Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 PANGERAN adhabu, "Mara dha’ enna’, ba’na kabbi se pelka’, mara ngenom, aeng la esadhiya’agi e dhinna’. Mara dha’ enna’ ba’na se ta’ andhi’ pesse, tarema gandum, ta’ osa majar, pas kakan! Anggur ban powan la esadhiya’agi, mara kala’ kalaban ma-coma.
2 Egabaya apa melle barang se ta’ makobassa ate? Arapa’a alako mon ta’ makennyang? Toro’ Tang parenta, tanto ba’na ngakan nyaman, kobassa ngakan ka’-angka’ se man-nyaman.
3 Edhingngagi, Tang bangsa, pas mara dha’ enna’, bi’ Sengko’ ba’na eberri’ana odhi’ se saongguna. Bit kataresna’an ban kaestowan se ejanjiyagi Sengko’ ka Daud, Sengko’ mabadha’a parjanjiyan se langgeng bi’ ba’na.
4 Sabendherra, Daud bi’ Sengko’ epadaddi pamimpin ban panglima, sakse kaangguy Tang kakobasa’an ka sa-bangsa.
5 Ba’na bakal ngologa sa-bangsa manca, ban sa-bangsa jareya bakal gancanga nyander ka ba’na, bit nyama Sengko’, GUSTE Allahna ba’na, Allah se socce se esemba Isra’il, sabab Sengko’ la ngagungngagi ba’na."
6 Abali ka PANGERAN pongpong gi’ sempat; aserro ka Salerana pongpong Salerana gi’ semma’.
7 Oreng jahat kodu mateppa’ odhi’na, ban ngoba jalanna pekkeranna. Soro oreng jareya abali ka PANGERAN me’ olle narema kabellasanna. Oreng jahat kodu apengo ka Allahna sengko’ ban ba’na, sabab Pangeran gampang apareng sapora.
8 PANGERAN adhabu, "Tang pekkeran banne pekkeranna ba’na, Tang jalan banne jalanna ba’na.
9 Akantha tenggina langnge’ e attassa bume, sajareya tenggina Tang pekkeran e attasanna pekkeranna ba’na, ban Tang jalan e attassa jalanna ba’na.
10 Akantha ojan se gaggar dhari langnge’ ta’ abali pole, tape mabacca bume, malandhu tanana ban matombu men-tamennanna, madhateng hasel kaangguy etabur ban ekakan,
11 bariya keya sabarang se ekoca’agi Sengko’, ta’ abali ka Sengko’ kalaban parcoma, tape ahasel ajalannagi apa se ekakarep Sengko’, ban ngaolle sabarang se ekamaksod Sengko’.
12 Ba’na bakal ondura dhari Babil kalaban ate se perak, sarta eater kalowar kalaban salamet. Gunong ban gumo’ bakal peraga ban rak-soragan, ka’-bungka’an e teggal padha pa’-kopa’an.
13 Ombut ban dhuri bakal eganteya bungkana comara, ombut bakal eganteya bungkana bang-kembangan. Jareya kalakon sopaja Sengko’ kasohora, menangka tandha se langgeng se ta’ kera elang salanjangnga."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA