Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nakana Batara, "Kukamaseangi Israel battu ri ca’dina, Kukioki anakKu assulu’ battu ri Mesir.
2 Mingka pila’ Kukioki anjo anakKu pila’ napakabellai kalenna battu ri Nakke. Angngerangi koro’bang siagang attunui dupa untu’ Rewata Baal siagang rewata-rewata maraengannaya.
3 Padahala’ iNakke angngajari Israel a’jappa, anrakaki lalang pangngamaseangKu. INakke amparakai mingka taerokai angngani.
4 Lanri sikontu pangngamaseangKu naKupa’reppese’ mae ri KalengKu. Kupakaringangi sikontu kasessanna, siagang ri lammoro’na pa’maikKu naKusarei kanre.
5 Mingka taerokai tu Israel ammotere’ mae ri Nakke; lanri kammana anjo musti ammotereki ke’nanga mange ri Mesir, siagang bansa Asyur lamparentai ke’nanga.
6 Bundu’ lompoa lanarapiki sa’genna kota-kotana ke’nanga; lanipanraki sikamma pakke’bu’ lompoa, siagang lania’moroki ummakKu. Nakajariang anjo kammaya lanri naturukinna ero’ kalenna ke’nanga,
7 siagang terasa’na nyawana ero’ ambokoiA’. Jari lanijallakkangi ke’nanga, mingka tena lakkulle allappassangi ke’nanga manna pole nammarrang ke’nanga appala’ tulung."
8 Nakana Batara, "He Israel, tena olonu laKubalang parekang yareka Kubokoi. Maka akkulleko Kuputta sangkamma Adma? Yareka Kupakamma Zeboim? Tena naero’ pa’maikKu anggaukangi anjo kammaya, lanri lompo duduna pangngaingKu mae ri kau!
9 Tena nalaKuhukkungko lalang larroKu; tenamo nalaKuancurukko pole. Nasaba’ iNakke Allata’ala, tena Kusangkamma rupataua. INakke, Matangkasaka, anrurungangko, siagang taerokaMa’ larro mae ri kau."
10 Nakana Batara, "UmmakKu lamminawangi ri Nakke punna ammarrung sa’rangKu rapang singa siagang Kupannekkere’ musunna ke’nanga. Lakkaro-karoi ummakKu nia’ battu lau’ untu’ anynyomba ri Nakke.
11 Battu ri Mesirki lania’ battu ke’nanga sanrapang jangang-janganga linta’na, siagang battu ri Asyur rapang jangang-jangang bodobangkeng. Nampa laKuerang ammotere’ ke’nanga mange ri balla’na. INakke, Batara, anne akkana."
12 (12-1) Nakana Batara, "NakulilingiA’ bansa Israel siagang bicara balle-ballena na gau’ annipuna; bansa Yehuda tulusu’ angngewana ri Nakke, Allata’ala Matangkasaka siagang majarreka.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA