Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Sikalipi pole, dorakamiseng umma’ Israel mae ri Batara. Sa’genna nibalang parekang ke’nanga nikoasai ri bansa Midian tuju taung sallona.
2 Lanri malla’ duduna tu Israel mae ri tu Midian, sa’genna mangemi ke’nanga accokko lalang ri kali’bong batu, yareka ri tampa’-tampa’ amanga ri moncong-monconga.
3 La’biangampa anjo pole sitabang a’lamung-lamung tu Israel pamarria battumi tu Midian siagang tu Amalek, kammayatompa tu maraengannaya battu ri parang kassika ambunduki tu Israel.
4 Appareki kema ke’nanga ri daerana Israel na napanraki ngaseng sikontu lamung-lamunga appakkaramula ri anjo daeraya sa’genna ri timboranna Gaza. Kammayatompa olo’-olo’na tu Israel kammaya gimbala’, sapi, siagang keledai nalariang ngaseng ke’nanga. Sa’genna manna apa-apa lanakanrea tu Israel tena sikalimo.
5 Pila’ sanna’ jaina tu battu angngerangi olo’-olo’na siagang appare’mi kema ke’nanga, sanna’ jaina. Punna lanirekengi sanna’ sikali jaina ke’nanga, kammayatompa onta-ontana ke’nanga sanna’ todong jaina. Battumi ke’nanga ampanra’-panraki anjo pa’rasanganna tu Israel.
6 Na tenamo naassengi angkana apamo lanagaukang tu Israel mae ri anjo ke’nanga.
7 Jari akkio’mi umma’ Israel appala’ tulung ri Batara untu’ angngewai anjo tu Midian.
8 Nasuromi Batara se’re na’bi battu mae ri ke’nanga. Nakanamo anjo na’bia, "Kammaminne kananNa Batara, Allata’alana tu Israel; ‘Le’ba’ mako Kulappassang battu ri nipare’ atanu ri butta Mesir.
9 Kupasalama’mako battu ri tu Mesirka siagang battu ri sikamma tuniaka anrinni ia ambundukiako, le’ba’mi Kubongka ke’nanga battu ri anne pa’rasanganga ri wattunna nubunduki ke’nanga, nampa Kupassareang pa’rasanganna ke’nanga mae ri kau.
10 Le’ba’ mako Kupauang angkana iNakkemi Karaeng Allata’alanu. Siagang takukellako anynyomba ri rewata-rewatana bansa Amori, nupammantangia pa’rasanganna kamma-kamma anne. Mingka tena nuturuki parentaKu.’"
11 Ri se’reang allo battumi malaeka’Na Batara ri kota Ofra. Nampa ammempo ri rawanganna poko’ kayu terpentin, iamintu poko’ kayuna Yoas, tu battu ri golonganna Abiezer. Nia’ ana’na niareng Gideon, sitabang anjama ase gandung ri pammaccokang je’ne’ anggoroka. Nagaukang cokko-cokkoi anjo jama-jamanna sollanna tena naniciniki ri anjo tu Midian.
12 Napappicinikammi kalenna anjo malaeka’Na Batara mae ri ia. Nampa nakana, "E, turungka patasa’! Narurungangko Batara!"
13 Appialimi Gideon angkana, "Kipammopporanga’ Batara! Punna kontutojeng angkanaya nirurungangi ikambe ri Batara, angngapa nania’ ngaseng anne kammaya antujui ikambe? Kemaeji anjo sikontu le’baka Nagaukang Batara riolo, siagang nacaritaya boe-boena ikambe antekamma bateNa Batara ampasuluki ke’nanga battu ri Mesir? Kamma-kamma anne nibokoimi ikambe ri Batara. Nabalang parekammaki’ nikoasai ri bansa Midian."
14 Jari nisaremi parenta Gideon ri Batara, angkanaya "Lalang ri sikontu kagassingannu a’lampamako mange allappassangi tu Israelka battu ri kakoasanna tu Midian. INakkemi assuroko."
15 Appialimi Gideon angkana, "Angngapa, na inakke Batara? Maka inakke lakkulle allappassangi umma’ Israel battu ri kakoasanna tu Midian? Lalang ri suku Manasye, golongangkumi kaminang lamma. Na ilalang ri bija pammanakangku, inakkemi kaminang tuna."
16 Nakanamo Batara, "Tantu akkullenu, nasaba’ iNakke lambantuko. Akkullei nuancuru’ tu Midian siagang gampang, sanrapang angkanaya sitauji nudallekang."
17 Appialimi Gideon angkana, "Punna Nangai tojenga Batara, Kisarema’ se’re pammatei manassana angkanaya Batara memang amparentakangi anne passuroa mae ri nakke.
18 Kupalaki naKiero’ antayanga’ rolong anrinni nakupatalangKi’ kanre." Appialimi Batara angkana, "Baji’mi Kutayangko sa’gennu ammotere’."
19 Jari ammotere’mi Gideon. Nampa ammolong sikayu bembe rungka nanapallu. Angngalle tongi sampulo kilo labu’ nampa appare’ roti tenaya nammake pa’gambang. Le’baki anjo napantamami anjo dagenga ri karanjeng. Na je’ne’na napariuringi. Nampa naerang ngaseng anjo, mange napatala ri malaeka’Na Batara, niaka attayang ri rawanganna anjo poko’ kayu terpentinga.
20 Nakanamo malaeka’Na Batara, "Padongkoki anjo dagenga siagang anjo rotia irate ri anne batua, nampa nutumpa je’nena anjo dagenga irateanganna." Nagaukammi anjo Gideon apa nipassuroanga ri ia.
21 Nampa napajonjo anjo limanna malaeka’Na Batara, nanasaremo anjo dagenga siagang rotia siagang cappa’ kayu nata’galaka. A’rinrami anjo batua, sa’genna la’busu’mo akkanre anjo dagenga siagang rotia. Nampa allanynya’mo anjo malaekaka.
22 Naassemmi Gideon angkanaya anjo battua malaeka’ KalenNa Batara. Jari malla’mi Gideon nanakanamo, "Cilakama’ inakke, o Batara Kaminang Mala’birika! Nasaba’ assidallekamma’ siagang malaekatTa!"
23 Mingka angkanami Batara mae ri ia, "Pakasannangi nyawanu! Teako mallaki. Tena nulamate."
24 Appare’mi Gideon se’re tampa’ pakkoro’bangngang anjoreng, nampa naareng "Batara Kabattuanna Kasalamakkanga." Anjo tampa’ pakkoro’bangnganga nia’ iji ri Ofra, iamintu ri kotana tu Abiezer.
25 Anjo bangngia Nasaremi Batara parenta Gideon, angkanaya, "Angngalleko sapina manggenu, ia sapi kaminang bajika, umuru’ tuju taunga. Rumbangi anjo tampa’ pakkoro’bangngang napareka manggenu untu’ barhala Baal. Nampa nurumbang todong benteng pammatei kalompoanna barhala Dewi Asyera, niaka ba’leanna anjo tampa’ pakkoro’bangnganga.
26 Nampa nupaenteng irateanganna se’re tampa’ pakkoro’bangngang ia le’baka nirancana baji’. Nampa nutunu akkayu anjo sapi lakia, untu’ a’jari koro’bang mae ri Batara. Anjo bentenna barhala Dewi Asyera le’baka nurumbang, nupare’ kayu tunuang."
27 Napileimi Gideon sampulo tau atanna, nampa a’lampa mange anggaukangi apa Naparentakanga Batara mae ri ia. Mingka lanri malla’ duduna mae ri bija-bijanna siagang mae ri sikamma tu niaka ri anjo desaya. Tena nabarani anggaukangi anjo ri wattu singara’na alloa jari nagaukang bangngimi.
28 Ri wattunna ambangung ri bari’basa’na tummantanga anjoreng ri kotaya nacini’mi rumbammi anjo tampa’ pakkorobangnganga untu’ barhala Baal siagang bentenna anjo barhala Dewi Asyera. Nacini’ tommi ke’nanga angkanaya nia’mo le’ba’ nibangung anjoreng ri tampaka se’re tampa’ pakkoro’bangngang. Na nia’ tompa le’ba’ nitunu sapi laki untu’ a’jari koro’bang.
29 Massing sikuta’nammi ke’nanga angkana, "Inai anggaukangi anjo?" Ri le’ba’namo nisalidiki, niassemmi angkanaya Gideon, ana’naya Yoas anggaukangi.
30 Nakanamo ke’nanga mae ri Yoas, "Le’baki nabongkara’ ana’nu tampa’ pakkoro’bangnganna Baal. Siagang narumbang tongi benteng kalompoanna Dewi Asyera niaka ri ampi’na anjo tampa’ pakkoro’bangnganga. Lanri kammana, erangi assulu’ anjo ana’nu. Musti nibunoi!"
31 Mingka angkanami Yoas mae ri ke’nanga, "Apaka agang maeko ri Baalka na nuero’ angngalle-alleangi? Inai-nai agang mae ri Baal iami lanibuno anne alloa! Punna ma’nassa Allata’ala anjo Baal, lappassammi naia tommo kalenna larro, lanri nibongkara’na tampa’ pakkoro’bangnganna."
32 Lanri akkana Yoas, "Lappassammi na Baal kalenna angngewai Gideon, lanri nabongkara’na tampa’ pakkoro’bangnganna." Jari appakkaramulami anjo wattua nigallara’mi Gideon "Yerubaal".
33 Anjo wattua asse’re ngasemmi sikontu tu Midian, Amalek siagang suku-suku maraenganga ri parang kassi’ timboranna Binanga Yordan. A’limbangi ke’nanga ri Binanga Yordan, nampa appare’ kema ri Lappara’na Yizreel.
34 Mingka nipimpingi Gideon ri RohNa Batara. Na natui’mo tarompeka angkioki tu Abiezer sollanna battu a’rappungang siagang ia.
35 Nia’ tommo tau nasuro mae ri suku Asyer, Zebulon, Naftali, siagang suku Manasye, ia niaka ri bageang rayanganna yareka ri laukanna binangaya, sollanna a’rappungang ke’nanga siagang ia. Na battu ngasemmo ke’nanga untu’ ambantui Gideon.
36 Nampa nakanamo Gideon ri Allata’ala, "Batara, iKatte le’ba’ angkana erokKi’ ampakea’ untu’ allappassangi umma’ Israel.
37 Punna kamma padeng, ri tompo’na anne buttaya, iamintu tampa’ biasaya napakkattoi ase gandung ikambe, nia’mo bulu gimbala’ kupadongko’, punna ammuko, na ia bawang anne bulu gimbalaka nabasai je’ne’ rammang natena nabasa buttana, iaminjo a’jari butti angkanaya erokKi’ ampakea’ untu’ allappassangi umma’ Israel."
38 Na kammaminjo kajarianna: Ri wattunna ambangung Gideon ammukona bari’basa’, napacco’mi anjo bulu gimbalaka. Nia’mo je’ne’ rammang nagappa simangko’ jaina.
39 Nakanamo ri Allata’ala, "Batara, teaKi’ larroi punna a’bicara ija’ pole. Boli’ma’ kamma appare’ pole se’re pammatei siagang anne bulu gimbala’ nigoncinga. Mingka kamma-kamma anne, ia anne bulu gimbalaka tuli kalotoro’, nabuttana a’jari basa".
40 Anjo bangngia Nagaukammi Allata’ala anjo apa napalaka Gideon. Sa’genna ammukona bari’basa’ kalotoroki anjo bulu gimbalaka, mingka buttana basai lanri je’ne’ rammang.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA