Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Bani panorang ai, sanggah lang dong raja i Israel, adong ma sada halak Levi na mardagang-dagang i bona ni Dolog Efraim; ibuat ma sada naboru na legan bahen inang ni anakni hun Betlehem-Juda.
2 Tapi marbangkis ma naboru ai, lanjar laho hun lambungni mulak hu rumah ni bapani, hu Betlehem-Juda, anjaha ijai ma ia hira-hira ompat bulan.
3 Dob ai bingkat ma paramangonni ai mangirikkonsi, laho mangelek-eleksi, ase iboan mulak; juakjuakni pakon saparangguan halode do iboan rap pakonsi. Iarahkon naboru ai ma ia hu rumah ni bapani, anjaha dob ididah bapa ni naboru ai ia, malas ma uhurni manjumpahkonsi.
4 Jadi ijolomi tulangni ai, bapa ni naboru ai ma ia, gabe tading ma ia tolu ari i lambungni, rap mangan, minum pakon marborngin ijai.
5 Jadi paompat-arihon, ipagirah sidea ma sogod ni ai puho, sihol bingkat namin, tapi nini bapa ni naboru ai ma dompak helani ai, “Paulak lobei gogohmu marhitei ruti sansayat, dob ai pe ase bingkat nasiam.”
6 Dob ai hundul ma sidea, rap mangan minum ma sidea haduasi. Dob ai nini bapa ni naboru ai ma dompak dalahi ai, “Mahua balosi ma marborngin anjaha pamalas ma uhurmu.”
7 Tapi jongjong ma dalahi ai laho bingkat namin, jadi ielek-elek tulangni ai ma ia, gabe marborngin ma ia use ijai.
8 Jadi palima-arihon ipagirah ma puho sogod laho bingkat namin, gabe ihatahon bapa ni naboru ai ma use, “Pasonang ma lobei uhurmu, anjaha tading ma lobei tongkin nari, paima guling ari. Lanjar mangan ma sidea haduasi.”
9 Dob ai puho ma dalahi ai sihol bingkat namin, ia pakon parinangonni ampa juakjuakni ai; tapi nini tulangni, bapa ni naboru ai ma, “Tonggor ma domma guling ari, laho bod ma ari, marborngin ma ho ijon anjaha pasonang uhurmu, patar girah ma nasiam puho, laho mandalani dalan nasiam, laho mulak hu rumahmu.”
10 Tapi seng ra dalahi ai marborngin, marugas ma ia lanjar bingkat, gabe das ma ia tontang ni Jebus, ai ma Jerusalem; odor pakonsi do halode, na marpalana na sapasang ai sonai homa inang ni anakni ai.
11 Sanggah dohor sidea hu Jebus anjaha sanggah laho sundut nari mando mata ni ari, jadi nini juakjuakni ai ma dompak tuanni ai, “Mahua tuluy ma hita hu huta ni halak Jebus an, anjaha marborngin ijai?
12 Tapi nini tuanni ai ma mambalosi, ʻSeng dear hita tuluy hu huta na legan, na so huta ni halak Israel, tapi mardalan ma hita torus das hu Gibea.ʼ
13 Ambahni ai nini ope dompak juakjuakni ai, ʻLaita mardalan, das bani sada humbani huta ai, ase marborngin i Gibea ma hita barang i Rama.ʼ”
14 Lanjar mardalan ma sidea manoruskon pardalanan ni sidea, anjaha sundut ma mata ni ari, dohorhonsi sidea hu Gibea, ai ma huta ni halak Benjamin.
15 Dob ai manirpang ma sidea hu Gibea, lanjar masuk ma sidea sihol marborngin ijai. Daskonsi sidea hu huta ai, hundul-hundul ma sidea i alaman ni huta ai, tapi seng dong na mangarahkon sidea marborngin hu rumahni.
16 Tapi tonggor ma, roh ma sada halak na matua hun parhorjaanni, hun juma bodarini ai. Hun Dolog Efraim do asalni, anjaha na manginsolat do ia i Gibea; halak Benjamin do anggo parhuta ai.
17 Mangkawah ma ia, gabe ididah ma halak na mardalan ai i alaman ni huta ai, lanjar nini halak na matua ai ma, “Laho huja do ham? Anjaha roh hunja do ham?
18 Nini ma mambalosi, “Na bani pardalanan do hanami hun Betlehem Juda laho hu dipar ni Dolog Efraim, hunjai do asalhu. Na laho do ahu baru hu Betlehem Juda, anjaha sonari na mardalan do ahu mulak hu rumah, tapi seng dong na mangarahkon ahu hu rumahni.
19 Adong do namin anggala pakon gagatan bani halodenami, sonai homa ruti pakon anggur bangku pakon bani jabolonmu naboru ampa bani juakjuak na rapkon ahu, jabolonmu on; aha pe seng dong hahurangannami.
20 Dob ai nini halak na matua ai ma, ʻDamei ma bamu! Sagala hahuranganmu ahu pe na manarihon, asal ulang i alaman on ham marborngin.ʼ”
21 Jadi iarahkon ma ia masuk hu rumahni, ibere ma gagaton bani halodeni, iburihi sidea ma naheini, dob ai mangan anjaha minum ma sidea.
22 Tapi sanggah na marmalas ni uhur ai sidea, roh ma parhuta ai, halak parjahat, manginggoti rumah ai. Sanggah na ihartuki sidea labah ai nini sidea ma hubani partua simada rumah ai, “Boan ma hu darat halak na roh hu rumahmu in, ase itandai hanami ia.
23 Jadi luar ma marayak sidea dalahi simada rumah ai, anjaha nini ma dompak sidea, ʻUlang, saninangku, ulang ma bahen nasiam na jahat, halani domma masuk halak on hu rumahku, ulang ma bahen nasiam hasamboron.ʼ
24 Tonggor ma, borungku anak boru ai pakon parinangon ni halak ai ma huarahkon luar; sidea ma parguro-gurohon nasiam, bahen nasiam ma bani sidea aha na dear ninuhur nasiam, tapi ulang ma bahen nasiam pambahenan hasamboron hubani halak on.”
25 Tapi seng ra halak ai manangihon hatani ai. Itangkap dalahi ai ma parinangonni ai, iarahkon ma ia hu darat hubani sidea, gabe iparseda sidea ma naboru ai, anjaha ibangkisi layur sabornginni ai das ronsi patarni; dobkonsi siang pe ari, ase ipaluah sidea naboru ai.
26 Marayak siang ari mulak ma naboru ai, tapi dabuh ma ia i lobei ni labah ni rumah ni halak ai tondokan ni tuanni ai; lanjar tibal do ia ijai paima siang ari.
27 Girah do puho tuanni ai, ibuka ma labah sihol hu darat laho manoruskon pardalananni, tapi tonggor ma, tibal do parinangonni ai i lambung labah ni rumah ai, anjaha tampei do tanganni haduasi bani molmolan.
28 Nini ma dompak naboru ai, “Jongjong ho, laho ma hita! Tapi seng marbalos ia.” Iangkat ma ia hu atas ni halode ai, bingkat ma ia mulak marayak iananni.
29 Daskonsi i rumah, ibuat ma pisou, itangkap ma parinangonni ai, itoktok ma holi-holini gabe sapuluh dua ponggol, lanjar ipantongoskon ma ai bani ganup tanoh ni halak Israel.
30 Jadi nini sagala na mangidah ai ma, “Seng ongga masa anjaha seng ongga naidah na masa sonon, dob bingkat halak Israel hun Masir ronsi sadari on. Parimbagaskon ma in, timbang ma, anjaha sahapkon ma.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA