Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nina TUHAN, "Si tuhuna nggo me ersikap Aku ndengkehken pertoton bangsangKu, tapi la ia ertoto. Nggo ersikap Aku maka banci ijumpaina, tapi la icubakenna pe ndarami Aku. Bangsa e la ertoto man bangKu, aminna pe Aku tetap ersikap ngaloisa, 'Enda Aku, banci kam Kusampati.'
2 La erngadi-ngadi Kududurken tanKu ngalo-ngalo bangsangKu si pemberontak, aminna pe lepak rusur perbahanenna, janah idalanina nge dalinna jine.
3 Rusur ibahanna ateKu nembeh. Ipersembahkenna persembahen man dibata-dibata si deban i bas peken-peken ras itutungna kumenen i babo batar-batar.
4 Sanga berngi lawes ia ku guha kuburen-kuburen, nungkuni begu kalak si nggo mate. Ipanna daging babi dingen inemna kuah daging si ipersembahkenna man dibata-dibata si deban.
5 Jenari ikatakenna man kalak si deban, 'Ula deheri kami, kami nggo badia kal, emaka pantang idadapndu!' Ciga ateKu ngenehen kalak si bage; pernembeh ateKu man bana gara desken api si la ernimpet-nimpet.
6 Nggo Kuputusken erbahan pembalasen nandangi kejahatenna. La Aku nggit ngelupaken perbahanenna, janah la banci lang Kuukum ia,
7 erkiteken dosa-dosana ras dosa nini-ninina. Itutungna kumenen man dibata-dibata si deban i das uruk-uruk janah ibelaskenna si jahat kerna Aku. Erkiteken si e Kuukum me ia sue ras perbahanenna si nggo lepas."
8 Nina ka TUHAN tole, "Labo lit kalak si encedaken buah anggur si mehuli tapi ibahanna nge anggur i bas buah si mehuli e nari. Bage me pe, labo ateKu engkernepken bangsangKu kerina, tapi Kukelini kerina kalak si ngelakoken sura-surangKu.
9 Kupasu-pasu kalak Israel si subuk i bas suku Juda, janah taneh deleng-delengKu Kubereken jadi sikerajangen kesusurenna. Bangsa pilihenKu si ngelakoken sura-surangKu, ringan me i je.
10 Isembahna Aku janah ipermakanina biri-biri ras lembuna ku mbal-mbal i bas Kendit Saron i kenjahe, janah i bas Baluren Kesusahen i kenjulu.
11 Tapi nasipndu labo bage, o kam si nadingken Aku, si la mperdiateken Sion, delengKu si Badia, bage pe kalak si nembah Gat ras Meni, si igelari dibata-dibata kesangapen ras nasip.
12 Kam nggo itentuken maka mate ibunuh kalak, erkiteken la ialoindu tupung kam Kulebuh, janah la ibegikenndu tupung Aku ngerana. Ulin akapndu erbahan si la ngena ateKu janah ngelakoken si jahat.
13 Emaka Kukataken man bandu maka kalak si nembah ras si patuh ngikutken Aku, cukup pangan ras inemenna, tapi kam muas dingen melihe akapndu. Ia malem atena, tapi kam mela akapndu.
14 Ia rende alu meriah, tapi kam tangis erkiteken getem pusuhndu.
15 Bangsa pilihenKu make gelarndu pagi i bas numpahi kalak. Aku, TUHAN si Erdolat, la banci lang munuh kam. Tapi man kalak si ngikutken Aku, Kubereken gelar si mbaru.
16 Kasa kai kalak si lit i bas negeri e si atena mindo pasu-pasu, ipindona pagi gelah Dibata si tuhu-tuhu masu-masu ia. Ise ngangkat sumpah, i bas gelar Dibata si tuhu-tuhu e pagi ia ersumpah. Kesusahen i bas paksa si nggo lepas, masap me janah ilupaken."
17 Nina TUHAN, "Kutepa doni si mbaru ras langit si mbaru. Kejadin-kejadin si nggo lepas ilupaken kerina.
18 Ersurak ras ermeriahlah seh rasa lalap erkiteken kai si Kutepa. Jerusalem si mbaru si Kutepa e, dem pagi alu keriahen janah kalak si ringan i je malem atena nggeluh.
19 Aku jine pe dem alu keriahen erdandanken Jerusalem ras bangsangKu si ngianisa. Lanai lit kalak tangis i je, lanai lit kalak erlebuh mindo penampat.
20 Anak-anak lanai mate tupung ia gara-gara denga, janah umurna gedang pagi kerina. Kalak si umurna seratus tahun ikataken ia nguda denga. Kalak si mate ope denga umur si bage, e tandana maka Kuukum ia.
21 Ipajekken bangsangKu pagi rumah janah ia nge ngiani rumah e, labo kalak si deban. Isuanna batang anggur janah ia nge si ngenanami ulihna, nggedang pagi umur bangsangKu, bali ras batang kayu i kerangen. Kasa kai ulihna latih, tuhu-tuhu kal inanamina.
22 (Yes 65:21)
23 Kelatihenna la sia-sia, janah anak-anakna pe la jumpa cilaka. Kupasu-pasu ia ras kerina kesusurenna terus ku bas paksa-paksa si reh.
24 Ope denga ia erlebuh nggo Kualoi, sanga ia ngerana denga nggo Kubegiken.
25 Anak biri-biri radu nggagat ras serigala; singa pe man dukut bali ras lembu, janah nipe lanai man kebiaren. I Sion, delengKu si badia, lanai lit si ncedai tah pe si jahat."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA