¹ Melkisedek in ena Salemk teipsinkim irik gilki. Hen zen teipsin tangan Zini Alap hap de syalsa gol gweka– sapi-kambing maesa de hen tru tasik gweblankam. Abraham kim eijannak de yei-yek gwen nakon lwahal zaka, Melkisedek dekam zep Abrahamsa ala tabla zaka, zao zep tahana tehabla ineka– Alap dikim dawemsa golblan hap.
² Abraham dekam zep eijan nakon de kap ta halzan kire-kire hlikna zebe hap kap tablaka. Melkisedek mo bosena hen enlala naban. Zeno enlalana “Dam-dam enkam de irik gin zini.” Hwena zen hen ena Salemk teipsinkim irik gilki, hen ena in mo bosena enlalana “umlae.” Zep Melkisedek hen anakan nwe-mase gweka, “umlae hap de teipsinni.”
³ Alap mo olak hom Melkisedek hap dena anakan ale nuk, “Zeno ane-biana zen,” hen “Zen dekore zi ausu nakorena.” Ki maka hen anakan dam nulsuk, “Zao jaha gwek,” ahaksa, “Zao tilki.” Zep zen man nwe-mase gweꞌara– san de Alap zere mo Tanena kiye– nonol lone senna hom, hen aumwa topna hom. In zep Melkisedek anakan nwe-mase gweꞌara, “Zen Alap mo golak de hendep denaban syal gwe-gwen zini.”
⁴ Nen zebe anakan dam ulsuꞌun, “Melkisedek, zen eiwa teipsin tanganna,” zep neno mae mo auyanna Abraham Bak eijannak de kap tan kire-kire dawem-dawem hlikna zebe hap kap tablaka.
⁵ Hwena Musa mo titi tabin olak hyanak anakan lwak, “Lewi Bak mo ausu nakore zini men zen de Alap mo golak syal ta gweꞌak, zen en sa zere mae mo iyena Israel onakon Alap hap de kire-kire hlikna nulin gwer.” Sap eiwa, dekon de gulin gwen, hwena Israel zi ausuna in hen apdekam Abraham mo auyan-aza nakorena.
⁶ Melkisedek Bak an, zen hwena Lewi Bak mo auyan-aza nakore naka hom. Hwena zen ki Abraham onakon kire-kire hlikna gul inki. Hen zen man Abraham hap tahana tehabla ineka. Neno mae mo auyanna in sap eiwa teipsinni, sap Alap nonol desa en hamal hap gu-gubluka– dawemsa de golblan hapye.
⁷ Hwena mes dam gwesinin: Men zen tahana tehabla inenna, zen teipsinni. Mensa tehabla inenna, zen betekna. Zep Melkisedek, zen Abraham onakon man teipsiki.
⁸ Lewi Bak mo ausu nakore zini in man juwe gwenan, hwena zen Alap hap de kire-kire hlikna man nulin gwenan– Yahudi bose zem onakonye. Hwena Melkisedek Bak, zen zebon mae onakon teipsinni, sap Alap mo olak zebe hap dena man nwe-mase gweꞌan, “Zen hom tilki.”
⁹ Hen Lewi mo ausu nakore zini in men zen angkam Yahudi onakon kire-kire hlikna nulin gwenan, zen hwena man enwe-mase gwe-gweꞌan– san de Melkisedek Bak hap de hen kap tablanna kiye. Sap Abraham kim kap tablaka, Lewi mo ausu nakore zini in nama san de Abraham mo timnik de lowe henna kiye.
¹⁰ Sap Abrahamsa kim Melkisedek ala tablaka, dekam Lewi Baksa hom jaha gweꞌak. Zen zep nwe-mase gweꞌan, zen dekam san de Abraham mo siknik nama gweꞌanka. Zen zep nwe-mase gweꞌan, Lewi Bak san de ang gwenna– Abraham kim kire-kire hlikna Melkisedek hap kap tablakaye. Zep Lewi onakon, teipsinni Melkisedek Bak.
¹¹ Hwena Musa Bak kim titi tabin ola insa golzimki, zen anakan gubiridaka, “Lewi Bak mo ausu nakore zi en sa Alap mo golak syal ta gwer– dekam de Israel mo karek-kareksa ngan gulsuk gwizimdin hipye.” Zen zep angkam zen en sapi-kambingsi Alap hap tru dasik gweblanan. Hwena Lewi Bak mo ausu nakore zi enna in de eiwa syala insa su nul soneꞌanam, hen sap Lewi mo aza-tanena Harun Bak mo ausu nakore zi en, ki Alap molya lun Ahana dam tasininam– Zen de hwena Melkisedek Bak mo weinak zi mo karek-kareksa ngan gulsuk gwizimdin hipye. Lewi Bak mo ausu nakore zini in sap Musa mo titi tabin ola insa syal nei gwibik, hwena Alap mo nwenak zen hom sowehek.
¹² Kirekam de lwankam, ki hwena Alap mes Musa mo titi tabin ola insa wet gulsuku. Sap Melkisedek mo weinak dep de Zini, Zen Kristus– neno mae mo Teipsinni. Hen Zen Lewi Bak mo ausu nakon hom saltilki. Zen dwan Yehuda mo ausu nakore nakake. Zeno ausu nakore zini orep hom tangan mae sapi-kambingni Alap hap tru dasik gweblak. Hen Musa hom zi ausuna in hap dena orep mae anakan gubiridaka, “Zen sa hen Alap mo golak syal ta gwer.” Zep Kristussu kim Melkisedek Bak mo weinak dep dam tasiki, Alap hen dekam Musa mo titi tabin ola insa wet gulsuku.
¹³ (7:12)
¹⁴ (7:12)
¹⁵ Zep eiwa, angkam mes tangane dam ulsul: Alap mes Musa mo titi tabin ola insa wet gulsuku– in kim Kristussu zer sonekake, Melkisedek Bak mo weinak de teipsin hip.
¹⁶ Desa zi hom dam dasik, sap Musa mo titi tabin ola kon Yehuda mo ausu nakon de saltin zini bejen Alap mo golak syal gwe-gwen. Zen hwena Alap Zen dam tasiki, sap Yesus hon sosonna ki– dekam de hendep denaban tin nikon ngaya gwen hap denaye.
¹⁷ Zen zep zebe hap dena Alap mo olak anakan lwak, “Em an Zen esa hendep denaban ere mo golak teipsili– orep de teipsin zini Melkisedek Bak mo kimye.”
¹⁸ Zep angkam, Alap kim kirekam Yesussu dam tasiki, epba titi tabin ola insa dekam zep tahan san gwei gubir kinika. Sap epba ola in, zen soson naka hom– nesa de Alap osan dep zon guludan hapye.
¹⁹ Sap Musa mo titi tabin ola in bejen neno mae mo tingare karek-karekna ngan gulsun. Zen in zep nebe mae hap Yesus ora dawemna sal tazimki– Desa en de blol gwe-gweblankam de Alap zere onak yaing gwen hap denaye.
²⁰ Ora esena insa Alap syal gweblaka, zen zen– soson tangan zi niye. Sap Alap kim Yesussu dam tasiki, Zen zere mo bose gubin niban gu-gubluka– kim anakan gublukaye, “Ëe an eno Bian, Ëe ere mo bose gubin nibane Emsa gu-gubluꞌan, hen Ëe molye ola ansa wet gulsuk: Em an Zen esa hendep denaban ere mo golak teipsili.” Zen Yesus ensa kirekam gu-gubluka. Hwena epba titi tabin ola kon in zen nama Alap mo golak syal ta gwenan, desa Alap hom kirekam gu-gubirida gweka. Zep nen angkam Yesus onakone anakan tame ul gweꞌan, “Mensa angkam Alap zi niban ola ziaha-en guꞌura, zen eiwa tangan sa ki lwal, hen zen soson tangan wenya zen.” Orep insa Musa Bak han aha-en ulki, zen soson naka hom. Nen mae nakone desa tame ul gweꞌan: Sap Alap Yesussu zere mo bose gubin niban gu-gubluka.
²¹ (7:20)
²² (7:20)
²³ Ahana ansa emki hen enlala gwibin: Men zen Alap mo golak syal ta gwek, zen man beya gwe song gwek, sap zen man juwe gwek.
²⁴ Hwena Yesus an Zen angkam Alap mo golak teipsiꞌira, Zen hendep denaban sa teipsili. Zep zeno weinak dep etan ahana molya teipsiki.
²⁵ Zep ngaya gwen hap de sosonna, zen kitak hendep denaban Zebon lwaꞌan. Zep tingan men zen Alap osan dep Zebon osan yaing gwe-gwenan, Zen desa sa ngaya tabiri. Sap Zen hendep denaban ze gwe gwenda– dekon de neno mae mo abesa Bian hap ayang gul gweblan hap.
²⁶ Zen in zep tangan Yesus sam gwesiꞌira– Zen de nebe mae hap Alap mo golak teipsinkim syal gwenkamye. Sap Zen lalak enna hen enho kles gwesin sremna, hen karek maena hom golka. In zep zebe hap dena angkam dakastiꞌin– nen makare karek gol gwen zi niban de golesiri gwen srem hap denaye. Zen in zep hendep Alap zebe hap golblaka– Zen de teipsin tangankam ngatan zi mo lang nakon nesa irik gin hip denaye.
²⁷ Zep Yesus man tangan ahakore Alap mo golak de teipsin-teipsin wenya kwei-kwik guꞌura. Sap Zen hom dwam gweka– nonol zere en mo karek-karek hap de mwin-mwankam sapi-kambingsi Alap hap tru tasik gweblan hapye, kire hwena etan aha zi mo karek-karek hap hen tru tasik gwizimdin hip. Hwena Zen kim aha-rokꞌnen zere mo timni golguku, te-lidak sonnak de tan hap, Zen dekam zep tingare neno mae mo karek-karekna hendep denaban ngan gulsuzimki.
²⁸ Zep titi tabin ola in kon kim zini dam dasik gwibirin, zen de Alap mo golak teipsinkim syal gwe-gwen hap, zen nen makare karek gol gwen naka hen dam dasik gwibirin. Hwena titi tabin ola in mo tahannak, zao zep Alap zere mo bose gubin niban zere mo Tanena insa anakan dam tasiki, “Em an Zen esa hendep denaban ere mo golak teipsili.” Sap Yesus Zen mes Alap mo zebe hap de dwam gwibir-blinna kitak tangan sul soneka.