Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Tongon, marpangulaki do uhur ni Jahowa bani Jakob, anjaha ulakan-Ni mamilih Israel, anjaha pasuangon-Ni sidea hu tanoh ni sidea. Halak panginsolat mangirikkon laho padomu dirini bani ginompar ni si Jakob.
2 Anjaha boanon ni sidea ma bangsa-bangsa hubani ianan ni sidea, anjaha ginompar ni Israel ma simada sidea i tanoh ni Jahowa, laho mambahen gabe jabolon dalahi ampa jabolon naboru; sidea do na manahan si partaban ni sidea hinan, anjaha sidea manrajai na mangodoh-odoh sidea hinan.
3 Jadi masa ma bani ari pinasonang ni Jahowa ho, humbani hangalutonmu ampa humbani hasunsahanmu ampa humbani horja rodi na borat, na pinarjabolon ai ho ibagas ai,
4 jadi luarhononmu ma salig-salig on dompak raja ni Babel, hatahononmu ma, “Ee! Domma bois si pangodoh-odoh, maronti pangarsik-arsikon!”
5 Domma iponggolhon Jahowa tungkot ni parjahat, simambu ni parrajai,
6 na mambogbog bangsa-bangsa ibagas gila-Ni, marhitei bogbog-bogbog na so marnamangadi, na manrojati bangsa-bangsa ibagas ringis-Ni, marhitei rojat-rojat na so maralang-alang.
7 Sonang anjaha mardamei-damei ma sab tanoh on, mariah marolob-olob ma sidea.
8 Age hayu tusam marmalas ni uhur do pasal ho, sonai hayu ares na i Libanon, nini, “Dobkonsi na gadab in ho, seng dong be na tangkog laho marroboh hanami.
9 Guyu do nagori toruh halani ho laho mangalo-alo parrohmu; ipuhoi do na dob matei manjalo ho, ipahehe do humbani hotak ni sidea sagala raja ni parbegu.”
10 Ganup sidea marsahap, mangkatahon bani, “Ho pe galek do songon hanami! Gabe doskon hanami do age ho!
11 Ipaturun do hamegahonmu hu nagori toruh, hinariah ni husapimu; na masik-masik do podomanmu i toruh, anjaha goya do panrungkubmu.
12 Sonaha do pardabuhmu hun langit, ale bintang parkawas, anak ni buha siang ari! Iroboh do ho, marumbak hu tanoh, ho si taluhon bangsa-bangsa!
13 Ia ho, nim do ibagas uhurmu, ʻSihol do ahu naik hu langit; i babou ni bintang ni Naibata do pagijangonku paratasku; sihol do ahu hundul i dolog partumpuan, hampit utara sahalian.ʼ
14 Sihol do ahu naik mangatasi hombun, sihol doskon Sitimbulan in do ahu.
15 Hape hu nagori toruh do ho ipatuad, hu luhung tang sibagasan.
16 Halak na mangidah ho, mannonoi ho, anjaha marpingkir pasal ho: Ai on do hape halak na mambahen gobir dunia on, na mandugur harajaon-harajaon,
17 na mambahen dunia on gabe halimisan, na parsedahon huta-hutani, anjaha na so mambere mulak halak na tartaban?
18 Sagala raja-raja ni bangsa parbegu, ganup do tibal marhasangapon, ibagas jeratni bei,
19 tapi anggo ho ibuangkon do, daoh humbani tanomanmu, songon dangkah na hinagigihon, nirungkub ni buei halak na rasei, na hona tikam ibahen podang, na tuad hu godung na nirungkub bani batu, songon bangkei na nirojatan.
20 Seng rap pakon sidea ho bani na tartanom ho, halani na dob iparseda ho tanohmu, ibunuh ho bangsamu. Seng be sitarsingatan ronsi sadokah ni dokahni ginompar ni parjahat.
21 Pasirsir hanima ma bani anakni panayatan halani hasalahan ni bapani; ase ulang mulgap be sidea laho mambuat tanoh in, anjaha igoki sisik ni dunia on bani huta-huta.
22 Sihol do Ahu hehe mangimbang sidea, nini Jahowa Zebaot, anjaha sihol do masabkonon-Ku hun Babel goran ampa teba-teba, tumbor ampa tunas, ihatahon Jahowa.
23 Bahenon-Ku ma ai gabe parbagianan ni tanggiling ampa tanoh rawang-rawang, anjaha sapuon-Ku ma ai marhitei sapu-sapu hasedaon, nini Jahowa Zebaot.
24 Domma pala marbulawan Jahowa Zebaot, nini, “Tongon, songon na Husurahon, sonai do saud, anjaha songon na Hupingkiri sonai do jadi,
25 ai ma sihol ropukon-Ku do Assur i tanoh-Ku, anjaha rojaton-Ku do i atas ni dolog-dolog-Ku, ase tanggal pasanganni humbani sidea, anjaha mosor na pinaporsankonni humbani abarani.
26 Ai ma ranggian na dob iranggihon pasal ganup tanoh in, anjaha ai ma na pinagostong dompak ganup bangsa-bangsa.
27 Ai Jahowa Zebaot do na manranggihon, ise ma na manlangkon ai? Anjaha tangan-Ni na gostong ai, ise ma na manulak ai?
28 Bani tahun parmatei ni Raja Ahas roh ma pangungkabon on:
29 Ulang ma malas uhurmu, ale tanoh Palistim, hanima haganup, halani maponggol tungkot na manlonsing ho; ai humbani urat ni ulog ai luar do upar, anjaha buahni gabe naga na habang.
30 Jumpahan sampalan do bani dolog-Ku halak na masombuh, anjaha halak na musil marsonang-sonang marianan, tapi anggo ginomparmu bunuhon-Ku do marhitei lohei, anjaha simasimamu raseihonon-Ku do.
31 Mandoruh ma ale horbangan, mandorak ma ale huta, gobir-gobir ma, ale tanoh Palistim, hanima ganup! Ai roh do timus hun utara, seng dong na pinjil humbani barisanni.
32 Naha ma parsampang bani suruhan ni bangsa parbegu in? Jahowa do na pajonam Sion, anjaha hujai marhaporusan na sombuh ni bangsa-Ni.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA