Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Erkiteken si e lanai pada siajarken ajaren-ajaren Kristen si pemena, tapi majulah kita ku pelajaren-pelajaren si terbagesen kerna kegeluhen Kristen. Ulanai siulihi pelajaren si pemena, e me kerna nadingken perbahanen-perbahanen si la erguna janah arus tek man Dibata;
2 ntah kerna lakon-lakon pembersihen ras namaken tan ku babo kalak, ntah kerna kekeken i bas si mate nari ras ukumen si rasa lalap.
3 Emaka marilah kita maju! Janah enda me sidalanken adi bage peraten Dibata!
4 Sabap kalak si nggo nundalken Dibata kuga banci ia ibaba mulihken seh jera? Nggo pernah ia nggeluh i bas terang Dibata. Nggo iakapina uga tabehna pemere Dibata, dingen ialokenna baginna i bas pemere Kesah Si Badia nari.
5 Nggo inanamina maka Kata Dibata mehuli, janah nggo igejapna kerna kuasa jaman si reh pagin.
6 Tapi kenca si e murtad ia! Ja nge ia tertegu mulihken seh jera sabap ipakukenna denga ka Anak Dibata erbahanca megombang kalak man BaNa.
7 Taneh si ngaloken udan nge si ipasu-pasu Dibata, e me taneh si peturah sinuan-sinuan si erguna man kalak si nuanisa.
8 Tapi adi taneh e peturah rih ras dukut-dukut, labo ia erguna; banci jadi isumpahi Dibata ia janah kedungenna iciluk alu api.
9 Tapi o senina-senina si ikelengi kami, amin bage gia ikataken kami, kerna kam tek nge kami maka lit i bas kam si terulin si lit pertalinna ras keselamatenndu.
10 Dibata bujur nge. Labo pagi IlupakenNa dahin si nggo idahikenndu e. IingetNa nge keleng atendu nandangi Ia, si icidahkenndu arah nampati teman-temanndu kalak Kristen, subuk si nggo idalankenndu bage pe si paksana idalankenndu.
11 Ngarap kami gelah kerina kam tetap ergiah-giah ukurndu, gelah kai si iarap-arapkenndu e ialokenndu pagi dungna.
12 Ate kami ula min kam mekisat. Tapi nggeluhlah kam ngusih kalak si nggo tek dingen saber, gelah ialokenndu kai si nggo ipadanken Dibata.
13 Asum Dibata erpadan man Abraham, ersumpah Ia maka kai si nggo IpadankenkenNa e IsehkenNa me. Erdandanken labo lit ise pe belinen asangken Ia, emaka GelarNa nge IpakeNa asum Ia ersumpah.
14 Nina, "Erpadan Aku maka Kupasu-pasu kam dingen nterem Kubahan kesusurenndu."
15 Erdandanken saber Abraham nimai padan e, emaka ialokenna kai si ipadanken Dibata e.
16 Adi manusia ersumpah, ipakena gelar kalak si belinen asangken ia. Sumpah e ndungi perubaten-perubaten si lit i tengah-tengah manusia.
17 Dibata ersura-sura kal petangkassa man kalak si patut ngaloken PadaanNa, maka PadanNa e tetap nge. Erdandanken si emaka ersumpah Ia kerna PadanNa e.
18 Dage lit dua erbage si la banci mobah, e me padan ras SumpahNa, janah kerna si dua e tentu Dibata labo erbual. Erkiteken si e kita si nggo ndat perlindungen i bas Dibata, iajuk kal gelah tetap ncikep pengarapen si lit i lebe-lebenta.
19 Pengarapen enda bali ras jangkar i bas geluhta. Pengarapen e aman dingen tetap, janah nggo mentasi kire-kire rumah Dibata si i Surga, janah sangkut nteguh i bas ingan ersembah si arah bas.
20 Jesus nggo leben asaken kita bengket ku je man gunanta. Ia nggo jadi Imam si Mbelin seh rasa lalap rikutken golongen Imam Malkisedek.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA