¹ Yahudi zini, Alap mo golak de teipsin hip zen zini aha-en dam dasik gwenan. Zeno syala, zen zi bose zemka de Alap hon goleyaing gwe-gwen hap– ba maesa de Alap hap gol gweblankam. Hen zeno syala, bol-zaun tangan wenya, zen tingare Yahudi zi mo karek-kareksa dikim tap gulsuk gwizimdin hip de sapi-kambingsi Alap hap tru tasik gweblan hap.
² Okamanak insa Alap mo golak de teipsin hip dam dasik gwibirin, zen hen ki zi tangan. Zen zep aha zisi sae-saekam golelowehe gwenda– tame gun sremkam kim karekna nol gwenanye. Sap zena hen man zenaka enlala gwe-gweblanda, “Aena hen sin-sinni.”
³ Zen in zep nonol zere mo karek-karekna in hap sapi-kambingni tru tasik gwenda, ki zep hwena aha zi mo karek-karek hap tru tasik gwenda.
⁴ Hen zi bejen zenaka dam tasin– Alap mo golak de teipsinkim syal gwen hap. Zen diki Alap Zen dam tasik gwenda– men kirekam orep Harunsu dam tasikike.
⁵ Kristus hen kirekam. Zen Zen hom Zenaka teipsinkim dre neka, hwena Alap ki dam tasiki– anakan kim gublukake, “Em in ano Tane, Ëe mese namen damnak Ënaka anakan kira tanan, ‘Ëe an eno Bian.’”
⁶ Hen aha ayatnak Alap man gubluka, “Em an Zen esa hendep denaban ere mo golak teipsili– orep de teipsin zini Melkisedek Bak mo kimye.”
⁷ Yesus kim okamanak awe nama gweꞌanka, Zen Alap de mas gweblan hap ol mam-mamkam go naban abe ta gweka. Zen man Alapsa anakan taibliblaka, “Zeno sosonna ki– Asa de tin nikon ngaya tan hap denaye.” Hen Zen man Alapsa dawemkam betek gwe-gweblaka, in zep hendep Alap zeno abena dokwak gul gweblaka.
⁸ Zen sap Alap zere mo Tane, hwena Zen hen awe de gwenkam Alap mo zebe hap de dwam gwibir-blin san de sul sonen hap dena anakan tawa gweka, “Ëe hen asa karekna goltowe gwer– men kirekam Bian Asa dwam gweblaꞌaraye.”
⁹ Zen in zep tangan Yesus in Alap mo nwenak dakastilki– zere mo ngatan zi mo langnak de gol tangannak de teipsin hipye. In zep hendep nebe mae hap engaya gwen hap de ausuna Zebon onak hendep denaban lwaꞌan– nen an zen Desa ang e gweblananye.
¹⁰ Zep Yesussu Alap zere mo gol tangannak de teipsin hip dam tasiki– in kim anakan gublukaye, “Em an Zen esa hendep denaban ere mo golak teipsili– orep de teipsin zini Melkisedek Bak mo kimye.”
¹¹ Yesus mo kirekam de Alap mo golak teipsin hip de ola nama beyana– desa de ebe mae hap golzimdin hip denaye. Hwena ebe mae hap sa gwa-gwa gwer– desa de srip gulsuzimdinkimye. Sap em in enlala tihisni.
¹² Diki angkam emaka aha zisi hen Alap mo olkam tawa la gwibiꞌin. Hwena ena hen nama tawa tabin hibe edwam gwe-gweꞌan, sap nonol lonesen nakon de tawa tabinni em desa home kitak tame uꞌin. Em an wal baizil makane nama lowe heꞌan, zebe momkam de taizibin en hap edwam gwe-gweꞌan. Diki angkam tembane drak-draksa emaka olgwen gwibiꞌin.
¹³ Nama de momsa twen gwen zini, zen nama baizili, zep zen hom Alap mo nwenak dikim edakastin hip dena tame nuꞌin.
¹⁴ Tembane drak-drakna zen zise gwen zi hip dena. Sap kire zini zen mes zenaka holokam titi da gwibik– dekam de enho drak-drakkam lowehe gwen hap. Zep zen mes karek naban dawem naban de kles so gwen hap dena tame nuk.