Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nia’ parkaraNa Batara siagang pandudu’na anne pa’rasanganga. He Israel, pilangngeri anne apa kananNa, "Ri anne pa’rasanganga tena kamajarrekang pa’mai’ siagang pangngamaseang, siagang pandudu’na tena naaniA’ salaku Allata’ala.
2 Assumpai ke’nanga mingka tena narupai; paballe-ballei ke’nanga, ammunoi, a’lukkaki siagang a’gau’ bawangi. Katambangi ka’ja’dallanga, siagang sitampe-tampei kajariang pammunoanga.
3 Lanri kammana anjo anne pa’rasanganga la’jari kalotoroki, siagang sikontu apa attallasaka anjoreng lamate kabusuki. Sikontu rupanna olo’-olo’ niaka ri allaka, ri buttaya siagang ri tamparanga lapanra’ kabusuki."
4 Nakana Batara, "He sikamma imanga, teako nia’ ansalakangi yareka angkalarroi ummakKu, nasaba’ ikau ngaseng Kusalakang!
5 Allo bangngiko anggaukangi kasalanga, kammayatompa sikamma na’bia. Lanri kammana anjo laKupanraki Israel, anronnu.
6 Ikau ngaseng, sikamma imanga, tena nujampangiA’, jari ummakKu tena tommo najampangiA’ sa’genna natuju bala ke’nanga. Nutollaki ajarang-ajarangKu. Jari, iNakke laKutolla’ tongko, siagang ana’-ana’nu tena nalaKuani salaku imang-imangKu.
7 Pila’ katambangko jainu, pila’ doraka tommako mae ri Nakke, he ikau sikamma imanga! Lanri kammana anjo laKupinrai pattallassannu: Tenamo nulanipakalompo, passangalinna lanihina mako.
8 A’jari kalumanynyangko lanri dosana ummakKu, lanri kammana anjo erokko angkellai sollanna tulusu’ doraka ke’nanga.
9 Jari lapa’risi’ mako sangkamma ra’yaka! LaKuhukkungko situru’ sikamma panggaukannu.
10 Langnganreko battu ri koro’bang-koro’bang nipassareanga, mingka tuli lacipuru’na nusa’ring. Lanynyombako mae ri rewata-rewata kacopponganga, mingka tuli tenana nakatambang pandudu’nu, nasaba’ nubokoiMa’ untu’ mange anynyomba ri rewata-rewata maraenga."
11 Nakana Batara, "He ummakKu, baji’ anggoro’ salloa kammayatompa anggoro’ berua napa’lanynya’mi pakkullenu untu’ appikkiri’ baji’.
12 Appalakko pangngunju’ battu ri sipolonga kayu! Se’reang takkang ampauangko apa eroka nuasseng! Rapangko sitau baine niaka bura’nenna na’jari pasundala’; nubokoiA’ nampa nupassareang kalennu mae ri rewata-rewata maraenga.
13 Ri tampa’-tampa’ panynyombang barhalaya ri coppo’-coppo’ buluka siagang monconga, anjoreng ngaseng mako assare koro’bang siagang attunu dupa irawanganna poko’-poko’ kayu lompoa siagang copponga leko’na lanri dinging-dinginna anjo tampaka. Mingka apa kale’bakkanna? Sikamma tulolonnu a’jari pasundala’mi siagang sikamma mintunnu bainea a’gau’ bawammi!
14 Mingka tena nalaKuhukkung anjo panggaukanna ke’nanga, nasaba’ manna ikau a’lampa tonjako mange ri sikamma pasundala’ niaka ri balla’ rewataya, siagang assiagang ngasengko ke’nanga assare koro’bang mae ri rewata-rewataya. Annaba tojengi kana-kana angkanaya, ‘Bansa tenaya pammahanna ri passala’na Allata’ala laruntungi.’
15 He ikau ngaseng tu Israel, tena namajarre’ pa’mai’nu mae ri Nakke! Mingka, Kurannuangi Yehuda natenaja nagaukang tongi kasalang kammaya! Teako mangei anggaukangi ibadanu ri Gilgal yareka ri Betel. Teako assumpai anjoreng lanri arenNa Batara mattallasaka.
16 Ikau ngaseng, he tu Israel, sanna’ kapala batunu ngaseng! Antekamma bateKu langkalawakiko sangkamma gimbalaka ri parang rukuka?"
17 Umma’ Israel niallemi pa’mai’na ri barhalaya. Lanri kammana anjo lappassammi ke’nanga kamma.
18 Punna nasa’rimmo ke’nanga lanri angnginung anggoro’, sannammi nyawana ke’nanga assundala’. La’bi nangaiangngangi ke’nanga nihinaya kala nipakalompoa.
19 Lanri kammana anjo lalanynyaki ke’nanga rapang tau niiri’ rianging. Langgappai ke’nanga siri’ lanri koro’bang-koro’bang napassareanga ke’nanga mae ri rewata-rewataya.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA