Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Iaminne pasanNa Allata’ala mae ri tu Yehuda siagang Yerusalem, natarimaya Yesaya, ana’na Amos:
2 Ri allo-allo labattua bulu’ tampa’ Balla’Na Batara ammenteng tinggi nai’ siagang ammenteng kassaki irate moncong-moncong siagang sikamma buluka. Sikontu bansaya a’balulungi mange anjoreng,
3 nakana ngaseng ke’nanga, "Umba kinai’ ri Bulu’Na Batara, ri Balla’Na Allata’alana Israel. LaNapangngajarrangi mae ri katte apa mustia nigaukang. Lanipinawangi oloanNa, saba’ battu ri Yerusalem ajaranNa Batara, battu ri Sion A’bicara."
4 Ia la’jari haking ri tangnga-tangngana bansa-bansaya, annappuki parkara ri tangnga-tangngana suku-suku bansaya. Lanide’deki pa’danga a’jari pa’jeko, siagang pokea a’jari pa’battasa’. Tenamo nalasibakkai bansa-bansaya, tena tommo natuli sadia ero’ a’bundu’.
5 He, turunganna Yakub, umba ki’jappa lalang singara’Na Batara!
6 O, Allata’ala, Kibokoimi ummatTa, turunganna Yakub! Saba’ kemae-kemae taua ri anne pa’rasanganga ammakei pangngassengang baca-baca battu raya siagang battua ri Filistin. Napalembai ada’-ada’na bansa maraenga.
7 Pa’rasanganna rassi pera’ siagang bulaeng, na barang-baranna teai sipato’ jaina. Sanna’ jaina jaranna, karetana tanila’busai nirekeng napakamma jaina.
8 Kemae-kemae nia’ barhala, siagang anynyombai ke’nanga ri patung-patung bate pare’ kalennaji ke’nanga.
9 Tunggala’ taua lanihinai siagang lanipakatunai. TeaKi’ pammopporangngi ke’nanga Batara!
10 Lantamaki ke’nanga ri kali’bong-kali’bong batua ri bulu’-bulu’ batu karang, yareka angngekei ke’nanga kali’bong antama’ ri buttaya sollanna ta’lappasa’ ke’nanga battu ri pangngalarroinNa siagang koasa kala’biranNa Batara.
11 Tau borroa lanipakatunai na tau tampoa lanipa’dundui. Bataraji bawang nipakalompo.
12 Ri anjo alloa laNapakatunai Batara Kaminang Koasaya sikamma tau ampakatinggiai kalenna, na nahukkung tau borroa siagang tau tampoa.
13 Sikamma poko’ camara tinggia ri Libanon siagang sikontu poko’ kayu lompoa ri Basan lanipanraki ngasengi.
14 Sikamma monconga siagang sikamma bulu’ porea lanipa’lapparaki.
15 Menara-menara tinggia siagang sikamma tembo’ pattahangnganga lanirumbangi.
16 Sikamma kappala’ lompoa siagang kaminang ga’gaya lanitallangngang ngasengi.
17 Tau borroa lanipakatunai, siagang tau tampoa lanipadundui. Bataraji bawang nipakalompo.
18 Sikamma barhalaya lalanynya’ tabasikali.
19 Ri wattu ammentenna Batara siagang Napage’goso’ buttaya, lantamaki taua ri sikamma kali’bong batu niaka ri bulu’-bulu’ batu karanga, yareka angngekei kali’bong antama’ ri buttaya sollanna ta’lappasa’ ke’nanga battu ri pangngalarroinNa siagang koasa kala’biranNa Batara. Punna battu anjo alloa, lanibokoi bawammi sikamma barhala-barhala peraka siagang bulaeng napareka nampa nasomba ke’nanga, na’jari balao mami siagang pa’nyikia mami pata.
20 (2:19)
21 (2:19)
22 Jari, teako manrannuangngi mae ri rupatau lamatea, nasaba’ anjo ke’nanga tena anggaranna.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA