Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kores la epele epadaddi rato bi’ PANGERAN; epele eotos makala’a sa-bangsa ban matoron to-rato dhari korse karaja’anna. Bang-labangnga pagarra kottha bi’ PANGERAN ebukka’agiya, sampe’ tadha’ labang settonga se gi’ atotop. PANGERAN adhabu ka Kores jareya,
2 "Sengko’ nyadhiya’agiya jalanna ba’na; gunong ban gumo’ bi’ Sengko’ eparata’a, bang-labang dimbaga bi’ Sengko’ epabella’a, lang-palang besse epatogella.
3 Ba’na bi’ Sengko’ eberri’ana arta e kennengngan se ta’ etangale’e, sopaja ba’na taowa ja’ Sengko’ reya PANGERAN Allahna Isra’il, se ngolok nyamana ba’na.
4 Ba’na bi’ Sengko’ eolok sarta eberri’i kahormadan se raja sanajjan ba’na ta’ tao ka Sengko’. Ba’na bi’ Sengko’ esoro nolong Isra’il, Tang abdi, sabab bangsa jareya bangsa peleyanna Sengko’.
5 Sengko’ reya PANGERAN, tadha’ laenna, Sengko’ Allah Se Settong. Bi’ Sengko’ ba’na la esanjatae, maske ba’na ta’ tao ka Sengko’.
6 Sengko’ ajalannagi jareya kabbi sopaja dhari bara’ sampe’ ka temor oreng padha’a tao ja’ Sengko’ PANGERAN, tadha’ illah salaenna Sengko’.
7 Sengko’ se mabadha petteng ban tera’, se madhateng berkat ban balai. Sengko’ PANGERAN se ngalakone jareya kabbi.
8 Dhari langnge’ Sengko’ matoron kamennangan akantha ojan, bume maroka se narema’a, saellana jareya pas matombu kasalameddan ban kabebasan; Sengko’ PANGERAN se madaddi jareya kabbi."
9 Palang oreng se agaca ban Panceptana; oreng jareya akantha polo’ se alaban ka tokang gabayya polo’. Apa lempong atanya ka tokang gabayya polo’, "Apa se elakone ba’na sateya?" Apa polo’ aserro ja’ se agabay polo’ jareya ta’ andhi’ kaahliyan?
10 Palang oreng se ngoca’ ka oreng towana, "Aponapa kaula me’ elahirragi cara paneka?"
11 PANGERAN, Allahna Isra’il se socce adhabu, "Mara tanyae Sengko’ parkara jaman se bakal dhateng. Tape ja’ tanyae Sengko’ parkara Tang na’-ana’, otabana nyoro Sengko’ ngalakone apa’a bai.
12 Sengko’ PANGERAN se agabay bume, ban nyepta’agi manossa se daddi essena. Kalaban Tang kobasa Sengko’ ngampar langnge’, ban marenta bulan, tang-bintang ban are.
13 Sengko’ se maguli Kores kaangguy ajalannagi Tang maksod ban madekdek kaadilan. Sengko’ marata’a jalan se elebadana. Kores bakal majaga’a pole Yerusalim, Tang kottha ban mabebasa Tang ommat se etawan, ta’ kalaban narema sogo’ otaba bajaran." PANGERAN Se Mahakobasa la adhabu.
14 Dhabuna PANGERAN ka Isra’il, "Kala’ hasella tana Messer ban Sudan. Reng-oreng Syeba se gaga’ daddi andhi’na ba’na; reng-oreng jareya ekalenthong tanangnga, ajalan ngerengngagi ba’na. Reng-oreng jareya bakal asojuda sarta ngakowe, ‘Allah bendher badha e nga’-tengnga’anna ba’na; tadha’ illah salaenna Salerana!
15 Allah se masalamet Isra’il jareya Allah se ta’ ngaton ka oreng.
16 Reng-oreng se agabay arca brahala tanto epamalo ban eya-seya.
17 Tape Isra’il epasalamet bi’ PANGERAN; kasalameddanna bakal terrosa salanjangnga. Ba’na ta’ kera epamalo otaba eya-seya, sampe’ salanjangnga.’"
18 PANGERAN se nyepta’agi langnge’, Salerana jareya Allah! Salerana se abadhi ban mabangon bume, andaddiyagi bume jareya koko ban manjeng terros. Salerana ta’ madaddi bume jareya kennengngan se seppe, tape epadaddi kaangguy ekennengnge. Salerana se adhabu kantha reya, "Sengko’ PANGERAN, tadha’ laenna.
19 Sengko’ ta’ tek-ngetek mon acaca, ta’ aroseya mon ca’-ngoca’. Sengko’ ta’ nyoro Isra’il Tang ommat nyare Sengko’ ta’ kalaban badha gunana. Sengko’, PANGERAN, ngoca’ sabendherra, ban ngabala barang se saongguna."
20 Dhabuna PANGERAN, "Mara akompol, areng-bareng dha’ enna’, ba’na kabbi se lopot e antarana sa-bangsa! Budhu oreng se ngarak arca kaju reya, ban adu’a ka ba-diba se ta’ bisa masalamet.
21 Mara mon aparkara’a, duduwagi te-buktena, me’ olle padha bisa aparembagan. Sapa se ngabarragi jareya, ban notorragi parkara jareya molae ba’-lamba’na? Gu ta’ Sengko’, PANGERAN? Tadha’ illah salaenna Sengko’. Sengko’ Allah se adil ban Panyalamet, tadha’ laenna kajabana Sengko’!
22 He, saantero pandhudhu’ bume, mara abali ka Sengko’ me’ olle ba’na epasalamet, sabab pera’ Sengko’ Allah, tadha’ laenna!
23 Sengko’ la ajanji, ban Tang janji ta’ kera battal; bit Sengko’ dibi’ Sengko’ asompa: Saneyap oreng bakal asojuda e adha’na Sengko’, ban ngangguy basana dibi’ bakal ajanjiya estowa ka Sengko’.
24 Reng-oreng bakal ngoca’a, ‘Kaadilan ban kakowadan pera’ dhari PANGERAN!’ Sakabbinna oreng se baji’ ka Sengko’, tanto nyander ka Sengko’ ban pas epamalo.
25 Tape toronanna Yakub bakal epasalamedda, kabbi bakal amolja’agiya Sengko’, PANGERAN.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA