Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Tuamai, koligai baí mobalajardon kita kon totunduí mo'iduduimai na'a soaáḷ naonda ing kobobiag saḷaku intau Keresten inta moguyangdon im pororai. Dona'aidon tongaí umuran mopobui-buimai kon totunduí inta muna. Musti mogogai mogaid kon inta diaí im baragunanya bo musti mopirisaya ko'i Allah,
2 ande totunduí inta pinodoyon kom baptisan andeka soaáḷ momarakat kon intau ande soaáḷ kobiagan bui naonda im matoi, andeka doman soaáḷ kobiagan mononoi.
3 Bo tuatadon in aidan naton, aka ogoian i Allah ing kasampatan.
4 Sim mosia inta pernah sinimbayagan ing ginanya, inta pernah nokorasa kon totabi i Allah bo pernah noko'ulií kon silai kom banu in Roho Mokudus,
5 bo inta ain notarima kom pirman inta mopia nongkon i Allah bo kawasa mita in dunia inta kon singgai mo'iduduimai,
6 ta'e nonolikudon bui, yo diaí bidon bui in sia tomobaguon komintanpa simbaí mogogaidon mogaid kon inta diaí mopia, sim mosia tua im buibií mopopakuí kong kayu pinoyotalempang ko'i Adií i Allah sing kopontingan monia tontanií bo moningkule ko'i-Nia kon tayowon intau moaíntoí.
7 Butaí inta umuran ko'uyanan bo mobogoi in hasil kom bayongan pinomuḷa inta baraguna kon intau monononggobaí, barakatanbií i Allah im butaí tatua.
8 Ta'e aka tongaí kobiagan im padang bo bayongan diaít, daí diaí im baraguna im butaí tatua sahingga kutukon i Allah bo pangabisannya pokakon modait.
9 Ta'e, utat mita inta kinotabiku, umpakah natua in singog nami, ta'e kinota'auan bidon nami im mo'ikow. Noyakinbií ing kami kom mo'ikow notarima bidon kon soaáḷ inta mopia, tuata im barakat mita inta mokosaḷamat ko'i monimu.
10 Sing ki Allah im moaídilbií. Diaíbií koliongan-Nya onu inta ain inaidan monimu ko'i-Nia, bo tabi inta pino'ontong monimu ko'i-Nia wakutu in notuḷung kon utat mita inta tumpaḷa mopirisaya ko'i Kristus tungkuḷ intua bo masa in tana'a.
11 Ibogon nami baí mo'ikow komintan umuran morigon ing gina bo totu-totu'u mopirisaya kowakutu im mobiagpa, sahingga mo'ikow motarima kon onu inta i harap makow monimu tua.
12 Dona'ai mokopomaḷas, ta'e duduiaidon aid in intau mita inta ain notarima kon onu inta pinodandi i Allah, sim mosia umuran nopirisaya ko'i Allah bo nosabar doman makow in nogoḷat.
13 Si wakutu ing ki Allah nodandi ko'i Abraham, nongibot in Sia kon totu-totu'ubií mobalií onu im pinodandi-Nya tatua. Bo lantaran diaíbií im moḷantu-ḷantud nongkon i-Nia, daí nongibot in Sia pinodoyon kon tangoi-Nya tontanií.
14 Nana'a ing kai-Nia, "Aku'oi modandi kom barakatan-Kubií bo baliíon-Kubií mobayong ing katurunanmu."
15 Nosabar ing ki Abraham nogoḷat kon dandi tatua, sahingga no'uliínya onu inta pinodandi tatua i Allah.
16 Aka intau bo mongibot, yo mongibotbií in sia podoyon kon tangoi in intau inta moḷantu-ḷantud nongkon inia, daí ibotnya tatua monginggamaídon kom bayongan bobayowan.
17 Ki Allah mo'ibog mopoyakin bui kon intau mita inta motarima kon dandi-Nya kon diaíbií baḷuian-Nya in roncana-Nya tatua. Manangka intua Sia nongibot bui.
18 Doyowa nopasaḷ tatua in diaíbií mobaḷu-baḷui: Totu'uonbií i Allah in dandi bo ibot-Nya tatua. Sia diaíbií monguboḷ. Manangka intua kita inta umuran umoliung ko'i-Nia, umuran-Nya inogoian in ropot baí umuran kumadai kon onu inta i harap makow kon tayowon naton.
19 Onu i harap makow naton tua naonda bo jangkar inta no'ikanom makow kon tampat inta modaḷom totok bo nobalií kokadaian inta moropot totok bo mokoaíman kong kobiagan naton. Onu inta iharap makow tua ain no'idapot in ruangan inta totok im mosuci kom Baḷoi Tuhan kon soroga.
20 Aim binontangan i Yesus in daḷan bayaían naton tatua, Sia sinumuotdon kon tua bo nobalií Imang naton Imang Moḷoben inta diaídon mato-matoi naí ki Imang Melkisedek.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA