Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Dorakami pole umma’ Israel ri Batara jari nibalang parekangi ri Batara, na nikoasai ke’nanga ri tu Filistin, patampulo taung sallona.

² Anjo wattua nia’ sitau bura’ne ri kota Zora. Arenna nikana Manoah, battu ri suku Dan. Tamanangi bainenna.

³ Mingka ri se’reang allo nia’mo malaeka’Na Batara ampappicinikangi kalenna mae ri ia. Nakanamo anjo malaekaka ri ia, "Anne siapaya sallona tena nukkulle anggappa ana’. Mingka tenamo nasallo nulatianang, nunggappa sitau ana’ bura’ne.

⁴ Jari katutui baji’mi kalennu. Teako angnginungi anggoro’ yareka inungang terasa’, teako angnganrei apa-apa harang.

⁵ Punna lassu’mo ana’nu, tea sikaliko polongi uu’na. Nasaba’ lalang nitianangang iji nale’ba’ nipattantumo untu’ a’jari tau attinja’. Iami labarjuang untu’ allappassangi bansa Israel battu ri kakoasanna tu Filistin."

⁶ Le’baki anjo mangemi bainenna Manoah ri bura’nenna na nakana, "Daeng, nia’ suroNa Allata’ala mae ri nakke, kammai tanja’na malaeka’Na Allata’ala, sa’gengku malla’ dudumo. Tena nakupakkuta’nangang angkana battu kemaei. Na tena todong napauanga’ arenna.

⁷ Mingka nakana ri nakke angkana latiananga’ siagang langgappa sitau ana’ bura’ne. Nakanamo pole angkana takkullea’ angnginung anggoro’ yareka inungang terasa’, yareka angnganre apa-apa harang. Nasaba’ anjo anaka musti nipassareangi mae ri Allata’ala untu’ a’jari tu attinja’ ri sikontu tallasa’na."

⁸ Nalangngere’na Manoah anjo passalaka, appala’ doammi ri Batara, angkana, "O Batara, poro Kisuro laloi pole battu anjo suroTa mae ri kambe, sollanna napauangi ikambe apa musti nagaukang ikambe punna lassu’ anjo anaka."

⁹ Napilangngerimi Allata’ala pappala’na Manoah. Battumi pole anjo malaeka’Na Batara mae ri bainenna Manoah, ri wattu sitabanna ammempo-mempo ri kokoa. Anjo wattua tenai bura’nenna anjoreng.

¹⁰ Jari larimi mange ampauangi bura’nenna, na nakana, "Daeng, mae maki’ ciniki. Nia’mi pole battu anjo tau le’baka battu mae ri nakke pirangngalloang!"

¹¹ Akkaro-karomi Manoah ampinawangi bainenna. Nareppesimi anjo taua na nakuta’nang angkana, "Ikatteka angngerangi anjo kabaraka mae ri bainengku?" Appialimi anjo malaekaka angkana, "Kammatojengi."

¹² Akkuta’nammi Manoah angkana, "Punna kajariang sallang anjo apa le’baka nipau apa musti nigaukang ri anjo anaka? Antekamma sallang katallasanna?"

¹³ Appialimi anjo malaeka’Na Batara angkana, "Takkulleai bainennu angnginung anggoro’ yareka inungang terasa’. Kammayatompa takkulleai angnganre kanre-kanreang battua ri poko’ anggoroka, yareka apa-apa haranga nikanre. Musti nagaukang ngasengi sikontu apa kupaua ri ia. Na najagai sollanna tennanniakka nakaluppai nagaukang manna sirupa."

¹⁴ (13:13)

¹⁵ Nampa nakana pole Manoah ri ia, "Kuminasai nakiattayang rolong sinampe’, nanipappalluangki’ bembe rungka."

¹⁶ Mingka nakanamo anjo malaeka’Na Batara, "Manna kuttayang anrinni, mingka tena nalakukanre anjo apa nupatalaya sinampe’. Mingka punna ero’ tojengko ampatalai, patalami anjo untu’ a’jari koro’bang tunuang, na nipassareang mae ri Batara." Tenapa naassengi Manoah anjo wattua angkana malaeka’Na Batara anjo naaganga a’bicara. Jari nakanamo, "Punna kamma kuminasai nakipau arenta. Sollanna punna kajariammo sallang anjo apa kipaua, akkullemi ikambe assareki’ pappakala’biri’ mae ri katte."

¹⁷ (13:16)

¹⁸ Akkuta’nammi malaeka’Na Batara angkana, "Apa saba’na nuero’ angngassengi arengku? Anjo arengku appakkalannasaki."

¹⁹ Jari angngallemi Manoah sikayu bembe rungka kammayatompa sike’de’ gandung. Nampa napadongko’ irate ri batua na napassombang mae ri Batara, iamintu Batara anggaukangi apa-apa appakalannasaka.

²⁰ Lalang a’rinrana nai’ anjo pepeka battu ri tampa’ pakkoro’bangnganga, nacini’mi Manoah siagang bainenna anjo malaekaka lalang pepe’ nai’ ri langika. Nampami naasseng Manoah angkana malaeka’Na Batara anjo battua; Jari su’ju’mi siagang bainenna anynyomba. Ribokoanganna tale’bakami nacini’ pole ke’nanga anjo malaekaka.

²¹ (13:20)

²² Nakanamo Manoah ri bainenna, "Ma’nassa lamateki’ nasaba’ le’baki nicini’ Allata’ala!"

²³ Appialimi bainenna angkana, "Punna ero’ memang Batara ambunoki’, tantu taerokai antarimai anjo koro’bang nipassombanga mae ri Ia. Siagang tena todong na laNappicinikang ngaseng anne sikammaya mae ri katte. Yareka tena na laNapauangki’, anjo apa-apa le’baka Napau mae ri katte."

²⁴ Siapa are bulang ribokoanganna, ammana’mi sitau bura’ne anjo bainenna Manoah. Nampa naareng Simson anjo anaka. A’bakka’mi a’jari lompo anjo anaka, na nibarakkaki ri Batara.

²⁵ Ri wattunna nia’ ri tampa’ kemana suku Dan, attampaka ri alla’na Zora siagang Esytaol, appakkaramulami nisare kagassingang ri RohNa Batara.

Hakim-hakim

Video Hakim-hakim 13

Ikuti Kami:

KONTAK | PARTISIPASI | DONASI