Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ngaceku ineh, do' tau ugka' ratnan ngegala' bada' Keristus luk pun-pun ineh. Do' ngetacu amé' inan luk meriput, idi aleg tau ngerareng diri teh, ieh ineh dengan bada' uren ratnan kekamen luk nguit macing inan até, idi anu inan Allah,
2 bada' ratnan rereb, bada' ratnan ngerareng ticu' luun lemulun, bada' ratnan tui lun naté teh, idi ukum luk meruked.
3 Do' tau amé' pa atun! Idi ini luk ruen tau, kudeng tau simén Allah.
4 Ngaceku kudeng apeh lemulun luk pangeh nelemubed miak kiuten pad uren teh? Atun ideh bang acang Allah. Ideh pangeh kali' baré luk rat surga ineh, idi pangeh nengalap babpat ratnan Roh Meligan.
5 Idi ideh kali' bala Allah luk do' ineh, idi amung-amung lalud bang kareb luk miak macing teh.
6 Idi muci ideh neraruh, pad ideh na miak iteh sekua' teh amé' inan uren, ngaceku Anak Allah ineh sinalibdeh, idi ideh nengigu' Neneh pa kiung lun mula'.
7 Allah ngeperuan tana' luk megéi' ngalap abpa' udan temurun luunneh idi luk ngeruat irin-irin luk inan ulek kuan lemulun luk nibu ineh.
8 Iamo' kudeng tana' ineh ngeruat tabpa' idi bitarung, ieh talan idi ieh lélé uen ngediman idi kekipedneh miak sabpen.
9 Sagan pana' kai pebala kudeng ini, O muyuh luk inanku mawa, kai merapet nemuyuh pangeh nengalap peruan luk meluun do' idi luk macing inan ulun luk meruked.
10 Ngaceku baken Allah na matu, idi Ieh na mekelupan ratnan, kekamen muyuh idi awa muyuh lu ginala' muyuh kuanNeh, kareb muyuh nengasa' nelun manu atun, idi macing nekini teh.
11 Kai rayeh rapet pad anid-anid burur muyuh mekél macing kekipedneh, pad amung-amung luk inan muyuh merapet miak mangun.
12 Na kai pian muyuh mekupé, iamo' do' muyuh mepad kudeng lemulun iamo' do' muyuh mepad kudeng lemulun luk manu idi mulai niat, pad muyuh ngalap amung-amung luk pijani' Allah.
13 Kareb Allah nepejani' ni Ibrahim, Ieh nepebulung pad Ieh pejani' nganau' luk pijani'Neh ineh. Ngaceku na luk meluun rayeh ratnan bururNeh sebuleng, Ieh nepebulung bang ngadanNeh sebuleng.
14 KebulungNeh, "Ui pejani' ngeperuan namu, idi ngula' inulmu."
15 Ibrahim ine mulai niat idi ieh nengalap pejani' Allah ineh.
16 Kareb lemulun pebulung, ieh makai ngadan lemulun luk meluun rayeh ratnan bururneh sebuleng, idi bulung ineh ngagka' amung-amung saad arang lemulun.
17 Allah sikal ngegala' tu-tu kuan lemulun luk miak ngalap luk pijani'Neh, ratnan Ieh na ngisu' terawéNeh. Ngaceku ineh Ieh nengetueh jani'Neh dengan aceh bulung.
18 Ngaceku ineh, inan dueh punneh luk na misu', idi Allah na mebalih ratnan ineh. Idi tau luk paneh nengalap ulun bang Neneh, miak ngalap kuu', pad tau ngimet meraben rapet ineh luk pangeh rireng pa kiung tau.
19 Rapet ineh mepad kudeng betuh niat tau. Rapet ineh lutep idi meraben, idi lemaba dicing Ruma' Allah déi' surga,
20 su luk inan Yésus pangeh nesemuet ngaceku tau, mangun ku Luk Atun ineh, ngaceku Ieh pana' pangeh mangun ku Imam Rayeh ruked-ruked maya' adat Melkisedek.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA