Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Areya’ pessen se edhabuwagi PANGERAN parkara Messer. Pangeran meyos ka Messer nete’e ondhem se ceppet. La-brahalana Messer ngetter e ajunanna ban oreng Messer kene’ ate.
2 Dhabuna PANGERAN, "Sengko’ mabadha’a perrang sataretanan e Messer: Taretan amoso taretanna, tatangga amoso tatanggana, kottha amoso kottha, karaja’an amoso karaja’an.
3 Rancanana Messer bi’ Sengko’ epabuddhuwa ban samangadda reng-oreng Messer epaelanga. Reng-oreng jareya bakal menta’a tolong ka la-brahalana, menta’a babala’an ban petodu ka kon-dhukon ban ka roh-erroh.
4 Bi’ Sengko’ Messer epassra’agiya ka tanangnga rato jahat se kejjem. Sengko’, PANGERAN Se Mahakobasa, la ngoca’."
5 Aengnga Songay Nil bakal nyoroda gan sakone’ sampe’ dhi-budhina kerreng.
6 Nal-kanal bakal bacengnga e bakto aengnga sajan tadha’. Galagas ban rebba bakal eloba.
7 Bines e salanjangnga Songay Nil bakal kerrenga pas eabber angen.
8 Kang-tokang manceng se biyasana mega’ juko’ e songay jareya bakal aserrowana ban nangesa sabab panceng ban jalana tadha’ gunana pole. Kang-tokang tennon bakal kaelangana pangarebbanna;
9 reng-oreng jareya ban ko-panglakona bakal sossa’a atena ban elang samangadda.
10 (19:9)
11 Budhu onggu pin-pamimpinna kottha Zowan! Oreng Messer se paleng bicaksana aberri’ babala’an se budhu! Ce’ bangalla reng-oreng jareya ngoca’ ka ratona ja’ aba’na toronanna reng-oreng se bicaksana ban to-rato e jaman lamba’!
12 He, to-rato Messer, badha e dhimma para panasehadda ba’na se penter jareya? Olle daddi reng-oreng jareya tao malae ba’na apa se erancana’agi PANGERAN Se Mahakobasa ka Messer.
13 Para pamimpinna Zowan ban Memfis reya gendheng. Reng-oreng jareya banne mimpin, la’-mala’ sabaligga ngeba bangsana ka jalan se sala.
14 PANGERAN se madaddi reng-oreng jareya aberri’ babala’an se mabingong. Daddi Messer sala malolo, dhing-tabarindhing akantha oreng mabu’ se tabalaccar e attassa otana dibi’.
15 E Messer tadha’ oreng se bisa’a apa-rapa, pangobasa otabana ra’yat padha bai, oreng penting ban oreng biyasa tadha’ bidana.
16 Bakal napa’a baktona Messer daddiya akantha babine’ se tako’an; ngetter katako’en mon nangale’e PANGERAN Se Mahakobasa ngangka’ astana ngokoma aba’na.
17 Oreng Messer bakal tako’a ka Yehuda sabban epaenga’ ka potosanna PANGERAN Se Mahakobasa parkara aba’na.
18 E bakto jareya basa Ibrani bakal eangguya e dhalem lema kottha e Messer. E jadhiya reng-oreng jareya bakal asompa’a kalaban asmana PANGERAN Se Mahakobasa. Sala settong dhari tha-kotthana bakal enyama’ana "Kotthana Are".
19 E bakto jareya e pusadda nagara Messer bakal badha’a mezba kaator ka PANGERAN, ban e batessa nagarana bakal badha’a cangga bato se kaator malolo ka PANGERAN.
20 Mezba ban cangga bato jareya daddi simbulla kahadiranna PANGERAN Se Mahakobasa e Messer. Mon bangsa jareya enyek-enyek, ban bangsa jareya nyo’on partolongan ka PANGERAN, PANGERAN bakal ngotosa oreng se masalamedda reng-oreng jareya.
21 PANGERAN bakal anyata’agiya Salerana ka bangsa Messer, dineng bangsa Messer bakal kennala ka Salerana ban abakteya ka Salerana, sarta ngatorragi kurban ban tor-ator ka Salerana. Reng-oreng jareya bakal ajanjiya kalaban sompa ban bakal ajalannagiya janji jareya.
22 PANGERAN bakal ngajara bangsa Messer, tape saellana jareya Salerana bakal mabarasa reng-oreng jareya. Reng-oreng jareya bakal abaliga ka PANGERAN, ban Salerana bakal meyarsa’agiya du’ana sarta mabarasa panyakedda reng-oreng jareya.
23 E bakto jareya bakal badha’a jalan raja e antarana Messer ban Asyur. Pandhudhu’na nagara se dhadhuwa’ jareya bakal jar-ganjira lebat e jalan jareya sarta bakal padha’a areng-bareng ajalannagi kabakteyan.
24 E bakto jareya Isra’il bakal padha’a kadhudhuganna ban Messer sarta Asyur, ban bangsa se tatello’ jareya bakal daddiya berkat ka sa-bangsa sadunnya.
25 PANGERAN Se Mahakobasa bakal aberkadana reng-oreng jareya sambi adhabu, "E, Messer Tang ommat, Asyur Tang cepta’an ban Isra’il Tang peleyan, sateya Sengko’ aberkadana ba’na."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA