Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Bangsa Israel bali kap ras batang anggur si meramis buahna. Reh senangna akapna, reh buena ipajekkenna batar-batar. Reh buena idatca ulih jumana, reh jilena ka ibahanna tiang batu si man sembah-sembahenna.
2 Bangsa si pusuhna dem alu guak e, genduari la banci lang ngenanami kiniseran erkiteken dosana. Iperperken Dibata me batar-batarna e dingen batu sembah-sembahenna e IkernepkenNa.
3 Emaka ikatakenna me genduari nina, "La lit rajanta erkiteken la kita mbiar man TUHAN. Tapi kai kin lakonna raja man banta?"
4 Ibelaskenna kata la tuhu, padanna padan palsu, dingen perpadanenna la erguna. Kebujuren nggo salih jadi kelabujuren, turah desken dukut si erbisa i bas juma si nggo itenggalai.
5 Kalak si ringan i kuta Samaria mbiar dingen suhsah erkiteken kebenen lembu emas si i Betel. Ia ras imam-imam berhala e tangis perban si e. Ngandung ia kerina erkiteken emas mulia si lit i bas gana-gana e itangtangi.
6 Gana-gana e ibaba ku Assur jadi persembahen man raja si mbelin e. Israel igombangi dingen ipemela-melaken erkiteken nasehat si la uli si iikutkenna.
7 Rajana ibabaken desken karap-karap iombakken lau.
8 Pajuh-pajuhen Israel si i datas uruk-uruk i Awen, ikernepken me. Rambah duri ras dukut turah i babo batar-batarna. Erlebuh me bangsa e kempak deleng-deleng nina, "Tamburi min kami!" janah man uruk-uruk nina, "Tutupi min kami!"
9 Nina TUHAN, "Bangsa Israel la erngadi-ngadi erdosa mulai kin i Gibea nari. Emaka pecah me perang i Gibea ngkenai ia.
10 Kuelis-elis me bangsa si perdosa enda dingen Kuukum ia. Bangsa-bangsa pulung ngelawanca dingen iukum me ia erkiteken dosana si mbue e.
11 Mbarenda Israel desken lembu jarah-jarah si terajar; katawari pe sikap dingen nggit ngerik gandum. Tapi nggo Kutetapken namaken pasangen ku kudukna si mejile e gelah idahikenna dahin si terberaten. Kubahan Juda ngerintak tenggala dingen Israel ngeroka.
12 Ningku man bana, 'Tenggalailah juma si mbaru, suankenlah kebenaren, dingen peranilah ulihndu patuh man bangKu. Nggo seh paksana kam mulih ku Aku, TUHAN, maka Aku reh dingen encurcurken kebenaren man bandu.'
13 Tapi kepeken isuanndu kejahaten dingen iperanindu buahna. Nggo ipanndu buah guakndu. Perban ernalem kam man gereta perang ras tenterandu si mbue,
14 emaka reh me perang ku tengah-tengah bangsandu, janah kerina bentengndu ikernepken. Bali me e pagi ras paksa Raja Salman, tupung ikernepkenna kota Bet-Arbel i bas perang. Nande ras anak-anakna idampeskenna seh mate.
15 Si eme pagi jadi man bandu, o anak kota Betel, erkite-kiteken kejahaten si mejin si nggo ilakokenndu. Nggo kenca pagi perang ibenaken, raja Israel minter mate."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA