Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Enda me kata si ibereken Dibata man Jesaya anak Amos kerna Juda ras Jerusalem.
2 I bas wari-wari si arah pudi pagin deleng-deleng ingan Rumah Pertoton e pajek, eme pagi deleng si meganjangna kal, ganjangen asa kerina uruk-uruk. Bangsa-bangsa reh erdemuyung ku je.
3 Janah nina bangsa-bangsa E "Nangkenglah kita ku Deleng TUHAN ku Rumah Pertoton Dibata Israel. Kai AteNa si bahan IajarkenNa man banta; arah dalan si nggo IpilihNa erdalan me kita. Sabap pengajaren TUHAN i Jerusalem nari kap rehna, i Sion nari ngerana Ia."
4 Perjengilen i bas bangsa-bangsa IdungiNa, emaka itepa kalak me pedangna jadi gigi tenggala janah lembing jadi sabi-sabi ibahanna. Lanai ndigan pe bangsa-bangsa lawes erperang, lanai ndigan pe ia ersikap-sikap ertempur.
5 Emaka kesusuren kerina Jakup, marilah erdalan kita, i bas terang si ibereken TUHAN man banta.
6 O Dibata, nggo ItadingkenNdu BangsaNdu, kesusuren Jakup. Negeri enda nggo dem alu kalak si make kinigurun si asalna i Timur ras i Pilisti nari. Bangsa enda nggo ngikutken adat bangsa si deban.
7 Negerina dem alu pirak ras emas, janah erta-ertana la ersibar buena. Negerina dem alu kuda, janah gereta perangna lanai terbeligai.
8 Negerina dem alu berhala-berhala, janah isembahna gana-gana bekas tanna erbahan.
9 Erkiteken si e tiap kalak la banci la ipeteruk gelah juru akapna. Ula alemi salahna o TUHAN!
10 Cebuni me ia pagi i bas guha-guha si lit i bas uruk-uruk batu, tah lubang man inganna cebuni i bas taneh, lako nilahken pernembeh ate TUHAN ras sinalsal KemulianNa.
11 Reh me warina maka ukur manusia si meganjang ipeteruk, janah kinigombangenna imasapken. Kenca bage TUHAN saja ngenca ipemuliaken.
12 I bas wari e, TUHAN si Mada Kuasa la banci lang ndabuhken kerina kalak si erkuasa, bage pe kalak si rukur meganjang ras megombang.
13 Batang kayu cemara si meganjang i Libanon bage pe kerina batang kayu si mbelin i Basan IkernepkenNa me.
14 IpekenditNa kerina deleng-deleng ras uruk meganjang,
15 bage pe kerina menara si meganjang ras kerina tembok benteng.
16 Kapal-kapal si galang ras mejile pe IgedapkenNa.
17 Ukur manusia si meganjang ipeteruk, janah kinigombangen manusia imasapken. Gana-gana masap kerina, janah i bas wari e TUHAN saja ngenca ipemuliaken.
18 (Yes 2:17)
19 Manusia cebuni i bas guha-guha si lit i bas uruk-uruk batu, tah pe lubang man inganna cebuni i bas taneh lako nilahken pernembeh ate TUHAN ras sinalsal KemulianNa, asum Ia reh ngugur doni enda.
20 Adi wari e nggo seh, iambekken kalak me gana-gana emas ras pirak si nggo ibahanna, itadingkenna man sikerajangen menci ras arip.
21 Asum TUHAN reh ngugur doni enda, cebuni me manusia i bas lingling ras guha-guha si lit i bas uruk-uruk batu lako nilahken pernembeh ate TUHAN ras sinalsal KemulianNa.
22 Emaka ulanai ernalem man manusia si ermasap-masap, sabap kai kin ergana ia?
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA