba ban ngobbar mennyan e pan-barampan mezbana.
4 E baja malem reng-oreng jareya entar ka wa-guwa ban koburan menta’a babala’an ka arwahna reng-oreng mate. Reng-oreng jareya ngakan dagingnga babi ban ngero’ kowana daging se haram.
5 Ca’na reng-oreng jareya, ‘Ondur, ja’ nyedding ka sengko’, sabab sengko’ reya socce, ta’ padha ban ba’na!’ Sengko’ ta’ kowat nangale’e tengkana reng-oreng jareya. Peggella Tang ate ka reng-oreng jareya padha ban apoy se rabak ta’ endha’ mate.
6 Sengko’ la neptebbagi okomanna, ban okoman jareya la etoles. Sengko’ ta’ neng-ennengnga; Sengko’ malessa kajahadanna reng-oreng jareya
7 lantaran dusana dibi’ ban dusana para bangatowana. Reng-oreng jareya ya-nyeya Sengko’ kalaban ngobbar mennyan ka ba-diba e kennengnganna pamojja’an e gumo’. Sengko’ malessa reng-oreng jareya satembang ban lalakonna se la kajalanan."
8 PANGERAN adhabu, "Anggur se gi’ badha aengnga bi’ oreng ta’ ebuwang, tape ekagabay aeng anggur. Bariya keya Tang bangsa bi’ Sengko’ ta’ epateyana kabbi, sabab e antarana gi’ badha se ngabdi ka Sengko’.
9 Badha reng-oreng Isra’il dhari suku Yehuda eberkadana bi’ Sengko’, ban toronanna bakal ngaandhi’a Tang tana pagunongan. Reng-oreng Tang peleyan se ngabdi ka Sengko’ bakal ennengnga e jadhiya.
10 Tang ommat bakal nyemba’a ka Sengko’; dumba ban sapena bakal ngamba’a e Tana Lapang Saron ban e Cora Akhor.
11 Tape ta’ kantha jareya daddina reng-oreng se nyenglae Sengko’, se ta’ parduli ka Siyon, Tang gumo’ se socce, se ngeba tor-ator sasajin ka Gad ban Meni, ba-dibana papasthenna odhi’.
12 Ba’na kabbi bakal mateya menangka kurbanna kakerrasan. Sabab, e bakto Sengko’ lok-ologan, ba’na ta’ nyaot, e bakto Sengko’ acaca, ba’na ta’ ngedhingngagi. Ba’na asoka’an alaban ka Sengko’ ban ngalakone kajahadan.
13 Ongguwan, oreng se nyemba Sengko’ bakal ngakana, tape ba’na bakal kalaparana. Reng-oreng se nyemba Sengko’ jareya bakal ngenoma, tape ba’na bakal pelka’a. Reng-oreng jareya bakal gumbira’a, tape ba’na bakal epamalowa.
14 Ongguwan, reng-oreng jareya bakal rak-soragana kaperagen, tape ba’na bakal nangesa ce’ ngennessa.
15 Bi’ reng-oreng Tang peleyan nyamana ba’na bakal ekagabaya babaston: ‘Moga bi’ GUSTE Allah Se Mahatenggi ba’na epamateya akantha reng-oreng rowa!’ Tape oreng se ta’at ka Sengko’ bi’ Sengko’ eberri’ana nyama anyar.
16 Saneyap oreng e nagara jareya se menta berkat bakal menta’a eberkadi bi’ Allah se esto. Saneyap oreng se asompa’a, tanto asompa bit asmana Allah se esto. Sabab kasangsara’an se lamba’ la elang ban la ta’ ekaenga’e."
17 PANGERAN adhabu, "Sengko’ agabaya langnge’ se anyar ban bume se anyar. Kadaddiyan se ba’-lamba’na bakal ekaloppa’ana ban ta’ ekaenga’ana pole saterrossa.
18 Mara paperak ban pagumbira salanjangnga lantaran sabarang se ecepta’agi Sengko’ reya. Sengko’ nyepta’agi Yerusalim anyar possa’ ban kasennengngan, ban pandhudhu’na padha anga-bunga.
19 Sengko’ dibi’ bakal peraga lantaran Yerusalim, ban bakal gumbira lantaran pandhudhu’na. E kottha jareya ta’ kera badha oreng nanges pole, ban tadha’ oreng ra’-era’an menta tolong.
20 Na’-kana’na tadha’ se mate bakto gi’ kene’, ban oreng se dibasa bakal lanjanga omorra. Oreng se aomor saratos taon bakal ekoca’a ngodha, ban se mate sabellunna bakal eanggebba ekenneng Tang okoman.
21 Oreng bakal agabaya bengko se pas ekennengnge dibi’; oreng laen ta’ kera badha se noro’ ngennengnge. Reng-oreng jareya bakal namennana kebbun anggurra ban ane’madi aeng anggurra; oreng laen ta’ kera noro’ ngenom anggur jareya. Tang ommat bakal lanjanga omorra akantha ka’-bungka’an, ban ane’madi hasella lalakonna.
22 (65:21)
23 Sabarang se elakone reng-oreng jareya tanto ahasel, ban na’-ana’na ta’ kera mate daksakala. Reng-oreng jareya sana’ potona bi’ Sengko’ eberkadana salanjangnga.
24 Sabellunna reng-oreng jareya menta, Sengko’ la nyaot; sabellunna reng-oreng jareya mare adu’a, Sengko’ la ngabbuli parnyo’onanna.
25 Pate’ alas ban budhu’na dumba padha ngakan rebba; macan ngakan darameyan akantha sape, ban olar la ta’ ambabajane pole. E saantero Tang gumo’ se socce tadha’ se marogi oreng otaba se alako jahat pole."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA