Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Oto kalulut néné, kauan tariu-riuaké kam tagelai kam tuppainia, iaté siorak ka pagalaiat imakebbukat puririmanuanda tai Kariten. Buí sarat masipatup-tup pagalaiat pubakkanan siboikí ka aratta. Buían taoleaké kam mitsá tagelai kam ka pubakkanannia, kelé, masikua, taariaké kam masigalaiaké sitá lulu, samba buítá matonem bagatta ka tubut Taikamanua,
2 elé sigelaiakenen pagalaiat pasiraukat, elé pagalaiat masisukat'aké sirimanua, samba pagalaiat tusuru mitsá ka simamatei elé ukuman teret buru-burú.
3 Maerú peilé, ké iteúaké baí nia Taikamanua, tariu-riuakéan lé kam tagelai tuppainia!
4 Aipoi ka sia sisik-sik tei-teina, táan iagai itupalulu sia mitsá bulé ratoili. Siboikí poí ka sia néné, ain sia mukukuddu ka pató sibara ka Taikamanua, samba arapuuktungingan panguruatnia. Sia leú et aisop-sop'an ka tubudda Ketsat Sipunenan.
5 Bulat araagaian kolounia ka puririmanuanda néné, pueerúnia tiboiet Taikamanua, sambat aiagaian tubudda panguruat sipulugege sipuaaili ka gogoi sibabara.
6 Tápoi lepá sik-sikrangan tei-teira! Kaipangan lé iooi itupalulu sia mitsá, bulé rabauaké paatuatda ka jodda. Aipoí aian lé rapapattáaké mitsá Togat Taikamanua ka loiná siliktenga, samba sibaraaké katuloloiat oninia ka matat siberikabaga.
7 Aipoí polak sipasipopot-pot urat simarei-rei belé ka uddutnia, lepá baraakénangan siureman sibailiu puuktunganda sirimanua sipasikeli mone, oto polak néné te ipanunukani Taikamanua.
8 Tápoi polak sitútúaké boro-boroi sambat bek-bekkurut geti, bulat tá anai lulunia polak néné, itetelei lé nia Taikamanua, lepá labó pí.
9 Tápoi ale kam Sasaraina simanuntut bagamai, kenanen kukukua kai kisedda, ka tubumui geti ka kam, matonem bagamai. Matonem bagamai sisilómui sisaliu erú peilé, iaté panukanan kelé oniakenen leú rubeiat puaragatmui.
10 Simaadil lé poí nia ka sia Taikamanua néné. Bulat tá ikakalipogi sangamberinia sigalaiakenenmui ka tubunia, samba nuntut baga sipatoilámui ka tubunia, ka tetret anurop'aké kam sasarainamui sikeré tonem baga, siburú samba leú et kineneiget.
11 Bulat aikubebesíaké kai bulé imariu-riu puroron paatuatmui, pat aili kalepakatnia, elé pat silómuian apa kiddiyet bagamui.
12 Tá kuobá kai ibailiu kam sitaimamalá tubu. Tápoi bulat besíakenenmai geti iaté, bulé ibailiu puririmanuamui néné kelé puririmanuanda sisiló sangamberi sitonéakenen Taikamanua, kalulut tonem bagamui ka tubunia samba kalulut nge-ngenaakémui nia ka om baga.
13 Ka tetret aigalai palelengannia ka tubut Abraham, Taikamanua, amusuppa nia masikua puaaili nia sitonéakenennia. Oto kalulut tá poí anai sisaliu buaknia, bailiu pusuppanangan leú et ka oninia.
14 Kuanangan, "Kutonéaké ka matam, bulat kususukat'aké te ekeu, sambat kuiigiaké te sia sapunuteteunu."
15 Kau ka sia si Abraham ngena ka om baga. Kalulut néné, silónangan nia si Abraham sangamberi sitonéakenen Taikamanua ka tubunia.
16 Ké musuppa bai sara sirimanua, pusuppanangan ka oninda sabagei simabuak peilé ka tubunia, oto suppa néné te masilelepáaké paukelat.
17 Iobá iron'aké palelengannia néné Taikamanua ka tubudda sisiló palelengannia, masikua taisisiliyna nia sipinaatunia néné. Oto iaté lulunia aituppai suppa ka palelengannia.
18 Karuania néné, tá isisiliy: Aipoí ka sia Taikamanua tá paboboko nia ka palelengan sambat ka suppania. Oto sita sipukukunem ka tubut Taikamanua, tutubbui sita simakopé bulé taomet'aké kam simaron karonietta sikukuddu ka matatta.
19 Pukakaronanta néné iaté, kelé sara sao situaalup simakopé keru ka baga, sibailiu omet'akenenta simaron sambat bulat táan ipagegeu-geu purimanuaiatta néné. Iageti pukakaronanta néné pat tebeknangan komang kekret Bilí Sipunenan ka Uman Taikamanua ka manua.
20 Aipapangan Jesus enunganta sieei sedda, samba atugurúan nia sedda bailiu Imam Sabeu ka sita teret buru-burú, kelé kai Imam Melkisedek.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA