Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ri se’reang allo a’lampami Simson mange ri Timna. Nia’mo se’re tulolo battu ri Filistin anjoreng.
2 Nammotere’mo mange ri tau toana na nakana, "Eroka’ ri anjo tulolo battua ri Filistin, niaka ri Timna. Kupalaki nakimange ampassuroi."
3 Mingka nakanamo tau toana, "Angngapa numusti a’lampa a’boya baine ri tu Filistin, tu tenaya nantama ri golongang umma’Na Batara? Tenaka tulolo baji’ lalang ri golonganta todong, yareka lalang ri bansata?" Appialimi Simson ri manggena, angkana, "Mingka kaiaminjo tulolo Filistin kukaeroki. Nakuminasai nakimangemo ampassuroanga’."
4 Tanaassengai tau toana Simson angkana Batara ampagioki Simson na nagaukang anjo kammaya. Nasaba’, a’boyai kasampatang Batara untu’ ambunduki tu Filistin. Anjo wattua, nikoasai tu Israelka ri tu Filistin.
5 Jari a’lampami Simson siagang tau toana mange ri Timna. Lalang allalona ke’nanga ri se’reang koko anggoro’, assiruppami Simson siagang sikayu singa rungka. Assa’ra ammarrummi anjo singaya,
6 na ti’ring a’jari kassa’mo Simson lanri kakoasanNa Batara. Na nabi’nya’-bi’nyara’mo anjo singaya siagang limanna, sangkamma le’ba’ angkana bembeji anjo singaya. Tena nacaritai Simson mae ri tau toana anjo apa kajarianga.
7 Nampa mangemi Simson angkunjungi anjo tuloloa, na naagang accarita. Na nangaimo Simson anjo tuloloa.
8 Tena nasiapa sallona a’lampami pole Simson untu’ ambuntingi anjo tuloloa. Lalang a’jappana, assengkami mange anciniki anjo singa le’baka nabuno, wattunna mange battu ri anjo tampaka, jai sikalimi bani lalang ri kalenna anjo singaya. Na nia’ todong je’ne’ bani.
9 Nakaere’mi antama’ ri limanna anjo bania, nampa nakanre a’jappa anjo bania. Nampa mange ri tau toana, na nasare todong sipa’gang anjo bania, nampa nakanre ke’nanga. Mingka tena napaui Simson ri ke’nanga angkana battu anjorengi ri singa matea naalle anjo bania.
10 A’lampanamo Simson mange ri balla’na anjo tau loloa, appare’mi passua’-suarrang Simson anjoreng. Nasaba’ kammaminjo kabiasanna tau rungka-rungkaya.
11 Nicini’na ri tu Filistin ammileimi ke’nanga tallumpulo turungka untu’ angngagangi Simson.
12 Nakanamo Simson ri ke’nanga, "Nia’ tappu-tappuangku. Punna nukullei nutappu, massing kusareko silawara’ kaeng lenang halusu’ siagang sipasang pakeang ga’ga. Kusareko kasampatang tuju allo lalang passua’-suaranna anne pa’buntinganga untu’ antappui.
13 Mingka punna tena nukkulle antappui, ikau massing assarea’ kaeng lenang halusu’ siagang sipasang pakeang ga’ga." Nakanamo anjo tu Filistinga, "Baji’mi kamma-kamma anne paumi anjo tappu-tappuanga."
14 Nakanamo Simson, "Battu ri angnganrea, assulu’ apa nikanrea; battu ri kassaka, assulu’ apa mate’nea." Allalonamo tallungallo tenapa ri ke’nanga akkulle antappui anjo tappu-tappuanga.
15 Jari, ri makaappa’na alloa, nakanamo ke’nanga ri bainenna Simson, "Nyonyo’ sai anjo bura’nennu sollanna ero’ ampaui ri kambe apa battuanna anjo tappu-tappuanga. Punna tena, lakitunuko siagang sikontu bone balla’na manggenu. Iaji padeng nanuundangki’ lanri ero’na nupacappu’ apa-apanna ikambe!"
16 Jari mangemi bainenna Simson angngarru’ ri dallekanna Simson, na nakana, "Kuassengi angkanaya nungaia’. Mingka angngapa na nusare tappu-tappuang agangku, na tena nupauanga’ battuanna. Tantu nukabirisia’!" Nakanamo Simson, "Tayangi rolong! Kamanna tau toaku tena todong nakupauangi. Angngapa namusti kupau ri kau?"
17 Lalanna tuju allo passua’-suarranga tuli angngarru’na bainenna Simson. Na lanri tuli angngarru’na ero’ nipauang, ri maka tujuna allona nipauammi ri Simson battuanna anjo tappu-tappuanga. Nampa nakanamo bainenna Simson battuanna anjo tappu-tappuanga mae ri tu Filistin.
18 Jari ri maka tujuna alloa, ri tenanapa nalabu alloa, nakanamo anjo ke’nanga mae ri Simson, "Apaya la’bi te’neangngang na bania? Na apaya pole kassakangang na singaya?" Appialimi Simson angkana, "Kapunna tena nakusuro bainengku, takkulleako angngissengi battuanna anjo tappu-tappuanga!"
19 Ti’ring kassa’mi Simson lanri kakoasanNa Batara. Na’lampamo mange ri Askelon. Anjoreng ammunoi tau bura’ne tallumpulo ia ga’ga-ga’gaya ngaseng pakeanna. Nampa naalleang ngaseng pakeanna ke’nanga, na naerang napassareang mae ri anjo tallumpuloa tau antappuai tappu-tappuanna. Le’baki anjo ammotere’mi mae ri balla’na siagang lussa’ pa’mai’na.
20 Nampa napassareammo matoang bura’nena Simson anjo bainenna Simson mae ri paeranna Simson ri wattu pa’buntinganna.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA