Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai nini halak Efraim ma hu bani, “Mase ma sonai pambahenmu bennami, ai lang iarahkon ham hanami marmunsuh dompak halak Midian? Banggal tumang do hutuk ni sidea bani.
2 Tapi nini ma dompak sidea, ʻAha ma na hubahen in anggo na partimbangkon hubani na binahen nasiam?ʼ Ai lang dearan do parturiangan ni halak Efraim humbani pariama buah anggur ni halak Abieser?
3 Hubagas tangan nasiam do iondoskon Naibata raja ni halak Midian, ai ma si Oreb pakon si Zeeb, aha ma na hubahen anggo ipartimbangkon hubani nasiam?” Jadi dob ihatahon sonai, mahombun ma ringis ni sidea dompaksi.
4 Jadi dob das si Gideon hu Bah Jordan, mandipar ma ia rap pakon hasomanni na tolu ratus halak ai, domma loja, tapi sai inunut do mangayak-ayak.
5 Nini ma dompak parhuta Sukot, “Tolong nasiam ma mambere otik roti bani halak na mangirikkon ahu on; ai domma latih sidea, anjaha na mangayak-ayak si Zeba pakon si Salmuna raja ni halak Midian do hanami.
6 Tapi nini pangintuai ni huta Sukot ma, ʻDomma ondos gakni tangan ni si Zeba pakon si Salmuna hubagas tanganmu, ase bereonnami ruti hubani balamu?ʼ
7 Dob ai nini si Gideon ma, ʻAnggo sonai, ia dob ibere Jahowa si Zeba pakon si Salmuna hubagas tanganku, bogboganku ma angkula nasiam bani duri ampa tatada na hun halimisan.ʼ”
8 Dob ai tangkog ma ia hunjai hu Penuel, anjaha ihatahon ma sonai hubani sidea, tapi ibalosi par Penuel ma ia songon parbalos ni par Sukot ai.
9 Dob ai nini ma homa dompak par Penuel ai, “Anggo mulak ahu horas-horas, parreongonku ma manara on.”
10 Tapi anggo si Zeba pakon si Salmuna i Karkor do rap pakon bala ni sidea, hira-hira sapuluh lima ribu halak bueini, ai ma sagala na tading ope humbani ganup bala ni halak parhapoltakan; ai domma rasei saratus dua puluh ribu halak na marsinjatahon podang.
11 Ia si Gideon, tangkog do ia hun dalan ni halak siiani lampolampo hampit hapoltakan ni Nobah pakon Jogbeha, anjaha idorab ma bala ai, na so panagaman ni sidea.
12 Maporus ma si Zeba pakon si Salmuna, tapi ipardakdak si Gideon ma sidea anjaha dapotsi do na dua raja ni Midian ai, si Zeba pakon si Salmuna, anjaha mambur merap do ganup bala ai ibahen.
13 Dob ai mulak ma si Gideon, anak ni si Joas hun parporangan hun tangkogan Heres;
14 itangkap sidea ma sahalak garama parhuta Sukot ai, isungkuni sidea ma ia; jadi isurati ma goran-goran ni pambobai pakon pangintuai-pangintuai ni Sukot bani si Gideon, pitu puluh pitu halak bueini.
15 Dob ai laho ma ia hubani parhuta Sukot anjaha nini ma, “Andon ma si Zeba pakon si Salmuna, marhalanihon ni sidea domma iapasi nasiam ahu, pala ihatahon nasiam, ʻDomma gakni ondos hu tanganmu si Zeba pakon si Salmuna, ase bereonnami ruti hubani balamu na loja in?ʼ”
16 Dob ai itangkapi ma pangintuai ni huta ai, ibuat ma pakon duri ampa tatada na hun halimisan, ijora ma sidea marhitei ai.
17 Tapi iparreong do manara ni Penuel anjaha ibunuhi parhuta ai.
18 Dob ai nini ma dompak si Zeba pakon si Salmuna, “Ija do halak na dob binunuh nasiam i Tabor? Balos ni sidea, ʻUsih do sidea hu bamu, ganup songon rupa ni anak ni raja-raja.ʼ
19 Dob ai nini si Gideon ma, ʻSaninangku do sidea, anak ni inangku. Songon sintongni manggoluh Jahowa, ambit na ipagoluh nasiam sidea, seng bunuhonku nasiam.ʼ
20 Jadi ihatahon ma hubani si Jeter bunga tubuhni ai, ʻBunuh ma sidea!ʼ Tapi seng ra garama ai manintak podangni, halani mabiar ia, ai poso ope ia.
21 Nini si Zeba pakon si Salmuna ma, ʻHam sandiri ma jongjong mamunuh hanami, ai sonin halak, sonai do gogohni.ʼ Jadi jongjong ma si Gideon, ibunuh ma si Zeba pakon si Salmuna; anjaha ibuat ma jagar-jagar na bani borgok ni unta ni sidea.”
22 Dob ai nini halak Israel ma dompak si Gideon, “Rajai ma hanami, age ham, age anakmu, age pahompumu, ai ham do na paluahkon hanami hun tangan ni halak Midian.
23 Nini si Gideon ma mambalosi sidea, ʻSeng ahu marrajai nasiam, anjaha seng anakku marrajai nasiam, Jahowa do na marrajai nasiam.ʼ
24 Ambah ni ai nini si Gideon ma, ʻSada do na hupindo humbani nasiam: Ganup ma nasiam mambere bangku anting-anting omas taban-tabanni bei. Ai maranting-anting omas do sidea, ai halak Ismael do sidea.ʼ
25 Nini sidea ma mambalosi, ʻRa do hanami mamberehon ai.ʼ Jadi dob ipaherbang sada hiou, ganup ma sidea mannahkon anting-anting taban-tabanni ai hujai.”
26 Ia borat ni anting-anting omas na pinindoni ai saribu pitu ratus sekel omas do, legan ni ugas-ugas na songon bulan sasabi, ugas na i pinggol pakon hiou hasumba na pinakei ni raja-raja ni halak Midian, legan ni horungkorung na i borgok ni unta ni sidea.
27 Dob ai ibahen si Gideon ma ai gabe baju efod, ipajongjong ma ai i hutani i Ofra. Ganup halak Israel marsombah ma hujai, anjaha gabe tirangkap ma ai bani si Gideon pakon ginomparni.
28 Sonai ma partunduk ni halak Midian ibahen halak Israel, seng boi padurgak uluni bei; jadi marsonang-sonang ma tanoh ai ompat puluh tahun dokahni bani panorang ni si Gideon.
29 Mulak ma homa si Jerubbaal, anak ni si Joas, lanjar marianan i rumahni.
30 Adong do anak bani si Gideon pitu puluh halak, na pinupusni, ai buei do parinangonni,
31 sonai homa siampar apeini i huta Sikem itubuhkon do sada anak bani, anjaha ibahen ma goranni si Abimelek.
32 Dob ai matei sayurmatua ma si Gideon anak ni si Joas, anjaha itanom ma i tanoman ni si Joas, bapani ai, i Ofra, tanoh ni halak Abieser.
33 Dob matei si Gideon, marbalik ma halak Israel, isombah ma Baal, anjaha ibahen ma Baal-Berit gabe naibata ni sidea.
34 Seng idingat halak Israel be Jahowa, Naibata ni sidea, na paluahkon sidea humbani munsuh ni sidea inggot.
35 Seng homa ipataridahkon sidea tarima kasih ni uhurni bani ginompar ni si Jerubbaal, ai ma si Gideon, balos ni ganup na madear, na binahenni hubani halak Israel.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA