Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ual᷊ingu ene, tangú i kitẹ e měngal᷊ingko su manga těntiro tuhụ e mạanụeng kal᷊ahuntimadu pẹ̌bawiahu taumatan Sahani, kụ abe kawe kětạeng měngindunụ su těntirong agamang kitẹ humotonge. Kumbahang i kitẹ e saụ mělukạ u těntiro kụ seng pinamal᷊ohẹ̌ e, u taumata e hinong mẹ̌tobatẹ̌ bọu mẹ̌koạ kal᷊awọu sạbarang haghi tạ kěhase, kụ hinong mangimang su Mawu Ruata e,
2 arau su wanggilu těntirong hal᷊ẹ̌ u pananahani arau mạanung pěnaněllidu l᷊ima su taumata, arau mạanun pẹ̌bawangung u taumata nate e arau hukumang kakalẹ̌.
3 Kereu Mawu e mapakawalang kitẹ e ute mahịe i kitẹ dumakịkowe sol᷊ong manga těntiro tuhụ e!
4 Batụu i sai-saing kụ seng timal᷊ikudẹ̌ e, semben tawe ikawihing kapia. Nạung kal᷊imona e i sire seng su ral᷊ungu tualag'u Mawu Ruata kụ sembeng nakateěng laonggọ e. I sire e sembelaing balạewe kawasang Rohkẹ̌ u Ruata e.
5 I sire nasingkạ bọu kinapěndangeng i sire u hengetangu Mawu Ruata e kai mapia, kụ i sire seng nakatemang kal᷊awọu tatal᷊ěntụ napenẹ u kawasa su tempo kạděntane.
6 Arawe samuring ene i sire kawe tumatal᷊ikudẹ̌! Kụ kawe makoạ kereapa měmihing si sire kapia tadeạu saụ kapia mẹ̌tobatẹ̌ bọu kal᷊awọu rosan sire. Batụu i sire kai kapẹ̌ngẹ̌nguruise Ahus'u Ruata e lai ringangu mạpakasamed'i Sie su těngon lawọ.
7 U ěntana kụ měnẹ̌něsụ akẹ u tahiti e masau mahondosẹ̌ su wowone, kụ bọu ene mapatendangu manga sasuang piạ ual᷊ine waug'i sai-sain mělẹ̌hěnsinuang e, ěntana ene al᷊amatengu Ruata.
8 Kai kereu ěntana ene kawe mapatuwong ěhe ringangu sumpinị, ute ěntana ene tawẹ gunane, kụ sarung aneěngu Ruata kụ samurine ketewe pakasue ipakatutung.
9 Kai manga anạ u sěmbaụ ikẹ̌kěndagẹ̌, manimbe waweraku kerene, kaiso i kami e mang mạngiaking i kamene. I kami e mạngiaking u i kamene seng nakatarimạ u limembong kapiane, kụ kai kal᷊awọu al᷊amatẹ̌ kere nakoạ buạ u kasasal᷊amat'i kamene.
10 Mawu Ruata e wal᷊inewe Ruata tạ kaadile. I Sie tawe miwawul᷊eng munara kẹ̌koateng i kamene waug'i Sie, ringangu kakěndag'i kamene kụ seng nịtatodẹ i kamene si Sie su tempong nẹ̌tul᷊ungu manga anạ u sěmbaụ tamba pangangimang, nạung kal᷊amona ringangu sarang orasẹ̌ ini.
11 I kami e měkẹ̌kahumang u mal᷊owọko i kamene sěngkatau-sěngkatau e měngkai sěntiniạ mal᷊aigasẹ̌ sarang pangěnsueěnge, sarangkewe i kamene makahombang apạeweng lẹ̌harapeng i kamene ene.
12 I kami e tawe mapulu i kamene kawe tawẹ agise. Kai i kami e kawe mapulu tadeạu i kamene měbiahẹ̌ kere taumata makạtarimạ u apang nikědon Duata e, kahiangkewen pangangimang si Sie ringangu kahiang kakakědangu pěngangampal᷊i kamene.
13 Piạ e Mawu Ruata nẹ̌kědo si Abraham, i Sie kai nẹ̌salu u i Sie sarung mapakasěhụ u apang nikědon'E. Mase ual᷊ingu kawe tawẹu limembong karangẹ e wọu Mawu Ruata, tangu i Sie nẹ̌salu su areng'E sẹ̌sane.
14 I Sie něhengetang ungkuěng, "Iạ e nẹ̌kědo sarung měngal᷊amatẹ̌ si kau ringangu mapakal᷊awọu hěntonu."
15 I Abraham něngampal᷊ẹ̌ dingangu kakakědang, tangu i sie nakatarimạ u apang nikědon Duata e si sie.
16 Kamageng u taumata e mẹ̌salu, ute kawe mẹ̌salu su arengu taumata wal᷊ine kụ limembong karangẹ e wọ'i sie, ute pẹ̌sasalu ene kai mapakasueng kal᷊awọu pẹ̌dararendehẹ̌.
17 Mawu Ruata e kai mapakasahẹ suapang taumata kụ měnẹ̌narimạ u kědon'E, u i Sie tawe sarang měmal᷊ui karakin'E. Kai ual᷊ingu ene hakịu i Sie napakasěgadu pẹ̌sasalun'E su pẹ̌kakakědon'E.
18 Hal᷊ẹ̌ darua ene tawe mawal᷊ui: Mawu Ruata e apawe tawẹ běke měkẹ̌konti e su hal᷊ẹ̌ u pẹ̌kakědon'E ringangu salun'E. Ual᷊ingu ene, i kitẹ apang seng mạkakěllung su Mawu Ruata e, ghẹ̌gěllirangu wawahansang masěgadẹ̌ baugu mangumpaedẹ̌ pakasěgadẹ̌ su pělaharapẹ̌ kụ seng mạl᷊aěmpahẹ̌ su těngong kitẹ e.
19 Pělaharap'i kitẹ e kai kere wal᷊ango nakaị maral᷊ung-dal᷊ung dingangu nakoạ pěngangumbelekang matoghasẹ̌ dingangu tawẹ konsange apa su pẹ̌bawiah'i kitẹ e. Pělaharapẹ̌ ene nẹ̌tahatěpasu ral᷊anse su ral᷊ungu Huang Kasusiange su Wanalan Duata su sorga.
20 Mawu Yesus seng něnul᷊ěntang dal᷊eng sol᷊ong tampạ ene waugu i kitẹ, ringangu selaing nasuẹ̌ sene nakoạ Imang i kitẹ Mawantugẹ̌ e sarang marěngụ-děngụ mẹ̌sul᷊ungu i Melkisedek.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA