Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Mekuah ka pagi ate TUHAN man Israel BangsaNa, janah IpilihNa bangsa e jadi SikerajangenNa. ItamakenNa ka mulihken bangsa e ringan i bas negerina jine, jenari reh me bangsa-bangsa si deban janah ras ia tading i je.
2 Melala pagi bangsa-bangsa nampati Israel lako mulih ku negeri si ibereken TUHAN man bana, janah i bas negeri e ia jadi budak kalak Israel. Itaban kalak Israel pe kalak si naban ia nai, janah kalak si nindih ia gelgel iperentahna me.
3 Ipengadi TUHAN pagi kerina si mesui ras kiniseran bangsa Israel, bage pe dahin si mberat si ipaksaken man bana.
4 Tupung si e iuru-uru kalak Israel me raja Babil nina, "Raja si kejam nggo ndabuh! Ndigan pe lanai ia ngasup nindih kalak.
5 Nggo ipeltepken TUHAN kuasa pemerentah-pemerentah si jahat,
6 si nindih bangsa-bangsa alu rawana janah la erngadi-ngadi niksa bangsa-bangsa si italukenna.
7 Genduari kerina doni nggo banci teneng ras dame, janah kerina kalak rende alu meriah.
8 Batang tusam ras cemara Libanon kerina ermeriah ukur erkiteken raja e nggo ndabuh, sabap arah kelawesenna lanai lit kalak reh nabahisa.
9 Doni kematen nggo sikap ngalo-ngalo raja Babil. Begu kalak si nai erkuasa i doni nggo nggirgir, begu raja-raja keke i bas kursi kinirajanna nari.
10 Nina begu e kerina man raja Babil, 'Genduari kam pe nggo ka bali kotena ras kami. Kam pe nggo seri ras kami.
11 Mbarenda kam ihamati alu ergendang, tapi genduari kam nggo ampar i bas doni kematen enda. Inganndu medem bernga janah cabinndu gaya.'
12 O Raja Babil, nai kam bali ras bintang erpagi-pagi si terang tapi genduari kam nggo ndabuh i langit nari! Mbarenda italukenndu bangsa-bangsa, tapi genduari kam nggo idampesken ku taneh.
13 Mbarenda meganjang sura-surandu; inangkihindu atendu langit janah namaken kursi kinirajanndu i babo bintang-bintang si meganjang. Iakapndu banci kam kundul i das deleng si lit i Utara desken sekalak raja, i ja dibata-dibata pulung.
14 Nindu, atendu inangkihindu embun-embun, gelah bali ras si Mada Kuasa.
15 Kepeken genduari kam ipesusur ku doni kematen si mbagesna."
16 Kalak si ringan i bas doni kematen natap kam, janah alu ate mamang ipernehenna kam. Nungkun ia nina, "Enda kin kalakna si ngugur doni janah si mahanca kerajan-kerajan guntar?
17 Enda kin kalakna si ngkernepken kota-kota janah si nalihken doni jadi gurun pasir? Enda kin kalakna si la pernah mulahi tabanenna, si la meresa mulih ku rumah?
18 Kerina bekas raja-raja doni medem i bas kuburen si mejile,
19 tapi kam la lit kuburenndu; maitndu iambekken janah ipelepas macik, itamburi salu mait tentera si mate i bas perang, ibenterken ku bas lubang si erbatu-batu, jenari iperjaki.
20 Erkiteken icedakenndu negerindu, janah rayatndu ibunuhindu, emaka kam la ikuburken bagi raja-raja si deban. Keluargana si jahat pe la lit si tading.
21 Benakenlah penggelehen! Anak-anakndu mate kerina erdandanken dosa nini-ninina. La lit sekalak pe anak-anakndu e jadi raja i doni tah majekken kota."
22 Nina TUHAN si Mada Kuasa, "Kuperangi pagi Babil, jenari kukernepken. Kai pe la lit Kutadingken; la lit si terkelin, danak-danak pe lang. Aku, TUHAN, nggo ngataken si enda.
23 Kusalihken Babil jadi paya-paya, alingkupa ngenca tading i je. Kuradasken Babil seh kai pe la lit si tading. Aku, TUHAN si Mada Kuasa nggo ngataken si enda."
24 TUHAN si Mada Kuasa nggo ersumpah nina, "Kai si Kurencanaken la banci lang jadi. KeputusenKu la banci lang idalanken.
25 Kukernepken kalak Assur i bas negeringKu Israel janah Kudedehi ia kerina i das deleng-delengKu. Kutangtangi bangsangKu i bas pasangen ras baban si mberat si ipaksaken bangsa Assur man bana.
26 Enda me keputusenKu kerna doni enda, janah tanKu nggo Kuawatken ngukum bangsa-bangsa."
27 TUHAN si Mada Kuasa nggo netapken UkurNa ngelakoken si enda; nggo IawatkenNa TanNa guna ngukum, janah ise pe la ngasup ngambatisa.
28 Enda me berita si imomoken i bas tahunna Raja Ahas mate.
29 Kalak Pilisti, ula akapndu meriah aminna gia perpalu si mekpek kam nggo penggel. Adi mate sada nipe, reh ka nge nipe si deban si rawan asa si lebe nggancihkenca. Naper me tinaruh nipe, janah anakna, eme naga si banci kabang.
30 Ikernepken me kam alu kelihen si mesangat seh maka lanai lit sekalak pe tading nggeluh. Tapi TUHAN pagi si mpermakani BangsaNa si musil-musil janah iberena ia nggeluh alu teneng.
31 Nderkuhkenlah janah serkolah kam mindo penampat, o kam kerina kota-kota Pilisti. Gentarlah kam kerina! Abu si nggebuk bagi embun reh i Utara nari tanda kerehen tentera, tentera si la lit kalak percikcik i bassa.
32 Uga ninta ngaloisa persuruhen si reh i negeri Pilisti nari? Sikataken me man bana maka TUHAN nggo manteki Sion janah BangsaNa si lit i bas kiniseran ndat ketenengen i je.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA