Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Israel rapangi poko’ anggoro’ roasaka rapponna. Pila’ katambangi kalumanynyanna, pila’ jai tongi tampa’ pakkoro’bangnganga napareka. Pila’ kalumanynyangi, pila’ baji’ tongi patung-patunna barhala nasombaya.
2 Anjo sikamma tau a’jekkoa atinna, kamma-kamma anne musti natanggongi hukkunganna dosana. LaNaancuruki Allata’ala tampa’ pakkoro’bangnganna ke’nanga, siagang Naruntungi patung-patung barhalana ke’nanga.
3 Tasalloami nanakana ke’nanga, "Tena karaenta nasaba’ tena nakimalla’ mae ri Batara. Apa matu-matunna se’rea karaeng mae ri katte?"
4 A’bicara kosongi ke’nanga siagang appareki janji takontutojeng siagang anynyikkoki parjanjiang tenaya matu-matunna. Naputara’ baleki hukkunga ke’nanga, sa’genna attimbomo tenaya naadele’ rapang lamung-lamung a’racunga ri koko le’baka nibingkung.
5 Pandudu’na Samaria lamallaki; ke’nanga siagang imang-imanna ke’nanga allayania ri anjo sapi bulaenga ri Betel lasi’nai siagang langngarruki lanri lanynya’mi sikontu kalompoanna anjo barhalana ke’nanga.
6 Anjo barhalaya laniengkaki mange ri Asyur untu’ nihadiakang mae ri karaeng lompoa. Naturuki Israel rancana angngerangai ke’nanga mae ri nipakasirika siagang nipakatunaya.
7 Laancuruki Samaria siagang lanierangi karaenna a’lampa rapang sipolong kayu nianyukanga ri je’ne’.
8 Sikamma balla’ rewata niaka ri bulu’-bulu’na Betel tampa’na tu Israel anynyomba barhala, laniancuruki. Katintinga siagang rukuka lattimboi ri tampa’ pakkoro’bangnganna ke’nanga. Nampa lammarrang ke’nanga mae ri moncong-monconga angkana, "Tongko’mi ikambe!" siagang mae ri bulu’-buluka angkana, "Tujumi ikambe!"
9 Nakana Batara, "Baku’ kajarianga ri Gibea, tenammariapi tu Israel a’gau’ dosa angngewa ri Nakke. Lanri kammana anjo ri Gibea tommi ke’nanga lanatuju pa’bundukang.
10 LaKubunduki anjo tau dorakaya ngaseng siagang laKuhukkungi ke’nanga. Lasita’gala’ kabusuki bansa-bansaya untu’ ambaliangi ke’nanga, siagang lanihukkungi ke’nanga lanri anjo dosa jaina ke’nanga.
11 Riolo Israel sanrapangi sapi rungka le’baka nilati baji’, na nangai allessoroka gandung. Tena naparallu Kusarei pisangngang salangganna ga’gaya. Mingka kamma-kamma anne le’ba’mi Kupattantu angkanaya musti anjama battalaki. Kusuroi Yehuda appa’jeko, siagang Israel Kusuroi a’nangkala.
12 Kukana, ‘He Israel! Apparekko koko beru untu’ kalennu, kiori siagang bine kaadelang, siagang akkatto mako barakka’ naerang poleanga mattojeng-tojenna pangngainu mae ri Nakke. Nasaba’, narapi’mi wattunnu untu’ amboyA’, Bataranu. LabattuA’ untu’ ampaturungangko bosi barakkakKu.’
13 Mingka ikau nugaukangi apa kabalekannaya; appattujuangko mae ri kaja’dallanga, siagang akkattoko tenaya naadele’. Nukanrei rappo-rapponna wassele’ balle-ballenu." Nakana pole Batara, "He bansa Israel, lanri nupattoanna kareta-kareta pa’bundukannu siagang jaina tantaranu,
14 jari lanitujumi ra’ya’nu ri pa’bundukang, siagang sikontu pattahangannu laniancuruki. Pattallassannu la’jari sangkammai ri allonna Karaeng Salman napanraki kota Bet-Arbel lalang pa’bundukang, siagang nalissarrang sikamma amma’-ammaka siagang ana’-ana’na.
15 Iami anjo apa lakajarianga mae ri kau ngaseng, he pandudu’na Betel, lanri le’ba’na nugaukang kaja’dallang lompoa. Ri wattu ammumbana alloa ri bari’basaka, tasalloapi appakkaramulana bunduka, nalamatemo karaennu."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA