Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kenca bage erdosa ka bangsa Israel man TUHAN, emaka ipelepasna bangsa Midian merentahsa pitu tahun dekahna.
2 Gegehen bangsa Midian asang bangsa Israel, emaka cebuni bangsa Israel i gua-gua ras i bas ingan-ingan si deban i deleng-deleng.
3 Tep-tep merdang kalak Israel reh bangsa Midian ras bangsa Amalek ras suku-suku si ringan i gurun pasir, iperangna bangsa Israel.
4 Ibahanna kemahna i negeri e, janah ikernepkenna sinuan-sinuan seh ku Selatan ku sekelewet Gasa. Ibuatina kerina biri-biri, lembu, kalde, janah lanai lit sitik pe itadingkenna man bangsa Israel guna ngumputi geluhna.
5 Teremna bangsa ndai reh desken labang. Ibabana asuh-asuhen ras kemahna. Teremna bangsa e ras untana la terbeligai perbahan buena. Ia reh ncedai negeri e,
6 emaka bangsa Israel lanai ngasup erbahan kai pe ngelawansa.
7 Kenca bage maka erlebuh bangsa Israel man TUHAN mindo penampat ngelawan bangsa Midian,
8 emaka ibereken TUHAN sekalak nabi si maba berita man bangsa Israel i bas TUHAN nari, Dibata bangsa Israel, "Kubaba kam ndarat i bas perbudaken i Mesir nari.
9 Kupulahi kam i bas bangsa Mesir nari ras i bas bangsa si ngelawan kam i negeri enda. Nggo Kupelawes ia asum kam bengket ku je, jenari Kubereken negerina man bandu.
10 Kukataken man bandu maka Aku TUHAN Dibatandu, maka ula kam nembah man dibata-dibata bangsa Amori, si negerina genduari enda man inganndu nggeluh. Tapi la ibegikenndu Aku."
11 Kenca bage reh malekat TUHAN ku kota Opra kundul ia i teruh batang kecing si Joas, sekalak i bas terpuk Abieser nari. Anakna Gideon sangana ngerik gandum erbuni-buni i bas sada ingan pengeriken anggur, gelah la ia idah kalak Midian.
12 Malekat TUHAN e ncidahken bana man Gideon i je nina, "TUHAN ras kam, o kam kalak si mbisa!"
13 Nina Gideon man malekat e, "Adi banci aku nungkun, ngkai maka kerina kiniseran enda jadi man kami, adi TUHAN kin ras kami? Kai ertina kerina tanda-tanda kuasa si ilakoken TUHAN. Ituriken nini-nini kami maka megati TUHAN ngelakoken tanda-tanda kuasa mabai ia ndarat i Mesir nari. Genduari TUHAN nggo nadingken kami janah IpelepasNa kami ikuasai bangsa Midian."
14 Kenca bage iperentahken TUHAN si Gideon nina, "To pakelah gegehndu si mbelin e guna mulahi bangsa Israel i bas kuasa bangsa Midian nari. Aku jine kap si nuruh kam."
15 Nina Gideon njabapsa, "Tapi uga banci kubebasken Israel? Terpukku kap si la megegehna i bas suku Manase, janah aku si la mehergana i bas keluarga bapangku."
16 Ijabap TUHAN nina, "Banci idahikenndu e erkiteken Aku si nampati kam. Murah pagi iakapndu ngeripukken bangsa Midian e, tempa-tempa bagi ngeripukken sekalak jelma saja ngenca."
17 Nina Gideon, "Adi ngena atendu aku, bereken dage tandana man bangku maka Kam tuhu-tuhu TUHAN.
18 Ula Kam dage lebe lawes seh kubaba ku AdepenNdu sada persembahen pangan." Nina TUHAN, "Kutimai kam seh kam mulihken ku jenda."
19 Emaka lawes Gideon ku rumahna; itasakkenna kambing nguda janah ibuatna sepuluh kilo tepung guna erbahan roti si la tama ragi. Itamana daging e ku bas raga janah kuahna tare kudin, jenari ibabana kerina man malekat TUHAN i teruh batang kecing e, iberekenna man bana.
20 Isuruh malekat e Gideon nina, "Tamaken daging ras roti e i babo batu enda, jenari kuahi." Ilakoken Gideon bagi si isuruh malekat e.
21 Emaka ijaka ras ikuit malekat TUHAN daging ras roti e alu ujung ciken si icikepna. Ndarat api i bas batu e nari janah itutungna daging ras roti e. Kenca bage lanai idah malekat ndai.
22 Jenari ieteh Gideon maka si idahna e malekat TUHAN kap. Emaka nina i bas kebiaren, "TUHAN si Mada Kuasa! Nggo kuidah MalekatNdu petala-tala!"
23 Tapi nina TUHAN man bana, "Dame man bandu. Ula mbiar. Kam labo mate."
24 Ipajekken Gideon batar-batar ingan ersembah i je janah ibanna gelarna "TUHAN eme Dame" (Batar-batar persembahen e pajek denga i Opra; empuna eme terpuk Abieser).
25 I bas berngi e ngerana TUHAN man Gideon nina, "Buat sada jenggi lembu sikerajangen bapandu ras jenggi lembu si deban umur pitu tahun; runtuhken batar-batar persembahen Baal sikerajangen bapandu, tabah tanda berhala Asera si lit i deherna.
26 Pajekken batar-batar si paguh man TUHAN Dibatandu i babo gun-gunen. Kenca bage buat lembu si peduaken, tutung kerinana jadi sada persembahen. Tanda Asera si tabahndu e bahan jadi rantingna."
27 Emaka idilo Gideon sepuluh kalak suruh-suruhenna, guna ngelakoken kai si nggo ikataken TUHAN man bana. Mbiar ia man keluargana ras man kalak kota ngelakoken si e suari, emaka berngi idahikenna.
28 Kenca medak kalak kota e erpagi-pagi, ijumpaina batar-batar persembahen man Baal ras tanda Asera nggo iruntuhken, janah lembu si peduaken ndai nggo itutung i babo batar-batar persembahen man TUHAN si nggo ipajekken i je.
29 Sisungkun-sungkunen ia sapih-sapih ia, "Ise erbanca enda?" Iselidiki kalakna, itehna maka Gideon anak Joas si ngelakokenca e.
30 Emaka nina man Joas, "Baba anakdu e ndarat gelah ibunuh kami. Ia si ngeruntuhken batar-batar Baal ras nabah tanda Asera si lit i deher batar-batar e."
31 Tapi nina Joas man kerina kalak si ngkelewetti ia, "Ikapitindu kin atendu Baal? Atendu nampatisa? Ise si ngkapiti Baal la banci lang ibunuh ope denga erpagi-pagi. Adi payo kin Baal e dibata pelepas isampatina bana. Batar-batarna kap si nggo iruntuhken e."
32 Emaka mulai i jenari Gideon terberita gelarna Jerubaal erkiteken nina Joas, "Pelepas Baal nampati bana. Batar-batarna kap si nggo iruntuhken."
33 Emaka kerina bangsa Midian, bangsa Amalek ras suku-suku si ringan i gurun pasir pulung kerina. Ras-ras ia ngepari Lau Jordan janah erkemah i Baluren Jesreel.
34 Kesah TUHAN ngkuasai Gideon, emaka iembusna terompet ngelebuh jelma i bas terpuk Abieser gelah ngikutken ia.
35 Itenahkenna berita ku kerina daerah Manase ngelebuhsa guna ngikutken ia. Itenahkenna berita man suku Aser, Sebulon, ras Naptali, emaka kalak enda pe reh nampati ia.
36 Emaka nina Gideon man Dibata, "Nindu maka nggo ItetapkenNdu aku mbebasken Israel.
37 Genduari kuamparken sitik mbulu biri-biri i babo taneh i bas ingan kami ngerik gandum. Adi erpagi-pagi e i babo mbulu biri-biri e ngenca lit embun, tapi la lit i babo taneh, emaka nggo kueteh maka IpakeNdu AteNdu aku mbebasken Israel."
38 Payo jadi bage. Sanga Gideon medak erpagi-pagi, iperehna mbulu biri-biri e janah sanga iperehna e ndarat lau i jenari dem sada mangkuk.
39 Emaka nina Gideon man Dibata, "Ula AteNdu nembeh man bangku. Berelah aku ngerana sekali nari. Berelah maka kuuji sekali nari. Sekali enda bere lah maka kerah mbulu biri-biri e janah taneh litap."
40 I bas berngi e ibahan Dibata pas bagi si ipindo Gideon. Pepagina erpagi-pagi kerah mbulu biri-biri e, tapi taneh litap perban embun.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA